Bible in duytsche (Delftse bijbel 1477)

Ca .vi

1

EChter vergaderde dauid al die wtuercoren van israhel dertich dusent man.

2

Ende dauid

[p. *405]

stont op ende ghinc wech ende al tvolc dat mit hem was van iudas mannen om dat si halen souden gods arke: bouen den welken men aneroept sheren gods naem vanden heere die sittet op cherubin bouen haer.

3

Ende sij setten gods arcke op enen nieuwen waghen Ende si haeldense van aminadaps huys die in gabaa was. oza ende hayo aminadaps sonen menden den nyeuwen waghen. ende doe sise genomen hadden van aminadaps huys die in gabaa was. ende sheren arcke hueden.

4

so ginc hayo voer gods arcke.

5

Ende dauid ende al israhel speelden voer den here: in allen gewrachten houte in cytolen in harpen in lieren ende in tamburen. ende in cymbalen.

6

Ende na dien dat sij comen waren in nachors vloere soe stac oza sijn hant voert an sheren arcke ende hieltse: want die ossen sprongen mitten garde ende hadden die arcke ghehelt.

7

Ende die here wort vergramt mit onwaerdicheden ieghen ozam: ende hij sloech hem om dese ouerdaet: ende hij bleef daer doot neuens gods arcke.

8

Ende dauid wort besericht om dat die here ozam gesleghen hadde: ende men hete den name van dier stat oza slaen tot in desen daghe.

9

Ende in dien dage ontsach dauid den here ende seide. Hoe sal sheren arcke te mi incomen.

10

Ende hi en wilde te hem niet keren sheren arcke in dauids stede: mer hi keerdse in obededoms huis van geth.

11

Ende sheren arcke bleef in obededoms huis van geth drie maent: ende die here benedide obededom. ende al sijn huus.

12

Ende die coninc dauid wort geboetscapt: dattie here obededom ghebenedijt had ende al dat hi hadde om gods arcken wil. Ende dauid seide. Ic sal gaen: ende brenghen sheren arcke mit benedictien in mijn huys. Dus ghinc dauid wech: ende haelde sheren arcke van obededoms huys in dauids stede mit bliscepen: ende mit dauid waren seuen processien: ende die victime vanden calue.

13

Ende doe die ghene die die arke drogen waren ses screden voert ghegaen soe doden si enen osse ende een scaep ende enen ramme:

14

ende dauid speelde op die organen ende hi spranc al sijn machte voer den here. Want dauid was ghecleet mit enen lynen ephod:

15

ende dauid ende al thuys van israhel leiden sheren arke in vruechden ende in geluden van trompen.

16

Ende doe sheren arcke gecomen was binnen dauids stede: so sach mycol sauls dochter doer een venster: ende sach dauid huppelen ende springhen voerden here: ende si versmade hem in haer herte.

17

Ende si brachten sheren arcke in: ende si settense in haer stat in midden den tabernacule dat dauid ghemaect had: ende dauid offerde holocauste voer den here ende danckelike hostien.

18

Ende als hi veruolt hadde offerende holocauste ende danckelike hostien: so benedide hi tvolc in sheren name

19

ende hij deelde alder menichte van israhel. manne ende wiue elc een broot ende blomen: ende olye gefrijt: ende enen brade van buffels vleisch. Ende al tvolc ghinc wech: elc in sijn huus:

20

ende mycol sauls dochter quam wt in dauids ghe-

[p. *406]

moet. ende seide. Hoe gloriose was huden die coninc van israhel hem onderkende voer sine ioncwiuen knapen: ende hi ondecte hem alsmen ondect enen vanden ribauden.

21

Ende dauid seide tot mycol. Leeft die here: so sal ic spelen voer den here die mi bet vercoren heeft dan dinen vader ende dan al dijn huys: ende die mi beuolen heeft dat ic prince wesen soude bouen sheren volc van al israhel.

22

Ende ic sal spelen ende onwarder worden meerre dan ic gheweest hebbe: ende oetmoedich wesen in minen oghen: ende mitten ioncwiuen daer du of gesproken hebste sal ic glorioser openbaren.

23

Hier om en wort mycol sauls dochter ghenen soen geboren: voer die daghe haerre doot