Bible in duytsche (Delftse bijbel 1477)

Capit .xx

1

ENde david vloe van nayoth. dat in ramatha is: ende hi quam ende sprac voer ionatha. Wat heb ic ghedaen? Wat is mijn quaetheit. ende wat is mijn sonde ieghen dinen vader dat hi mine ziele soect?

2

Ionathas seide hem. Dat en sal niet geschien: du en sultste niet steruen. Want mijn vader en sal niet groots noch cleyns doen: hi en salt mi te voren segghen. Want dese reden allene heeft mi

[p. *380]

mine vader vertelt. Dit en sal niet wesen.

3

Ende hij zwoer dauid echter. Ende dauid seide. Voerwaer weet dijn vader dat ic in dinen ogen gracie gevonden heb. ende hi sal segghen. Dit en mach ionathas niet weten: dat hij machschien niet en worde besericht. Want waerlic leeft die here ende leeft dine ziele: want op een graet allene also ic seggen mach so worden wi gescheiden die doot ende ic.

4

Ende ionathas seide tot dauid. So wat dat mij dijn ziele seggen sal. dat sal ic di doen

5

Ende dauid seide tot ionathas. Sich morghen so sijn calenden: ende na castumen so pleghe ic te sitten ten eten neuen den coninc. Daer om laet mi dat ic mi berghen mach inden ackere: totten auonde vanden derden dage.

6

Ende ist dat dijn vader besiet ende na mij vraghet: so sultstu hem antwoerden. Dauid bat mi dat hij haestelijc gaen mochte in beethleem sijn poort: want alle sijn magen sijn daer hoechlic totter offerhande.

7

Ist dat dijn vader seit wel: soe sal dinen knecht te paeyse wesen Mer ist dat hi gram wort so sultstu weten dat sijn quaetheit voldaen is.

8

Daer om doch ontfermicheit mit dinen knecht: want du heues mi dijnen knecht sheren belofte mit di doen angaen. Mer is in mi enighe quaetheit: so slach du mi doot: ende en brenct mi niet te dinen vader.

9

Ende ionathas seide. Dat en moet mi niet ghevallen want ten mach mi niet gheschien ist dat ic waerlic bekennen mach dat mijns vaders quaetheit iegen di voldaen sal sijn: ic en salt di laten weten.

10

Ende dauid seide tot ionathan. Wie salt mij boetsappen: ofte di dijn vader yet hardelic antwoerden sal van mi?

11

Ende ionathas seide tot david. com ende gae wij wt in desen acker. Ende doe si beide wt ghegaen waren inden acker:

12

soe seide ionathas tot dauid. Here god van israhel of ic ghewaer worden mach mijns vaders sentencie morghen ofte ouermorghen ende yets guets wesen sal op dauid. ende en seide ict te hant te di niet ende duet di te weten:

13

soe moet god ionathan doen ende dit daer toe doen Mer ist dat mijns vaders quaetheit duert ieghen di: soe sal ict dijnre oren doen te weten ende ic sal di laten dattu in paeyse gaen sultste ende die here moet metti wesen alsoe hi mit minen vader was.

14

Ende ist dat ic blijue leuende. So sultstu in mi sheren ontfermherticheit doen: mer ist dat ic doot sal sijn:

15

soe en sulstu nemmermeer ontfermherticheit afdoen van minen huyse Ist dat ic dit niet en doe. als die here sal verderuen dauids viande vanden lande elken sonderlinghe: soe moet hi ionathan afdoen van sinen huse: ende dit moet die here versoken van dauids vianden hant.

16

Aldus maecte ionathas belofte mit dauids huus.

17

Ende ionathas deder noch meer toe dauid vaster te bezweren: om dat hi hem minde. Want hi minden als sijn selfs ziele.

18

Ende ionathas seide tot dauid. Morgen sijnt kalenden: ende om di sal worden ghevraecht. Want men sal om dine sittene vraghen tot ouermorgen.

19

Daer om

[p. *381]

sultstu haestelic nedercomen ende sultste comen in die stat daer du di bergen sultste. inden daghe datmen wercken mach: ende du sultste sitten neuens den stene. wies name ezel is.

20

Ende ic salre drie scutten neuen schieten ende ic sal scieten als of ic mi gaue te enen teyken

21

Ende ic salre oec een kint senden: ende segghen hem Ganc ende brenct mij die ghescutte. Seg ic den kinde. die ghescutten sijn binnen di trectse wt: so coemt du te mi want soe is die paeys ende niet quaets en is: leeft die here.

22

Mer segghe ic aldus den kinde. sich die ghescutten sijn ouer di: so ganc in vreden want die here heeft di ghelaten.

23

Mer van dien woerden dat wi ghesproken hebben ic ende du: soe moet die here tusschen mi ende v ewelic wesen.

24

Dus berch hem dauid inden ackere: ende die kalenden quamen: ende die coninc sat om broot te eten.

25

Ende doe die coninc op sinen zetel gheseten was die neuen die want was: na castume so stont ionathas op ende abner sat an des conincs zide. ende dauids stede openbaerde ydel:

26

ende saul en spracker niet of binnen dien daghe. Want hi pensede dat hem yet gheschiet was. dat hi niet suuer noch ghesuuert en was.

27

Ende doe die anderde dach comen was na die kalende: soe openbaerde echter dauids stat ydel. Ende saul seide tot ionathan sinen soen. Waer om en is ysay zoen niet comen eten ghisteren noch huden?

28

Ende ionathas antwoerde. Hi bat mij sere dat hi mochte gaen in bethleem ende seide.

29

Laet mi gaen: want een grote sacrificie is in mijn stede: een van minen brueders is om mi comen. Nu dan ofte ic gracie ghevonden hebbe in dinen oghen: so sal ik vollic gaen ende besien minen brueders. Om dese sake. en is hij tot des conincx tafele niet gecomen.

30

Ende saul wort gram ieghen ionathan: ende seide. Eens wijfs zoen die al willens een man gherooft heeft. En weet ic niet dattu te dinen scande minste ysay soen. ende ter scanden van dijnre lachterliker moeder?

31

Want binnen allen den daghen dat ysay soen leuen sal op aertrike: so en sultstu niet ghestadich worden noch dijn rike. Ende hierom sende hem nv te hant ende brenghen mi: want hi is een soen ter doot.

32

Ende ionatas antwoerde saul ende seide sinen vader. waer om sal hi steruen wat heuet hi gedaen

33

ende saul begreep een speer om ionathas te steken Ende ionathas verstont: dat van sinen vader ghemict was. dat hij dauid doden soude.

34

Ende ionathas stont op vander tafelen in gramscepen van toren: ende opten anderen dach vanden kalenden so en at hi ne ghene broot. Want hij wort bezeericht om dauids wille: om datten sijn vader verbolgen had.

35

Ende doe die ander dach verclaert was soe quam ionathas inden acker also hi dauid ghelooft hadde: ende een cleyn kint mit hem.

36

Ende hi seide tot sinen kinde. Ganc ende brenct mi die ghescutten: die ic schiete. Ende doe tkint ghlopen was: so scoot hi een ander gescut ouer tkint

37

Ende tkint quam ter stat daer tgheschut was: dat ionathas ghescoten had Ende ionathas riep achters skints rug-

[p. *382]

ghe ende seide. sich daer is een gescut ouer di.

38

Ende ionathas riep noch achters kints rugge ende seide. Haesti snellicke: ende en stant niet. Ende tkint vergaderde ionathas gescutten. ende brachtse te sinen here:

39

ende en wiste al bedalle niet wat dit bediede. Want ionathas ende dauid wisten allene dese dinc.

40

Doe gaf ionathas den kinde sine wapene: ende seide hem. Ganc ende dragese in die stat.

41

Ende doe tkint wech ghegaen was so stont dauid op vander stat die ten zuden waert leit: ende hij viel lancs op die aerde. ende aenbede derdewarf. Ende si custen dene den ander. ende weenden te gader: mer dauid weende meest.

42

Ende ionathan seide tot dauid. Ganc in paeyse. So wat wi beide ghesworen hebben in sheren name. ende geseit: die here moet zijn tusschen mi ende di. ende tusschen dijn saet ende mijn saet tot inder ewicheit.

43

Ende dauid stont op ende ghinc wech ende ionathas keerde oec weder in die stat.