Bible in duytsche (Delftse bijbel 1477)

§ Capittel .xi.

1

NA een maent gheschiede: dat naas van amon op quam ende hi begontste te vechten ieghen iabes in galaad: ende alle die mannen van iabes seiden tot naas. Neem ons op onder beloften: ende wi sullen di dienen.

2

Ende naas van amon antwoerde hem ende seide. In dit sal ic mit v luden belofte maken: dat ic v allen v rechter oghen wtsteken sal: ende ic sal v setten ten lachtere alle dien van israhel.

3

Ende die ouders van iabes seiden tot hem. Verlene ons seuen daghen: dat wi boden moghen senden in alden terminen van israhel: ende en vinden wi niemant die ons verlossen mach so sullen wi totti wtcomen.

4

Ende die boden quamen dus in sauls gabaa: ende si seiden dese woerde daert tvolc hoerde. Ende al tvolc hief op sine stemme ende weende.

5

Ende siet saul quam smorgens ossen volghende vanden ackere: ende hij seide. Wat heuet tvolc dattet weent? Ende si vertelden hem der mannen van iades woerden.

6

Ende sheren geest quam in saul doe hi dese woerden hoerde: ende sijn toren wort seer vergramt.

7

Ende hi nam beide die ossen. ende hiewese in stucken: ende hi santse in alden terminen van israhel bider boden handen ende seide. So wie dat niet wt en coemt. ende saul ende samuel niet en volcht men sal sinen osse aldus doen. Hier om viel sheren vrese int volc: ende si quamen wt als een man:

8

ende saul tellede in beseth. Ende het waren sonen van israhel drie hondert dusent: ende der mannen van iuda waren dertich dusent

9

Ende si seiden den boden dier comen waren. Dus suldi segghen den mannen van iabes van gabaa Morghen sal v salicheit wesen

[p. *364]

als die sonne verwarmen sal. Dus quamen die boden: ende boetscaptent den mannen van iabes: ende si worden verblijt.

10

ende seiden. Morghen sullen wi totti comen: ende gi sult ons doen al dat v genoghen sal.

11

Ende het gheuiele doe die ander dach gecomen was: dat saul tvolc settede in drien pertien. Ende in die wake van smorghens. ginc hi in midden die ghetelden: ende hi sloech amon tot dat die dach verwarmde. Ende die ander worden ghescheiden: alsoe datter niet twe onder hem te gader en bleef.

12

Ende tvolc seide tot samuel. Wie is dit die seide: saul en sal bouen ons niet regneren? Geeft die mannen: ende wi sullense doden

13

Ende saul seide. In desen daghe sal men nyemant doden: want die here heeft huden salicheit in israhel gedaen.

14

Ende samuel seide totten volke. Coemt ende gaen wi in galgala: ende vernyewen wij daer trike

15

Ende al tvolc tide in galgala: ende si maecten daer in galgala saul coninc voer den here. Ende si offerden daer danckelike victimen voerden here. Ende saul wort daer verblijt sere ende al die mannen van israhel