Bible in duytsche (Delftse bijbel 1477)

§ Capitte .xviij

1

HEt geschiede als dauid voldaen hadde te spreken tot saul. so wort ionathas ziele mit dauids ziele gheknocht. ende ionathas minden als sijns selfs ziele.

2

Ende saul nammen in dien daghe: ende hi en gheoerloefde hem niet dat hi wederkeren soude in sijns vaders huus.

3

Ende ionathas ende dauid aenghinghen belofte. Want hij minden als sijns selfs ziele.

4

Want ionathas dede wt sijn rocke daer hi me-

[p. *377]

de ghecleet was. ende gaffen dauid: ende sine andere cledre. tot sinen zwaerde ende tot sinen boghe. ende tot sinen gordele.

5

Ende dauid ghinc oec wt te alle dien daere hem saul toe sant: ende hi had hem wijselike: ende saul setten bouen die mannen vanden stride: ende hij was bequaem in al tvolcs oghen: ende sonderlinge in sauls knapen aenscouwen.

6

Ende doen davuid wederkeerde ende hi den philistinen versleghen hadde: ende hi sijn hooft draghen soude in iherusalem: soe quamen die wiuen. wt al dien poorten van israhel. al singhende. ende die reye leidende in sconincs sauls ghemoete met tamburen ter blijscap ende met cysteren:

7

ende die wiuen songen voer al spelende: ende seiden: saul heeft dusent versleghen: ende dauid thien dusent.

8

Ende die coninc saul wort seer gram: ende dese reden was ongenoechlic in sijnen oghen Ende hi seide Si hebbenre dauid tien dusent ghegheuen: ende si hebbenre mij dusent ghegeuen Wat gebreect hem sonder dat riijcke allene?

9

Hier om so aensach hi dauid niet mere mitten rechter oge van dien daghe ende voertan.

10

Ende naden anderen dach soe viel gods quade gheest in saul: ende hij propheteerde int midden sijns huus. Ende dauid speelde met sijnre hant: also hi elcs dages dede Ende saul hilt een speer

11

ende schoetse: ende waende dauid naghelen aen die want. Ende dauid keerde van sauls aensichte anderwarf.

12

Ende saul ontsach dauid: om dat die here mit hem was. ende om dat hi van hem gegaen was.

13

Dus deden saul van hem: ende hi maecten tribune van dusent mannen Ende dauid trac wt. ende quam in iudas volcs aenscouwen.

14

Ende dauid had hem oec wijselic in al sijn weghen: ende die here was mit hem.

15

Ende saul sach dat hi seer wijs was: ende hi begontste hem van dauid te wachten.

16

Want al israhel ende iuda minde dauid. Want hij trac wt ende trac in voer hem.

17

Ende saul seide tot dauid. Sich merob mijn meeste dochter. ic salse di gheuen te wiue: allene wes een starck man. ende vechte sheren stride. Want saul micte ende seide. Mijn hant en sal in hem niet sijn Mer die philistijm hant moet op hem sijn.

18

Ende dauid seide tot saul. Wie bin ic. ofte wats mijn leuen: ofte mijns vaders maechscap in israhel. dat ic sconincs behuwede soen werden sal?

19

Ende die tijt quam datmen dauid soude geuen merob sauls dochter. ende men gafse te wiue hadriel van molathy.

20

Ende dauid minde mychol sauls ander dochter. Ende het wort saul gheseit: ende het was hem lief.

21

Ende saul seide: Ic salse hem gheuen: datse hem te schanden werden moet: ende datter philistijm hant op hem wesen moet. Daer om seide saul tot dauid. Du sultste huden in twe dinghen mijn behuwede soen wesen.

22

Ende saul beual sinen knapen. Spreect al heimelic van mi tot dauid: ende segt. Du ghenoechste den coninc: ende alle sine knapen minnen di. Nu sultste daer om wesen des conincs behuwede soen.

23

Ende sauls knapen spraken in dauids oren: alle dese

[p. *378]

woerden. Ende dauid seide. Dincket v een cleyn dinc wesen: dat ic sconins behuwede soen bin? Want ic bin een arm man. ende mate.

24

Ende die knapen boetscaptent saul ende seiden Dusdanighe woerden sprac dauid.

25

Ende saul seide. Aldus suldi spreken tot dauid Die coninc en heeft gheen noot van bruutghiften. sonder allene van hondert philisijm die ouersloue van hare manlicheit: dat wrake hem geschie van sconincs vianden. Want saul gedachte dauid te leueren inder philistijm handen.

26

Ende doe sijn knapen dauid geseit hadden. die woerden die saul gesproken hadde: so ghenoechde dese redene in dauids oghen. dat hi sconincs behuwede soen werden soude.

27

Ende na luttel dagen ston dauid op: ende ghinc wech als tot akers mitten mannen die met hem waren. ende versloech vanden philitijm twe hondert mannen. ende hi brachte haer ouerslouen. ende hi teldese den coninc: om dat hi sijn behuwede soen sijn soude. Ende saul gaf hem mychol sijnre dochter te wiue.

28

Ende saul sach ende verstont dat die here mit dauid was. Ende mychol sauls dochter minde dauid.

29

Ende saul begontste dauid meer te ontsien. Ende saul wort dauids viant: tallen dagen

30

Ende die princen vanden philistijm quamen weder Want vanden beghinsel dat si wt quamen. soe had hem david wiseliker. dan al sauls mannen: ende sijn naem wort seer vermaert