Bible in duytsche (Delftse bijbel 1477)

§ Capittel I

1

ENde het geschiede na dat saul doot was dat dauid weder keerde van amalechs gheslachte: ende dat hij twe daghe geduerde in Sycelech.

2

Ende ten derden daghe openbaerde een man comende wt sauls tenten mit gheschoerden clederen: ende mit ghemulle opt hooft gespreyt. Ende doe hi te dauid comen was so viele hi op sijn aensichte: ende aenbeden:

3

ende dauid seide tot hem Wanen coemstu? Ende hi seide hem. Ic bin gevlouwen vten tenten van israhel.

4

Ende dauid seide tot hem wat woert ist datter gesciet is segt mi. Hi seide. tvolc vloe vanden stride: ende veel vanden volke sijn daer geuallen ende doot bleuen ende oeck saul ende ionathas zijn soen sijn ghestoruen.

5

Ende dauid seide totten ionghelinc die daer boetscapte Waer bi weetstu dat saul ende sijn sonen doot sijn?

6

Ende die iongelinc diet hem boetscapte seide. Bij auenture quam ic inden berch gelboe. ende saul sach ende leende op sijne spere. Ende die wagenen ende die gheredenen quamen hem ane:

7

ende hi keerde hem omme. doe hi mi sach so riep hi mi. Ende doe ic hem geantwoert had. ic bin hier:

8

soe seide hi mi. Wie bistu? Ende ic seide tot hem. Ic bin een man van amalech

[p. *398]

9

Ende hi seide. Stant op mi. ende steect mi doot want die pinen houden mij ende mijne ziele is noch in mi.

10

Ende ic stont op hem. ende sloech hem doot. Want ic wiste wel dat hi niet en hadde moghen leuen na desen valle. Ende ic nam die crone die op sijn hoeft was ende die armille van sinen arme: ende ic hebse ghebracht hier te di minen here.

11

Ende dauid begreep sine cledere ende scuerdese. ende alle die mannen die mit hem waren:

12

ende si weenden ende screyden ende vasteden totten auonde op saul ende ionathan sijn soen ende op sheren volke ende op thuys van israhel: om dat si mitten zwaerde gheuallen waren.

13

Ende dauid seide totten ionghelinc diet hem geboetscaop hadde. Wanen bistu? Hij antwoerde. Ic bin een toecomelinc eens mans van amalechs sone.

14

Ende dauid seide hem. Waer om en ontsagestu di niet dijn hant te steken om sheren ghecroende coninc te doden?

15

Ende dauid riep voert enen van sinen kinderen ende seide Gaet voert ende val ieghen hem. Ende die sloech hem: ende hij is doet

16

Ende dauid seide tot hem. Dijn bluet op dijn hoeft. Want dijn mont heeft ieghen di seluen ghesproken ende geseit. ic heb sheren gheconsacreerden coninc ghedoot.

17

Ende dauid weende aldusdanich gewene op saul ende op ionathan sinen sone:

18

ende hi gheboot dat si den kinderen van iuda die weninghe leren souden also inder rechter boeck gescreuen is ende seide.

19

Mercke israhel op die ghene die doot sijn: op die hoecheden. die voerbare van israhel worden gewont ende ghedoot op dine berghe hoe gheuielen si?

20

En wil niet boetscappen in geth. noch en boetscapt niet in die wechsceidinge van ascalon: dattie dochteren vanden philistijm niet en verbliden: dattie onbesneden dochteren niet en vervrouwen. Berghe van gelboe noch reghen noch douwe. en moet op v niet comen. Ende daer en moet niet sijn ackers van voertbarigen vruchten.

21

want daer wort die starcke schilt af geworpen: sauls schilt als ofte hi niet en was ghesaluet mit olyen vander ghedoder bluede vander starcker ruete. Ionathas gescutte en keerde niet achterwaert: ende sauls zwaert en keerde noyt ydelic weder Saul ende ionathas waren minlic ende schoen in haren leuen:

22

in die doot en waren si niet gescheiden Snelre dan die aern: ende starcker dan libaerde.

23

Gi sonen van israhel weent op saul die v cleden mit roden clederen in weeldicheden: ende die v te uwer cyerheit gaf gulden iuweele.

24

Hoe geuielen die starcke inden stride. Ionathas is in dinen hoecheit gedoot.

25

Brueder mijn ionathas sere schone: ende minlic bouen der vrouwen minne ic hebbe rouwe om di.

26

Gelijc dat een moeder haren enighen soen mint: so minde ic di.

27

Hoe gheuielen die vrome: ende verdoruen die vechtende wapen