Bible in duytsche (Delftse bijbel 1477)

§ Ca xiij

1

SAul was een kint van enen iaer doe hi begonde te regneren: ende hi regneerde twe iaer bouen israhel.

2

Ende saul coes wt israhel drie dusent mannen te sinen behoef. Ende mit saul wasser twe dusent in machmas ende inden berghe bethel: ende het wasser dusent mit ionatha in benyamins gabaa. Mer hij sant dat ander volc weder elke in sijn woninghe.

3

Ende ionathas sloech der philistijm scare die in gabaa was. Doe dit die philistinen gehoert hadden soe bliesen si mit trompen in alle tlant ende seiden. Die hebreeusche moetent horen.

4

Ende al israhel hoerde al sulcdanich nieumare: ende saul heuet ghesleghen die stacien vanden philistijm Ende israhel heeft hem opgerecht teghen den philistijm. Daer om riep

[p. *366]

tvolc na saul in galgala:

5

ende die philistinen vergaderden om te vechten ieghen israhel. dertich dusent waghenen. ende ses dusent ghereden: ende ander volc vele ghelijc den sande dat an dat ouer vander zee is. Ende si quamen op ende sloghen tenten in machmas: ten oesten van bethanen.

6

Doe dit die kinder van israhel sagen dat si bekringelt waren. want tvolc was ghemoeyt: so borgen si hem in duwieren ende in clouen: ende in rootsen ende in holen ende in putten.

7

Ende die hebreeusche ghinghen oec ouer die iordane: int lant van gad ende galaad Ende doe saul noch was in galgala. so wort al tvolc veruaert dat hem volghede.

8

Ende hi ontbeide samuel seuen daghen also hi hem beuolen had: ende samuel en quam niet in galgala. Ende tvolc viel van saul.

9

Daer om seide saul Brenghet mi holocauste ende paeyselijken hostien. Ende hi offerde holocauste

10

Ende doe hi voldaen hadde holocauste offerende: siet so quam samuel. Ende saul ghinc wt ieghen hem te ghemoete dat hi hem grueten soude.

11

Ende samuel seide tot hem. Wat hebtstu gedaen Ende saul antwoerde Om dat ic sach dat tvolc van mi viel. ende dattu niet en quaemste binnen den daghen die du gheset hadste: ende dat die philistinen oec vergadert waren in machmas:

12

soe seede ic Nu sullen die philistinen nedercomen te mi in galgala: ende ic en hadde sheren aensichte niet ghepaeyst. Van node ghedwongen: soe heb ic den heer holocaust gheoffert.

13

Ende samuel seide tot saul. Du hebtste sotteliken gedaen. Ende du en hebtte niet gewacht sheren dijns gods gebode die hi di beuolen heeft. Ende hadstu dit niet gedaen: soe had die here nu dijn rike bereet bouen israhel. ewelike.

14

Mer dijn rike en sal niet voert verrisen. Want die here heeft te sinen behoef gesocht een man na sijn herte: ende die here heeft hem beuolen dat hij leidsman wesen sal bouen sijn volke: om dattu niet ghehouden en hebste dattie here beuolen heeft.

15

Ende samuel stont op: ende ghinc op van galgala. in benyamins gabaa. Tvolc van israhel trac op na saul den volke te ghemoete. dat ieghen hem vacht: ende si quamen van galgala in gabaa in benyamins berghe. Ende saul deelde tvolc dat mit hem gevonden was omtrent ses hondert mannen:

16

ende saul ende ionathas sijn soen. ende tvolc dat mit hem gevonden wort. was in benyamins gabaa. Mer die philistinen waren ghesleghen in machmas.

17

Ende vter philistinen tenten toghen drie betaeldien om te rouen. Deen betaeldie tide iegen den wech te ephraym. te sauls lande waert.

18

Mer die ander betaeldie trac in al dien wech van bethoron Ende die derde keerde haer ten einde int lant van sabaa. dat coemt an die valeye seboym ieghen die wildernissen.

19

Ende in alt lant van israhel soe en vantmen ne gene smit van ysere. Want die philistinen haddent verwacht: dat machschien die hebreeusche ne gene spere noch zwaerde maken en souden.

20

Daer om ghinc al israhel neder totten philistinen. dat elc soude wetten sijn kouter ende si-

[p. *367]

nen rieke ende sinen aex ende sine spade.

21

Want die scarpheit vanden kouteren ende vanden riexen ende vanden aexen ende vanden spaden: si waren gheplomt: soe dat si behoefden te wetten

22

Ende doe die dach vanden stride gecomen was: soe en vantmen in al des volcs hant. niet dat mit saul was ende ionathas. zwaert noch spere: wtghenomen saul. ende ionathan sijn sone.

23

Ende die stacie vanden philistijm trac wt om op te comen in machmas