Bible in duytsche (Delftse bijbel 1477)

§ Capit .xxvij

1

ENde dauid ginc weder in sinen weghe: ende saul keerde weder in sine stat. Ende dauid seide in sijn herte. Machschien ic sal in enen daghe in sauls handen vallen. En ist niet beter dat ic vlie. ende ic behouden worde inder philistinen lant: op dat saul wanhope. ende dat hij mi laet te soken in al tlant van israhel? Hier om sal ic sinen handen vlien.

2

Ende dauid stont op: ende hi ghinc wech ende die ses hondert mannen mit hem tot achis maochs soen den coninc van geth.

3

Ende dauid woende mit achis in geth: ende hi ende sine mannen: ende sijn huus ende beide sijn wiuen: achinoem van israhel. ende abygayl nabals wijf van carmelo.

4

Ende het wort saul gheboetscapt dat dauid in geth gevlouwen was: ende hij en deder voertmeer niet meer tot hem te soken.

5

Ende dauid seide tot achis Of ic gracie in dinen oghen gheuonden hebbe: soe gheue men mi ene stat in enighen poorte van desen lantscepe dat ic daer wonen mach. Want waer om woent dijn knecht in sconincs stede mit di?

6

Ende in dien dage gaf hem achis sycelech. Ende om dese sake soe was sychelech der coninghe van iuda tot in dien daghe.

7

Ende tghetal vanden dagen dat dauid woende inder philistijm lant was vier maenden.

8

Ende dauid ende sine mannen toghen op: ende hadden roef van gesuri ende van gedri ende van dien van amalech. Want in ouden tiden so woendemen in die straten int lant: den ghenen die ghinghen te sur totten lande van egipten.

9

Ende dauid versloech al tlant ende hi en liet man noch wijf lenende: ende hi nam die scapen ende die coeyen ende die ezels ende die kemels ende die cleder ende hi keerde: ende quam tot achis.

10

Ende achis seide hem: Ieghen wien bistu huden geuallen? Ende dauid antwoerde. Ieghen tsuden van iuda ende ieghen tsuden van iheramel: ende ieghen tsuden van ceni.

11

Mer dauid en hielt manne noch wijf te liue. noch en brachtse niet in geth want hi seide: dat si machschien iegen ons niet en spreken Dit heeft dauid ghedaen Ende dat was sijn gebot tot allen daghen: dat hi woende inder philistijm lant.

12

Ende achis geloofde dauid ende seide. Hi heeft veel quaets ghedaen ieghen sijn volc van israhel: ende sal mi ewelic knape wesen.