Bible in duytsche (Delftse bijbel 1477)

§ Ca .xxx

1

ENde ten derden dage als dauid ende sijn mannen comen waren in sycelech. Soe hadden die van amalech een reyse ghedaen vander zuutziden in sycelech: ende hadden sycelech ghesleghen ende haddent verbrant mitten vyere.

2

Ende si hadden daer wtgeleit gheuanghen wiue ende vanden meesten totten minsten: ende si en hadden daer nyemant doot gheslegen: mer si haddense mit haer gheleit ende waren henen haers weghes.

3

Ende doe dauid ende sijn mannen dus quamen ter stat ende sijse verbrant vonden ende dat haer wiuen ende haer sonen ende haer dochteren gheuanghen gheleit waren:

4

soe hief dauid ende sijn volc dat mit hem was haer stemmen op: ende weenden tot dat die tranen in hem ghebraken.

5

Want dauids twe wiuen waren oec geuangen gheleit: achynoem van israhel. ende abygayl nabals wijf van carmelo.

6

Ende dauid wort seer besericht. Want tvolc woude hem stenen: want elcs mans ziele was bittere om sine sone ende om sine dochtere. Ende dauid wort gestarct inden here sinen god:

7

ende hij seide tot abyathar den pape achymelechs soen. Brenct tot mi die ephod. Ende abyathar brochte die ephod tot dauid.

8

Ende dauid ghinc den here te rade ende seide. Sal ic desen rouers nauolgen ofte en sal ic ende sal icse verhalen? Ende die here seide. volch hem na: want sonder twiuel sultstuse vaen: ende sult den roef bescudden.

9

Dus ginc dauid wech ende die ses hondert mannen die mit hem waren ende si quamen totter vluet besor: ende enige die moede waren bleuen daer.

10

Ende dauid volgede hem na: hij ende vier hondert mannen mit hem: want twe hondert wasser achter bleuen: die van moetheden ouer die vluet besor niet liden en mochten

11

Ende sij vonden enen man opt velt van egipten. ende si brachten tot dauid. Ende si gauen hem broot dat hi eten soude ende drincken borne:

12

ende si gauen hem een stuc van een cluyt vighen ende twe druuen rasinen. Ende doe hi ghegheten hadde so keerde sijn ziele weder: ende hi verquam. Want hi en hadde broot gegeten noch born ghedroncken: in drien daghen noch in drien nachten.

13

Ende dauid seide hem Wie bistu ende van waer. ofte warwaert gaetstu? Hij seide. Ic bin een kint van egipten eens mans van amalechs knapen. Want mijn here liet mi achter: want ic begontste eergisteren sieck te worden.

14

Want wi braken wt ter zuutziden van cerethi. ende iegen iudam ende ten zuden van caleph: ende sycelech hebben wi gebrant mitten vyere.

15

Ende dauid seide hem sultstu mij moghen leiden in desen hope? Hi seide. Zwere mi bij gode. dattu mi niet doden en sultste. ende dattu mi in mijns heren hant niet leueren en sultste: ende ic sal di in desen hope leide. Ende dauid swoert hem

16

Ende als hi hem gheleit had. siet so saten die ende aten al op die aerde:

[p. *396]

si aten ende si droncken als of si enen feesteliken dach vierden. ouer alle die proie ende den roef dien si geroeft hadden vten lande vanden philistijm: ende vten lande van iuda.

17

Ende dauid sloechse van tsauonts tot tsauonts vanden anderen daghe: ende niet vam hem en ontghinc sonder vier hondert mannen ionghinghen die op kemels ghespronghen waren ende wech ghevlouwen.

18

Dus verloste dauid alle dat die van amalech geroeft hadden: ende hi verloste sijn twee wiuen.

19

Ende niet en ghebrac hem vanden groten totten cleynen beide van sonen ende van dochteren ende van roue: ende so wat dat si gheroeft hadden alle bracht dauid weder:

20

ende hi bracht alle die cudden ende tvee ende hi dreefse voer sijn aensichte. Ende si seiden. Dits dauids roef.

21

Ende dauid quam totten twee hondert mannen die moede achterbleuen waren ende si en mochten dauid niet volghen: ende hi hadse heten sitten inder vluet besor. Ende si toghen wt dauid te ghemoete: ende den volke dat mit hem was. Ende doe dauid te desen volke quam: so gruete hijse mit paeyseliken woerden.

22

Ende enen alten quaden man ende ongherechtich die mit dauid was antwoerde vanden mannen ende seide. Om dat si mit ons niet en quamen so en sullen wi hem niet geuen vanden roue die wi verlost hebben mer elken is ghenoech sijn wijf ende sijn kinderen: ende als si die ontfaen hebben. soe gaen si wech.

23

Mer dauid seide. Ghi en sult alsoe niet doen van dien dat ons die here gheleuert heeft ende die ons behoet heeft: ende die in onsen handen ghegheuen heeft die rouers die wtghetoghen waren iegen ons:

24

ende nyeman en hore v op dese redene. Want effen gelijc dese sal wesen des gheens die te stride gaet ende des gheens die bider vitaelge blijft: ende so hebben ghelike delen.

25

Ende van dien dage soe wort dat gheset ende geordineert ende voertane als een wet in israhel: al tot desen daghen toe.

26

Dus quam dauid in sycelech: ende hij sant ghiften vanden roue den ouders van iuda sinen naesten ende seide. Ontfaet benedictie van sheren vianden roue.

27

Den ghenen dic waren in bethel. ende in ramoth ten suden: ende die waren in gether.

28

ende in aroer ende die waren in sephamoth. ende in estama

29

ende in rachal ende die waren inden poorten van iheramel ende van cheni.

30

ende die waren in rama. ende inden kule asan ende die waren in athach

31

ende die waren in ebron: ende den anderen die waren inden steden daer dauid ende sine mannen in ghewoent hadden