Bible in duytsche (Delftse bijbel 1477)

§ Ca xxix

1

ALle der philistijm scare vergaderde dus in apher. Ende israhel sloech oec tenten op die fonteyne die in ysrahel was.

2

Ende die baroene vanden philistijm ghinghen inden hondert heren ende inden dusentighen: ende dauid ende sine mannen waren in die achterste scare mit achis.

3

Ende die princen vanden philistijm seiden tot achis. Wat willen dese hebreeusche? Ende achis seide totten princen vanden philistijm. En kendi niet dauid die saul sconincs van israhels knape was. ende dat hi mit mi is vele daghen of iaren? Ende ic en heb niet in hem gevonden van alle dien daghen dat hi tot mi gevlouwen is: tot in desen daghe.

4

Ende die princen vanden philistinen worden gram ieghen achis: ende seiden hem. Die man kere weder dat hij sitte in sine stat daerstu hem geset hebste: ende hi en come met ons te stride niet neder: dat hi ons niet ieghen en worde als wi beginnen te striden. Want hoe sal hi anders moghen sinen here ghepaeysen:

5

sonder in onsen hoefden? En is dit dauid niet die si in die reye songhen: ende seiden saul sloech dusent in sinen dusentigen ende dauid tien dusent in sinen dusentighen?

6

Hier om riep achis dauid: ende seide hem. Leeft die here soe bistu guet ende gherechtich in minen aenscouwen ende dijn wtganc ende dijn inganc is mit mi inden ghetelden. ende ic en heb niet quaets in di gevonden. van die daghe dattu te mi comen biste tot in desen daghe: mer du en ghenoechste den baronen niet.

7

Daer om keer weder ende ganc in paeyse: ende en verbelghe der barone aensichte vanden philistinen niet.

8

Ende dauid seide tot achis Wat hebbe ic nv ghedaen: ende wat hebstu gheuonden in dinen knechte van dien daghe dat ic in dijn aenscouwen heb gheweest tot in desen daghe. dat ic niet comen en mach ieghen sconincs mijns heren viande?

9

Ende achis antwoerde. ende seide tot dauid. Ic weet dattu guet biste in minen oghen ghelijc sheren enghel: mer die princen van den philistinen hebben gheseit Hi en sal niet mit ons optrecken inden strijt

10

Hier om ganc morgen vroe op du ende dijns heren knechte die mitti gecomen sijn: ende als ghi bi nachte sult sijn opghestaen ende het beghint te claren so

[p. *395]

tijt wech.

11

Ende aldus stont dauid op bij nachte ende sijn mannen: dat si vroech wech tiden souden ende wederkeren ter philistijm lant waert. Ende die philistinen toghen op in israhel