Bible in duytsche (Delftse bijbel 1477)

§ Ca .iij

1

DUs was lange gestrijt tusschen dauids huus ende sauls huns: ende dauid had voertganc ende was altoes vromer dan hi was. mer sauls huus crancte alle dage

2

Ende dauid worden sonen geboren in hebron. Ende sine eerste gheboren sone was amun van achinoem van iesrahel:

3

ende na hem was cheleab van abygayl nabals wijf van carmelo. Ende die derde was absolon: maacha soen die tholomay sconincs van gessurs dochter was

4

Ende die vierde was adonyas aggith soen: die vijfste was saphacias abythals soen

5

Die seste was ihetraam: die dauid hadde van egla sinen wiue. Dese worden dauid in hebron gheboren.

6

Ende doe strijt was tusschen sauls huse ende dauids huse: soe regeerde abner sauls huus.

7

Ende saul had ghehat een vriendinne die respha hete. die athya dochter was: ende abner ginc in tot desen wiue. Ende hysboseth seide tot abner Waer om bistu inghegaen tot mijns vaders vriendinne?

8

Ende abner wort seer gram op hysboseths woerden: ende seide. Ben ic huden niet een honts hoeft ieghen iuda. die ontfermicheit

[p. *401]

heb ghedaen op sauls huus dijns vaders. ende op sine bruederen ende op sine naesten: ende ic en hebbe di niet gheleuert in dauids hande. ende du hebtste ieghen mi ghesocht dattu mi huden berispen soutste om eens wijfs wille?

9

Dit moet god abner doen. ende dit moet hier hem toe doen: ofte ic niet mit dauid doen en sal: also hem die here ghesworen heeft.

10

dat rike sal worden ouerghedraghen van sauls huus: ende dauids troen sal worden verheuen bouen israhel ende bouen iuda. van dan tot barsabee

11

Ende hysboseth en mochten niet geantwoerden: want hi ontsach hem.

12

Hier om sant abner voer hem seluen boden tot dauid ende seide. Wies is tlant? Ende dat si segghen souden. Maec met mij vrientscap ende mijn lant sal mitti wesen: ende ic sal al israhel tot di brengen.

13

Ende dauid seide. Ic sal alte wel mitti vrientscap maken: mer een dinc heissche ic van dij seggende. Du en sultste mijn aensicht niet sien. voer dattu brencste mycol sauls dochter: ende also sultstu comen ende mi sien.

14

Ende dauid sant boden tot hysboseth sauls soen ende seide. Gef mi weder mycol mijn wijf die ic te huwelic ontfinc mit hondert ouerslouen vanden philistinen.

15

Hier om sant hysboseth: ende haeldese van haren man fatiel lais soen.

16

Ende haer man volghede haer na al wenende tot baurim: ende abner seide tot hem. Ganc ende keer weder Ende hi keerde weder

17

Ende abner droech haer redene in totten ouders van israhel ende seide. Beide gisteren ende eergisteren so hyeschty dauid dat hi bouen v regneren soude.

18

Nv duet daer om: dat die here ghesproken heeft tot dauid ende gheseit. Ic sal mijn volc van israhel verlossen in mijns knechts dauids hant: vander philistinen ende alre sijnre vianden hant.

19

Ende abner sprac oec tot benyamin. Ende hij ghinc wech om te spreken tot dauid in hebron al dat die van israhel genoechde ende alle benyamin:

20

ende hij quam tot dauid in hebron mit twintich mannen. Ende dauid maecte abner ende den mannen die mit hem comen waren een werscap.

21

Ende abner seide tot dauid. Ic sal opstaen om te vergaderen te di den here minen coninc al israhel ende ic sal mitti belofte doen: soe dattu bouen hem allen regneren sultste also dijn ziele begeert. Ende doe dauid abner aldus wt hadde gheleyt. ende hi in paeyse gegaen was:

22

so quamen te hans dauids kinderen ende ioab ende hadden die rouers versleghen mit sere groten roue. Mer abner en was mit dauid niet in hebron: want hi hadden laten gaen ende hij was wech ghetijt in paeyse:

23

ende ioab ende alt heere dat mit hem was: quamen daer nae. Ende ioab wort gheboetscapt vanden ghenen die hem seiden. Abner ners zoen is comen totten coninc: ende die coninc lieten gaen ende hi is wech gegaen in paeyse.

24

Ende ioab ghinc in totten coninc ende seide Wat hebstu gedaen? Sich abner is totti ghecomen. Waer om hebstu hem laten gaen ende hi is henen ghetijt ende wech gegaen?

25

En kenstu abner ners soen niet dat hij quam daer om hier dat hi di bedriegen soude. ende

[p. *402]

om dat hij weten soude dinen inganc ende dinen wtganc: ende dat hi weten soude al dattu duetste?

26

Ende ioab ghinc wt van dauid ende sant boden na abner: ende hi deden wederkeren vander cysternen syra dats dauid niet en wiste.

27

Ende doe abner iu hebron weder ghecomen was soe leiden ioab besiden in middewaert vander poorten om dat hi ieghen hem spreken soude mit verradenissen: ende hi stacken daer in sijn ghemachte ende hi bleef doot: om die wraken van asahel sijns brueders doot

28

Doe dauid hoerde dat dese dinc ghedaen was. soe seide hi. Ic bin suuer ende mijn rike voerden here ewelike van abner ners soens bluede:

29

ende het moet comen op ioabs hooft. ende op alle sijns vaders huus: ende ioab en moet niet ghebreken die ghedogen sal tvloeyen vanden bluede die die lazars sij. ende die spillen houdense sijn: ende die vallen sullen mitten zwarrde ende dien broot ghebreke.

30

Ioab ende abysay sijn brueder doden dus abner: om dat hij asahel haren brueder ghedoot had inden stride gabaon.

31

Ende dauid seide tot ioab: ende tot alden volke dat mit hem was. Scoret uwe clederen ende gort v mit sacken: ende weent voer abners wtuaert Ende die coninc dauid volgede na die bare.

32

Ende doe si abner in hebron begrauen hadden soe hief die coninc sijn stemme op: ende weende op abners gracht Ende al tvolc weende oec:

33

doe seide hi. Abner du en biste niet dootbleuen: als die quade plaghen te steruen.

34

Dijn handen zijn niet ghebonden dijn voeten en waren mit boeyen niet verladen: mer also si plaghen te vallen voer die kinderen der quaetheit soe bistu geuallen Ende al tvolc versuchte: ende weende op hem.

35

Ende doe alle die menichte comen was om spise te nemen mit dauid ende het noch claer dach was So zwoer dauid ende seide. Dit moet mi god doen ende dit moet hier mi toe doen of ic broot gesmaken sal ofte iet: al voer der sonnen onderganc.

36

Ende al tvolc hoerdet: ende hem genoghedet al wel dat die coninc dede in des volcs aenscouwen.

37

Ende al tvolc bekende ende al israhel in dien daghe: dattet vanden coninc niet gedaen en was datmen abner ners sone doden soude.

38

Ende die coninc seide tot sinen knapen En weetti niet dat huden een prince ende alten groten man geuallen is in israhel?

39

Want ic bin noch een teder gheconsacreerden coninc Mer dese mannen seruien sonen sijn mij te hart. Die here moet ghelden den ghenen die quat duet na sine quaetheit.