Bible in duytsche (Delftse bijbel 1477)

§ Capittel xij

1

SAmuel seide tot al israhel Siet ic hebbe v stemme ghehoert na al dat ghi tot mi ghesproken hebt: ende ic heb bouen v enen coninc gheset.

2

Ende nv gaet een coninc voer v. Want ic bin out geworden ende tidich Mer mijn sonen sijn mit v. Ende aldus heb ic gewandert voer v luden van mijnre ioncheit tot in desen dage:

3

siet ic bin gereet Spreect van mi voerden here ende voer sine coninc: ofte ic yemants osse ofte ezele hebbe ghenomen. of ic yemant ouerdaert hebbe ghedaen. ofte ic yemant veronrecht heb. ofte heb ic van yemants hant ghiften ontfaen: ende ic sal dat huden versmaden ende v weder geuen.

4

Ende sij seiden. Du en hebste ons geen ouerdaet ghedaen. noch en hebste ons veronrecht: noch du en hebste van yemants hant niet ghenomen

5

Ende samuel seide tot hem. Die here is oerconde teghens v ende des heren ghesalfde is getuge in desen daghe: want ghi in mijn hant niet vonden en hebt. Ende si seiden. Wij sijns oerconde.

6

Ende samuel seide totten volke. Die here die maecte moyses ende aaron. ende die onse vadere leide wt egiten hi is hier ieghenwoereich.

7

Daer om staet nu ende ic sal mit vonnisse iegen v schelden voer den here. van alle sine ontfermherticheden. die hi ghedaen heeft mit v ende mit uwen vaders:

8

hoe iacob in egipten ging. ende hoe v vaderen riepen totten here. ende die here sande moysen ende aaron: ende hij leide uwe vaderen wt egipten. ende hi settese in dese stat.

9

Ende sij vergaten sheren haers gods. ende hi leuerdese in sysara hant die meester was van asors ridderscepe ende inder philistijm hande: ende in sconincs van moabs hande: ende si vochten ieghen hem.

10

Daer na riepen si anden here: ende seiden. Wi hebben ghesondicht. want wi hebben den here ghelaten: ende wij hebben gedient baalim ende astharoth. Daer om verlosse ons van onser vianden handen: ende wi sullen di dienen.

11

Ende die here sant ierobaal ende badan. ende barach ende samson

[p. *365]

ende iepthe. ende samuel: ende hi heeft v verlost vander vianden hant al om en tomme: ende gi hebt betrouwelic sonder vrese ghewandert

12

Mer doe ghi saghet dat naas die coninc van amons kinderen ieghens v comen was: soe seidi mi neen niet: mer een coninc sal bouen ons regneren: doe die here v god regneerde in v luden

13

Nu is dan v coninc hier dien gi ghecosen hebst ende geeysschet. Siet die here die heeft v een coninc gegeuen.

14

Ist dat ghi den here ontsiet ende hem dient ende hoert sine stemme. ende en veronwaerdi sheren mont niet. so sult gi ende uwen coninc die bouen v regneert wesen volgende den here uwen god

15

Mer ist dat ghi sheren stemme niet en hoert mer veronwaerdi sijn woort so sal sheren hant op v wesen ende op uwe vaderen.

16

Mer staet nu: ende siet dese grote dinc: die de here doen sal in uwen aenscouwen.

17

En ist huden die ouxt niet vander tarwen? Ic sal den here anropen ende hi sal gheuen donre ende reghen: ende gij sult weten ende sien dat ghij v luden groot quaet ghedaen hebt in sheren aenscouwen: om dat gi enen coninc bouen v gheeysschet hebt.

18

Ende samuel riep totten here ende in dien daghe gaf die here donreslaghe ende reghene. Ende al tvolc ontsach sere den here: ende samuelen.

19

Ende al tvolc seide tot samuel. Bid voer dijn knechte voerden here dinen god: dat wi niet en steruen. Want wi hebben quaetghedaen tot al onsen sonden: dat wi ons enen coninc geeysschet hebben.

20

Ende samuel seide totten volke. En wilt niet ontsien. Ghij hebt al dit quaet ghedaen. Mer nochtan en wilt niet wech gaen van sheren rugghe: mer dient den here in al uwen harten:

21

ende en wilt niet afkeren na ydelheit die v niet en baten: noch si en sullen v niet verlossen. want si sijn ydelheit:

22

ende die here en sal sijn volc niet laten: om sinen groten name. want die here heeft gesworen dat hi v te sinen behoef sijn volck maken sal.

23

Ende die sonde moet van mi sijn inden here. dat ic achter laten sal ouer u te bidden: ende ic sal v leren enen gueden ende rechten wech.

24

Hier om ontsiet den heer: ende dient hem in waerheden. ende van al uwer herten. Want gi hebt ghesien die grote wondere die de here mit v ghedaen heeft.

25

mer ist dat ghi in uwer quaetheit geduert: soe suldi ende v coninc veruaren.