Bible in duytsche (Delftse bijbel 1477)

§ Ca .xxvi

1

ENde die van ziphei quamen tot saul in gabaa. ende seiden Siet dauid is gheborghen inden berghe achille: die iegen die wildernisse is.

2

Ende saul stont op ende toech neder in die wildernisse van siph. ende mit hem drie dusent mannen wtuercoren van israhel: om dat si dauid soken souden inder wildernisse van siph

3

Ende saul sloech tenten in gabaa van achille: die ieghen die wildenisse was inden wech Ende dauid wanderde inder wildernisse. Ende doe hi sach dat saul na hem wtghetoghen was inder wildernisse:

4

soe sant hi spiers ende hi onderuant harde sekerlijc dat hi daer gecomen was.

5

Ende dauid stont op al heymelic ende hij quam ter stat daer saul was. Ende doe hi die stat besien had daer saul in sliep ende abner ners soen die maerscalc van sinen ridderscepe: ende daer saul sliep inder tenten ende tander volc al om en tomme hem:

6

soe seide dauid tot achymelech van etheun ende abisai seruien zoen ioabs brueder ende hi seide. Wie sal mit mi nedergaen tot saul inden tenten? Ende abysai seide. Ic salre mit v gaen.

7

Ende dauid ende abysai quamen snachts ten volke: ende si vonden saul ligghende ende slapende in sine tente. ende sijn spere in die aerde gesteken te sinen hoefden: ende abner ende alt volc slapende al om ende omme hem.

8

Ende abysai seide tot dauid. God heeft huden dinen viant besloten in dijn handen. Daer om sal icken nv eenwarf doersteken mitten spere tot in daerde: ende en sals anderwarf niet te doen sijn.

9

Ende dauid seide tot abysai. En steken niet doot Want wie sal sijn hant doen an sheren consacreerden coninc: ende ontschuldich wesen?

10

Ende dauid seide.

[p. *391]

Leeft die here: en sij datten die here slaet ofte dat sine dach come dat hij steruen moet. ofte dat hi nedergaet ten stride ende daer versleghen wort:

11

soe moet mij die here guedertieren wesen dat ic mijn hant niet doen en moet an sheren consacreeerden coninc Nu daer om neemt dat spere dat te sinen hoefden is ende den cop mitten watere ende laet ons wech gaen.

12

Ende dauid droech mit hem dat spere: ende die cop mitten water die tot sauls hoefden was: ende si ghinghen wech ende niemant en was diet sach ofte verstont ofte ontwaecte: mer si sliepen al: want sheren slape was op hem gheuallen.

13

Ende doe dauid daer ouergeleden was. ende hi ghestaen was opten top van enen berch ende een groot stuc tusschen hem was:

14

so riep dauid tot den volc ende tot abner ners soen ende seide Abner en sultstu niet antwoerden? Ende abner antwoerde ende seide. Wie bistu die daer roepste: ende die coninc onruste doets?

15

Ende dauid seide tot abner. En bistu niet enen man? Wie is anders dine gelike in israhel? Waer om en hebstu dan den here dinen coninc niet bewaert? Want een vter scaren is inghegaen: om den here dinen coninc te doden.

16

en is niet guet dattu gedaen hebste. Leeft die here soe sijt ghi lude kinderen der doot: die niet gewacht en hebt uwen here sheren consacreerden coninc. Daer om besich nv waer sconincs spere si: ende den cop mitten watere dier te sinen hoefde was.

17

Ende saul bekende dauids stemme: ende seide. Dauid sone mijn: is dit dijn stemme niet? Dauid seide. Het is mijn stemme here mijn coninc ende seide.

18

Om wat saken volget mijn here die coninc sinen knecht na? Wat heb ic gedaen: ofte wat quade is in mijn hant?

19

Nv hier om bid ic here coninc mijn hore dijns knechts woerde. Ist dat dij die here porret ieghen mi: so doemen die sacrificie ruken. Mer doent der menschen kinderen: so sijn si vermaledijt in sheren aenscouwen die mi huden verdreuen hebben dat ic niet wonen en mach in sheren erfachticheit. ende die mi segghen: ganc ende diene vreemde goden

20

Ende nv en moetmen mijn bluet niet wtstorten inder aerden voerden here: want die coninc van israhel is wt gecomen om ene vloe te sokene alsoe men een pertrile nauolghet int gheberchte

21

Ende saul seide. Ic hebbe misdaen. Keert weder sone mijn dauid. Want ic en saldi voertane gheen quaet doen: om dat mine ziele preciose gheweest heeft huden in dinen ogen. Het is openbaer dat ic sottelijc gedaen heb: ende dat ic sere vele dingen niet weten en wil.

22

Ende dauid antwoerde ende seide Siet hier sconincs spere: comme ouer een van sconincs kindere ende haeltse.

23

Mer die here moet elken ghelden. na sine gherechticheit ende sine trouwe. Want die here die leuerde di huden in mine hant: ende ic en wilde mine hant niet opheffen ieghen sheren consacreerden coninc

24

Ende ghelijc dat dine ziele huden verheuen is in minen oghen: so moet mine ziele verheuen wesen in sheren ogeni: ende hij moet mi verlossen van allen

[p. *392]

vernoeyen.

25

Ende saul seide tot dauid Ghebenedijt soe moetstu wesen sone mijn dauid Want doende sultstu doen. Ende moghende sultstu vermoghen.