Bible in duytsche (Delftse bijbel 1477)

§ Ca .xxviij

1

IN dien daghen gheschiede dat die philistinen haer scaren vergaderden om dat si hem souden bereiden ten stride ieghen israhel. Ende achis seide tot dauid. Wetende sultstu nv weten: dattu mit mi wttrecken sultste inden ghetelden du ende dijn mannen

2

Ende dauid seide tot achis. Nv sultstu weten dat dijn knecht doen sal. Ende achis seide tot dauid. Ende tot allen daghen sal ic di setten wachter van minen houede.

3

Ende samuel starf ende al israhel beweenden: ende si grouenen in ramatha sine stat. Ende saul dede wech van den lande die waersaghers ende die gokelaers: ende hi dode die gene die phytone

[p. *393]

inden buyc hadden.

4

Ende die philistinen worden vergadert: ende quamen ende sloghen tenten in sunam. Ende saul vergaderde oec al israhel: ende hi quam in gelboe

5

ende saul sach der philistinen tenten ende hi ontsach hem: ende sijn herte versuchte sere.

6

Ende hi ghinc den here te rade: ende hi en antwoerde hem niet noch biden drome noch biden priesteren noch biden propheten.

7

Ende saul seide tot sinen knapen. Soect mi een wijf die een phitone heeft: ende ic sal tot haer gaen ende ic sal bi haer ondervragen Ende sijn knapen seiden tot hem. een wijf is in endor die enen phitone heeft

8

Saul verwandelde sijn abijt: ende hij dede ander cleder ane: ende hi ghinc wech ende twe mannen mit hem: ende si quamen totten wiue bi nachte. ende saul seide propheteert mi inden phitone: ende verwect mi. dien ic di segghen sal

9

Ende twijf seide tot hem. Sich du weetste wat saul ghedaen heeft: ende hoe hi ghedoot heeft vanden lande die waersagers ende die gokelaers. Waer om spietstu dan na mine ziele datmen mi doden sal?

10

Ende saul swoer haer inden here seggende leeft die here soe en sal di niets quaets gheschien om dese dinc.

11

Ende twijf seide hem Wie sal ic di vewecken? Ende hi seide verwecke mij samuel.

12

Ende doe twijf samuel ghesien hadde. so riep si mit groter stemmen: ende seide tot saul. Waer om hebtstuut mij anegheleit? Want du biste saul.

13

Ende die coninc seide haer. En wil niet ontsien. wat heuestu gesien? Ende twijf seide tot saul. Ic sach goden opcomen wtter aerden.

14

Ende saul seide: Hoedane was sijn macsele? Sij seide Een out man quammer op: ende hi was ghecleet mit enen mantele. Saul verstont dattet samuel was: ende hij neech hem neder op sijn aensichte op daerde: ende aenbeden.

15

Ende samuel seide tot saul Waer om hebtstu mi vermoeyt datmen mi verwecken soude? Ende saul seide Ic bin becringhelt. Want die philistinen vechten ieghen mi. ende god is van mi gegaen: ende hi en wil mi niet ghehoren inden propheten hant noch bi dromen Daer om heb ic di gheropen: dattu mij tonen soutste wat ic doen sal.

16

Ende samuel seide. Wat beuraechstu mi als die here van di gheschieden is. ende ouerghegaen te dien die du benijtste?

17

Ende die here sal di doen. also hi ghesproken heeft in mijn hant: ende hi sal trike van dijnre hant scorren. ende geuent dauid dinen naesten:

18

want du en waertste sheren woert niet ghehoersaem. noch du en daetste niet die gramscap sijns torens iegen amalech. Hier om heeft di die here huden ghedaen dattu ghedogheste:

19

ende die here sal oec mitti geuen israhel inder philistijm hande ende gi ende v sonen sullen morghen mit mi wesen: ende oec die tenten van israhel sal die here leueren inder philistinen handen.

20

Doe saul samuels woerden hoerde so viel hi te hant op die aerde Want hi ontsach samuels woerden ende ne ghene crachte en was in hem: want binnen allen dien daghe en hadde hij ne ghene broot ghegheten.

21

Ende twijf ghinc in tot saul. Want hij was seer

[p. *394]

ghestoert. Ende si seide tot hem. Sich dijn ioncwijf hoerde dijn stemme: ende ic heb mijn ziele in mine hant geset: ende ic hoerde dine redene die du tot mi gesproken hebtste

22

Nv daer om so hore oec dijns ioncwijfs redene: ende ic sal voer di legghen een stuc broots dattu etende gesont moechste werden ende dat gi wech gaen moecht.

23

Ende hi veronwaerdet ende seide ic en sal niet eten. Ende sijn knapen dwonghen hem ende dat wijf: ende ten lesten ghehoerde hi haer stemme ende stont op vander aerden: ende sat op een bedde.

24

Ende twijf had inden huse een mestende calf: en si haeste haer ende dodet. Ende si nam meel ende knedet ende biec derue broot:

25

ende settet voer saul ende voer sine knapen. Ende doe si ghegheten hadden soe stonden sij op: ende ghinghen alden nachte.