Bible in duytsche (Delftse bijbel 1477)

§ Capittel.xxij

1

VAn daer ghinc dauid: ende vloe in die speluncke edolla. Ende doe dat sijn brueders ende alle sijns vaders huus ghehoert hadden so quamen sij daer tot hem.

2

Ende tot hem qamen alle die ghene die in vernoeye waren. ende mit vreemden heren bedwonghen waren ende bitter van herten: ende hij wort haer prince. Ende mit hem waren omtrent vier hondert man.

3

Ende dauid tide van daer in masphat: die in moab is. Ende hij seide totten coninc van moab. Ic bidde dat mijn vader ende mijn moeder mit v bliuen moghen: tot dat ic weten sal wat mi god doen sal.

4

Ende hij lietse voer sconincs van moabs aensichte. Ende si waren mit hem alle die daghe dat dauid was in dolenden steden.

5

Ende gad die prophete seide tot dauid. En wilt niet bliuen in dolenden steden. Tide wech ende ganc in tlant van iudea. Ende dauid tide wech: ende quam inden bussche areth.

6

Ende saul hoerde dat dauid geopenbaert was: ende die mannen die mit hem waren Ende doe saul in gabaa woende ende hi was inden bussche die in rama is. ende hi een spere in die hant hadde. ende alle sine knapen omtrent hem stonden.

7

so seide hi tot sinen knapen die bi hem stonden. Ghi gemini sonen hoert mij nv. Sal ysay soen v allen gheuen ackers ende wijngaerden ende sal hi v allen maken dusent heren:

8

dat ghij alle tegader ghesworen hebt tegen mij. ende niemant en is diet mi seit. sonderlinge om dat mijn soen belofte ghemaect heeft met ysay soen? Nieman en is van v luden die mine sake besericht. noch diet mi seit: om dat mine sone mine knechte ieghen mi geporret heeft die van mi spiet tot huden.

9

Ende doech van ydumea die daer bi stont. ende die eerste was onder sauls knapen: hi antwoerde ende seide: ic sach ysay soen in nobe. tot achimelech spapen achytobs soen

10

Ende hi ghinc den here te rade om sinen wille: ende hi gaf hem spise. Ende oec gaf hij hem goliath des philistijns zwaert.

11

Hier om sant den coninc om achimelech den pape achytobs zoen te halen: ende om alle sijn vader huus der papen die in nobe waren. Ende si quamen alle totten coninc.

12

Ende saul seide tot

[p. *384]

Achimelech. Hore achitobs zoen. Ende hi antwoerde. Ic bins ghereet here.

13

Ende saul seide tot hem. Waer om hebdi tsamen ghesworen ieghen mi du ende ysay soen. ende du gaueste hem broden ende een zwaert. ende gincste om sinen wille den here te rade: dat hi ieghen mij verrisen soude ende geduert verrader tot huden?

14

Ende achimelech antwoerde den coninc ende seide. Ende wie is in alle dine knapen ghetrouwe als dauid ende sconincs behuwede soen die tidende is sconincs ghebode: ende glorioes in dijn huys?

15

Begontste ic huden ouer hem den here te rade te gaen? Dies en moet mi niet gheschien. Die coninc en vermoede dusdane dinc niet ieghen sinen knecht: in al mijns vaders huys Want dinen knecht en wiste van desen saken: cleyn noch groot.

16

Ende die coninc seide. Achimelech du sultste die doot steruen: du ende al dijns vaders huus.

17

Ende die coninc seide totten sarianten die omtrent hem stonden. Keert v omme: ende slaet doot sheren papen Want haer hant is mit dauid: want sij wistent dat hij vloe ende si en ontbodent mi niet. Mer sconincs knapen en wouden haer hant niet doen an sheren papen.

18

Ende die coninc seide tot doech. Kere du di omme: ende valle in sheren papen. Ende doech van ydumea keerde hem omme ende viel in sheren papen: ende hi sloech doot op dien dach vijf ende tachtich mannen die ghecleet waren met den linen ephod.

19

Ende hi sloech in zwaerts mont nobe der papen stede: man ende wijue ende cleyne kinderen ende diemen soecte. coeyen ende ezels ende die scapen in zwaerts mont.

20

Ende een van achimelech achitobs sonen ontghinc. wies name was abyathar. ende hi vloe tot dauid

21

ende hi seide hem dat saul sheren papen gedoot hadde.

22

Ende dauid seide tot abyathar. Ic wiste in dien daghe: doe daer was doech van ydumea. dat hijt sonder twiuel saul seggen soude. Ic bin sculdich van al dijns vaders sielen.

23

Blijf mit mi: ende en ontsich niet. So wie mine ziele soken sal hi sal oec die dijne sokeu: ende du sultste mit mi worden behouden.