Bible in duytsche (Delftse bijbel 1477)

§ Ca .ij.

1

HIer na ghinc dauid den here te rade ende seide. Sal ic nv optrecken in enighe stat van iuda? Ende die here seide tot hem. Trecke op. Ende dauid seide. Waer sal ic trecken? Ende hi antwoerde hem. In hebron

2

Dus trac

[p. *399]

dauid op ende sijn twe wiuen achynoem van israhel ende abygayl nabals wijf van carmelo:

3

ende dauid leide oec mit hem die mannen die mit hem waren: ende si woenden inden poerten van hebron.

4

Ende die mannen van iuda quamen daer ende consacreerden dauid: dat hi regneren soude bouen thuus van iuda. Ende dauid wort geboetscapt: dat die mannen van iabes in galaad saul begrauen hadden.

5

Hier om sant dauid boden ten mannen van iabes in galaad: ende seide tot hem. Ghebenedijt soe moetti wesen den here die dese ontfermicheit hebt gedaen mit saul uwen here: ende hebten begrauen.

6

Ende nv sal v die here ghelden die ontfermherticheit ende die waerheit: mer ic sal v ghelden danc om dat ghi dit ghedaen hebt.

7

Vwe handen worden vrome: ende weest kinder der starcheit. Want al is uwe here saul doot nochtan heeft mi thuus van iuda gheconsacreert te sinen behoef tot enen coninc.

8

Ende abner ners soen die maerscalc van sauls here. Hi nam hisboseth sauls soen ende leiden al om en tomme inden tenten:

9

ende hi maecten coninc bouen galaad ende bouen gethsuri ende bouen iesrahel ende bouen effraym ende bouen benyamin ende bouen al israhel.

10

Hijsboseth sauls soen was veertich iaer out doe hi begontste te regneren bouen israhel: ende regneerde twee iaer. Want thuys van iuda volgede alleen dauid

11

Ende tghetal vanden daghen dat dauid woende in hebron ende bouen thuus van iuda regneerde: dat was seuen iaer ende ses maenden.

12

Ende aber ners soen ende hijsboseths sauls soens kinder toghen vten tenten in gabaon:

13

ende ioab seruien soen ende dauids kinderen toghen oec wt. ende quamen hem te gemoete neuen die pissine in gabaon. Ende doe si vergadert waren: so saten si die ene iegen die ander: dese in die een side der pissinen ende die gene in die ander side

14

Ende abner seide tot ioab. Die kinderen staen op: ende spelen voer ons Ende ioab antwoerde. Sij staen op.

15

Doe stonden op van ghetale twaelf van benyamin yboseths pertyen ende ginghen ouer. Ende twaelf van dauids kinderen.

16

Ende elc begreep sijns veynoets hooft ende stac tswaert in sijn ieghen mans zide: ende si vielen te gader. Ende der naem vander stat wort gheheten. der stouter acker in gabaon.

17

Ende in dien dage wort die strijt hart ghenoech: ende abner ende sijn mannen worden wech gheiaghet van dauids kinderen.

18

Want daer waren drie seruien sonen ioab ende abysay ende asahel Ende asahel was enen alten snellen loper: ghelijc een vanden ree die inden bussche wonen.

19

Ende asahel volchde abner na: ende hi en keerde hem niet of ter rechterhant noch ter slinckerhant. noch en liet niet abner na te volghen

20

Ende abner sach achter hem. ende seide. Bistu asahel? Hi antwoerde. Ic bint

21

Ende abner seide. ganc ter rechterhant of ter slinckerhant ende vangt een vanden ionghelinghen: ende neem dinen roef. Mer asahel en wouts niet laten: hi en volghede hem na.

22

Ende echter sprac abner tot asahel. Ganc

[p. *400]

wech en wilt mi niet volghen: dat ic niet en worde bedwonghen di in die aerde te naghelen: ende dat ic dan niet en sal mogen mijn aensichte opheffen te ioab dinen brueder waert:

23

ende asahel veronwaerdet te horen ende en wilde niet afkeren. Daer om stacken abner mitten auerechten spere in sijn gemachte ende hi doerstacken: ende hi bleef doot in die selue stat. Ende alle die gene die leden neven die stat daer asahel geuallen was: ende doot lach sij bleuen staende.

24

Ende doe ioab ende abysay volgheden abner die vloe: so ginc die sonne onder. Ende si quamen totten houele condute: die ieghen die valeye ende den weghe vander wildernissen is in gabaon

25

Ende benyamins kinderen vergaderden tot abner: ende si stonden opten top van enen berge te gader gehoept in ene betaelgie.

26

Ende abner riep tot ioab: ende seide. Sal dijn spere verwoeden totter wildernissen? En weetstu niet dat wanhope vreselic is? In hoe lange en segstu den volke niet dat hi laet sine brueders na te volghen?

27

Ende ioab seide. Leeft die here: hadstu vroger ghesproken soe hadde tvolc wech ghegaen ende niet sinen brueders geuolghet

28

Hier om so blies ioab mitten trompet ende al theer stont: ende si en volgheden niet meer israhel na: noch en streden.

29

Ende abner ende sine mannen ghinghen wech alle die nacht doer die campaengen van moab ende si togen ouer die iordaen: ende als si al bethoren omgegaen hadden soe quamen si ten tenten.

30

Ende doe ioab liet abner te volgen soe vergaderde hi weder alle tvolc: ende van dauids kinderen ghebraken negentien mannen al sonder asahel.

31

Mer dauids knapen sloghen van benyamin ende vanden mannen die mit abner waren. drie hondert ende tsestich: die doot bleuen.

32

Ende sij droghen asahel: ende si grouen in sijns vaders gracht in bethleem. Ende ioab ende die mannen die mit hem waren wanderden alden nachte: ende in die dageraet quamen si in hebron