Bible in duytsche (Delftse bijbel 1477)

§ Capittel .xi

1

TE dien tide gheschiede als dat iaer omme quam. als die coningen plegen ten stride wt te trecken so sant dauid ioab. ende sijn knapen mit hem. ende al israhel: ende si woesten ammons kinderen ende beleiden rabba. Mer dauid bleef in iherusalem.

2

Doe men dit dede so gheschiede dat dauid opstont van sinen bedde na middaech: ende dat hi hem verwanderde opten solre vanden conincliken huse: ende hi sach daer ieghen hem op haren solre een wijf die haer dwoech. Ende het was een herde schoen wijf.

3

Daer om sant die coninc: ende onderuraghede wie dat wijf was. Ende men boetscapte hem: dattet bethsabee was helyas dochter ende vryas wijf van etheen.

4

Ende dauid sant boden: ende

[p. *411]

namse. Ende doe si tot hem incomen was: so sliep hi mit haer. Ende sij wort te hant gesuuert van haerre onreynicheit.

5

Ende si keerde weder in huus ende hadt kint ontfaen. Ende si sant ende ontboot dauid: ende seide Ic hebbe ontfaen

6

Ende dauid sant tot ioab. ende seide. Sent mi vryam van etheen. Ende ioab sant vryam tot dauid

7

Ende vryas quam tot dauid. Ende dauid vraghede hem hoe wel ioab dede. ende tvolc dat met hem was: ende hoemen den strijt diende

8

Ende dauid seide tot vryam. Ganc in dijn huus: ende dwae dinen voeten. Ende vryas ghinc wt sconincs huus: ende hem volghede die coninclike spise.

9

Mer vryas heeft geslapen voer die poorte van den conincliken huse mit sijns heren anderen knapen: ende hi en ghinc niet in sijn huus.

10

Ende dauid wort geboetscapt van dien die seiden. Vryas en ginc in sijn huus niet. Ende dauid seide tot vryam. En bistu niet comen van enen langhen wege? Waer om en bistu niet ghegaen in dijn huys?

11

Ende vryas seide tot dauid. Gods arke ende israhel ende iuda legghen in tenten. ende ioab mijn here ende mijns heren knapen legghen op die aensichten vanden landen: ende ic sal gaen in mijn huys om te eten ende te drincken ende te slapen mit minen wiue? Bij dijnre salicheit. ende bider salicheit dijnre sielen. soe en sal ic dese dinc niet doen.

12

Daer om seide dauid tot vryam. Blijft hier huden oec. ende ic sal di morgen laten varen. Dien dach bleef daer vryas in iherusalem ende tsanderdages:

13

ende dauid riepen dat hi voer hem eten ende drincken soude. ende hi maecten droncken. Ende tsauonts ghinc hi wt. ende sliep op sijn bedde. met dauid sijns heren knapen: ende hij en ghinc niet in sijn huus.

14

Ende smorghens gheschiede: dat dauid tot ioab screef een lettere: ende hij santse hem mit vryas hant

15

ende hij screef in die lettere. Settet vryam inden strijt daer hi alre starcste is: ende laten daer: dat hi versleghen doot bliue.

16

Ende doe ioab dus die poorte beleit had. soe sette hij vryam in die stat daer hi wiste dat alre starcste mannen waren:

17

ende die mannen vander stat quamen wt ende vochten ieghen ioab. ende het vielenre vanden volcke van dauids knapen: ende vryas van etheen bleef daer oec doot.

18

Ende ioab sant ende ontboet dauid alle die woerden vanden stride:

19

ende beual den bode segghende. Alstu volseit sultste hebben alle dese woerden vanden stride totten coninc.

20

sietstu dat hi gram wort ende seit hi. waer om ghinc di anden mure om te striden: en weetti niet datmen bouen vele gescuts schiet:

21

wie sloech abymelech ierobaals soen. ende warp een wijf op hem niet een stuc van enen steen. ende doden in thebes: waer om ghing di neuen die mueren: so sultstu segghen. Vryas van etheen dijn knape is oec doot bleuen.

22

Dus ginc die bode wech: ende quam tot dauid ende vertelde hem al dat hem ioab beuolen had:

23

ende die bode seide tot dauid. Die mannen worden machtich bouen ons: ende quamen wt tot ons int velt. Ende int gheruchte datter gbemaect wort

[p. *412]

iaechde wijse totter poorte vander stat

24

ende die scutters scoten te dinen knechten waert van op die mueren ghescutten: ende daer sijn van sconincx knechten doot bleuen. Ende oec is daer doot bleuen vryas van etheen dijn knecht.

25

Ende dauid seide totten bode. Dit sultstu ioab seghgen. Dese dinc en verneerdi niet. Want tgheschien vanden strijde is menigherhande: ende tswaert verderft nv desen ende nv den genen. Verstoute dine vechters ieghen die poorte. dattuse verdestrueerste: ende gerade hem.

26

Ende vryas wijf verhoerde dat haer man vryas doot was: ende sij beweenden.

27

Ende doe tgewene ouerleden was soe sender dauid om ende haeldese in sijn huus: ende si wort sijn wijf. ende si ghebaerde hem enen soen. Ende dit woert dat dauid gedaen hadde wanhagede voerden here