Bible in duytsche (Delftse bijbel 1477)

§ Capittel .viij

1

NA dit gheschiede dat dauid die philistinen sloech ende veroetmoedichdse: ende dauid dede af den breydele vanden tribute vanden philistinen hant:

2

ende hi sloech moab ende maectese mit eenre coerden ende maectese effen ghelijc der aerden. Hi mat twe linen: die ene te doden: ende die ander te liue te houden. Ende moab wort dauid dienende onder tribuut

3

Ende dauid

[p. *408]

sloech adadeser roob soen den coninc van soba: doe hi wt quam om here te worden optie riuiere van eufraten.

4

Ende dauid vinc wt sinen heere dusent ende seuen hondert mannen te paerde. ende twintich dusent man te voete: ende hij ontzenude alle die paerde: ende die waghenen verbrande hi Mer hi lieter of gheheel hondert waghenen.

5

Ende syria van damasco quam oec. om dat hi adadeser den coninc van soba salcoers brengen soude: ende dauid sloech van syria twe ende twintich dusent man:

6

ende dauid heeft bolwercken gheset in syria van damasco: ende syria wort dauid dienende onder tribuyt. Ende die here behilt dauid in alle dien daer toe hi tide

7

Ende dauid nam die gulden wapene die adadesers knapen hadden: ende hi voerdese in iherusalem.

8

Ende die coninc dauid brachte van beth. ende van beroth adadesers steden seer veel metaels: daer die coninc salomon of maecte alle die metalen vaten inden tempel: ende die metalen zee ende die colummen ende den outaer.

9

Ende thon die coninc van emath hoerde dat dauid verslegen had al die machte van adadesers heere.

10

Ende thon sende ioram sinen soen totten coninc dauid dat hi hem verblidende grueten soude: ende hem dancken soude dat hi adadeser verwonnen hadde ende ghesleghen hadde Want thon was adadesers viant. Ende in iorams handen waren guldenen vaten ende silueren ende latoenen vaten:

11

ende die heilichde die coninc dauid oec den here mitten silueren ende mitten goude dat hi geheilicht had ende dat hi ghewonnen hadde van alden heidenen die hi tonder gedaen had

12

van syrien ende van moab ende van ammons kinderen ende vanden philistinen ende van amalech: ende van adedesers hoestele die roobs soen was sconincs van soba.

13

Ende doe dauid wederkeerde so maecte hi hem enen naem in die sout valeye doe hi syrien gewonnen had ende hij sloech in die valeye achtien dusent man

14

ende in gebelem drie ende twintich dusent man. ende hij leide wachters in ydumea: ende hij makeder bolwercken in Ende al ydumea wort dauid dienende onder tribuyt: ende die here behilt dauid in alle dien daer hi toe trac.

15

Ende dauid dede vonnisse ende gerechticheit voer alle sijn volc: ende hi regneerde bouen al israhel

16

Ende ioab seruien soen was bouen there: ende iosaphat achiluds soen was die de geste screef:

17

ende sadoch achytobs zoen ende abymelech abyathars soen waren papen: ende sarayas was cancelier:

18

ende banaias ioiaden soen was bouen cherethi ende phelethy. Mer dauids sonen waren papen

19[9:1]

Ende dauid seide waendi dat yemant ouerbleuen is van sauls huse dat ic mit hem ontfermicheit doen mach om ionathas wil.