Bible in duytsche (Delftse bijbel 1477)

§ Ca .iiij.

1

HYsboseth sauls soen hoerde dat abner in hebron geuallen was ende sijn handen worden ontbonden: ende al israhel worter om ghestoert.

2

Sauls soen hadde twe mannen die princen vanden rouers waren: des eens name was banaa ende des anders name rechab remmons sone van beroth van benyamins kinderen. Want beroth was gherekent in benyamin.

3

Ende die van beroth vloghen in gethaim: ende si waren daer toecomelingen tot in dier tijt.

4

Ende ionathas sauls

[p. *403]

zoen had enen soen mit crancken veoten. Want hi was vijf iaer out doe van iesrahel die bode quam van saul ende ionathas doot. Ende sijn voetster nammen ende vloe mit hem. Ende doe sij haer haeste so viel tkint: ende wort crepel: ende sinen name was mifiboseth.

5

Ende remmons sonen van beroth quamen rechab ende banaa: ende si ingingen in die hette vanden daghe in hysboseths huus. die te middaghe lach ende silep op sijn bedde: ende die doerwachter suuerde tarwe ende was slapende geworden

6

Ende dese twe namen aren van tarwe ende ghinghen al heymelic in: ende staken hysboseth doot in sijn ghemachte rechab ende banaa sijn brueder: ende si vloghen.

7

Ende doe si in thuys gecomen waren soe lach hi ende sliep op sijn bedde beslotenre dore: ende sij staken ende sloghen doot. Ende si droghen sijn hooft wech alden nachte doer den wech van der wildernisse:

8

ende si drogen hysboseths hooft tot dauid in hebron. Ende si seiden totten coninc. Sich hier is hysboseths sauls soens hoeft dijns viants die dine ziele sochte: ende die here heeft den here onsen coninc wrake huyden ghegheuen: van saul ende van sinen sade.

9

Ende dauid antwoerde rechab ende banaa sinen bruederen remmons sonen van beroth: ende hi seide tot hem Leeft die here die mine ziele heeft verlost van allen verdriet:

10

want die gene die mi boetscapte ende seide saul is doot die waende dat hi mi lieue boetscapte dien hielde ic ende doden en sycelech: dien ic moste loon geuen ouer die boetscap.

11

Ende hoe vele beth bin ic v sculdich te doen als quade mannen die hebben gedoot enen ontsculdighen man binnen sinen huse op sijn bedde ende te soken sijn bluet van uwer hant? Ende v van den lande wech te doen.

12

Ende dauid beual sinen kinderen: ende si dodense: ende si sloghen hem hande ende voeten of: ende si hingense bouen die piscine in hebron. Hysboseths hooft namen si: ende grouent in abners gracht in hebron.