Bible in duytsche (Delftse bijbel 1477)

§ Capittel .vij

1

HEt gheschiede doe die coninc in sijn huus sat: ende doe hem die here rust had gegeuen al om en tomme van allen sinen vianden:

2

so seide hi tot nathan den prophete. Sietstu niet dat ic wone inden cedren huse: ende dat gods arke is gheset in die middewaert van vellen?

3

Ende nathan seide totten coninc. Ganc ende due al dat in dijn herte is: want die here is mitti.

4

Ende het gheschiede binnen die nachte: ende sich sheren woort wort ghedaen tot nathan segghende.

5

Ganc ende spreect tot dauid minen knechte. Dit seit die here Sultste mij stichten een huus in te wonen?

6

Want noch en heb ic in ne gene huys ghewoent van dien dage dat ic die kinder van israhel wt egipten leide tot in desen daghe: want ic heb gewandert in die tabernacule ende in tenten

7

ende in allen steden daer ic ouerleden ben mit alden kinderen van israhel. Heb ic sprekende ghesproken tot enighe gheslachte van israhel. dien ic beuolen hebbe dat mijn volc van israhel voeden soude. ende heb ic geseit: waer om hebstu mi niet gemaect een cedren huys?

8

Ende nu sultstu dauid minen knecht seggen Dit seit die here van den heeren. Ic hebbe di ghenomen uter weiden daerstu die cudden volchdetste om dattu prince wesen soutse bouen mijn volc van israhel:

9

ende ic hebbe mitti gheweest in allen dien daerstu gewandert hebste: ende ic hebbe versleghen na dine aensichte alle dine viande: ende ic heb di ghemaect enen groten naem nader groter lude name die in aertrike sijn.

10

Ende ic sal minen volke van israhel stat setten ende ic salt planten ende sal mit hem wonen. ende ic sal voertmeer niet worden ghestoert: ende die kinder der quaetheit sullenre nemmermeer toe doen dat sijt quellen sullen also si te voren daden.

11

van dien daghe dat ic rechters sette bouen mijn volc van israhel. Ende ic sal di ruste geuen van alle dine vianden: ende die here sal di voersegghen: dat dij die here een huus maken sal.

12

Ende als dijn dagen voldaen sullen worden ende du slapen sultste mit dinen ouders: so sal ic dijn saet verwecken na di. dat wt dinen buic comen sal: ende sal sijn rike vastmaken.

13

Ende hi sal in minen naem een huys stichten: ende ic sal den trone sijns riken ghestadich maken tot inden eweliken

14

Ic sal hem sijn vader wesen: ende

[p. *407]

hi sal wesen in een soen. Mer ist dat hi iet quaets duet: so sal icken castien inder mannen ruede: ende inder menschen kinderen wonden.

15

Mer mijn ontfermherticheit en sal ic van hem niet nemen: also icse van saul nam. dien ic wech dede van minen aensichte.

16

Ende dijn huys sal ghetrouwe wesen: ende dijn rike voer mijn aensichte ewelike: ende dijn troen sal ewelic vast wesen.

17

Na al dese woerden. ende na al dit visioen: so sprac dus nathan tot dauid.

18

Ende die coninc ghinc in ende sat voerden here: ende seide. Here god mijn wie bin ic ende wat is mijn huus: dattu mij tot hier heues ghebracht?

19

Mer here god dit schijnt noch luttel in dinen ogen: du en moetste oec spreken van dijns knechts huys ouer langhen tijt. Want here god dit is adams wet

20

Wat salre noch dauid toe mogen doen dat hi tot di spreken mach?

21

Want here god du kenste dijn knecht. Om dijn woort ende na dijn herte so heefstu alle dese grote dinghen ghedaen: aldus dattu dit kenlic dinen knecht soutste doen.

22

Here god hier om bistu verheuen: want nyeman en is dijns ghelijc: noch en ghene god en is sonder du in alle dien dat wi gehoert hebben mit onsen oren.

23

Want wat volc sijn ghelijc dinen volcken van israhel in aertrike dat god omghinc dat hijt verlossen soude te sinen behoef in volc ende dat hi hem een naem maken soude: ende dat hi hem op aertrike doen soude grote dingen ende eyselic. van dijns volcs aensichte dattu te dinen behoef hebste verlost wt egipten vanden heidene. ende haer gode?

24

Ende du hebste di vast gemaect dijn volc van israhel in ewelijc volc. ende du here biste hem gemaect in god

25

Nu daer om here god verwecke dijn woert ewelike in ewelic dattu ghesproken hebste op dinen knecht ende op sijn huys ende doch alstu ghesproken hebste:

26

op dat dinen naem moet worden verheuen tot in eweliken. ende datmen moet segghen. Die here god vanden heeren is die god van israhel. Ende dijns knechts dauids huus sal werden ghestadicht voer den here

27

want du here vanden heeren god van israhel hebste dijns knechts oren gheopenbaert ende gheseit. ic sal dij een huys stichten hier om heeft dijn knecht sijn herte vonden dat hi di bid mit deser bedinghen.

28

Nu dan here god du biste god: ende dijn woerden sullen gewarich wesen. Want du hebste dese guede dinghen ghesproken tot dinen knecht.

29

Hier om beghinne ende benedie dijns knechts huus dattet ewelijc moet wesen voer di. want du here god hebste dit ghesproken: dat mit dijnre benedictien dijns knechts huys sal ewelike sijn ghebenedijt