Bible in duytsche (Delftse bijbel 1477)

§ Capittel .x

1

SAmuel nam een vaetken olyen. ende stortet op sauls hoeft: ende hi custen ende seide. Sich die here heeft di gheconsacreert in een prince bouen sijn erfachtichede: ende su sultste sijn volc verlossen vanden ghenen die omtrent hem sijn.

2

Ende dit saldi wesen een teiken: want di god geconsacreert heeft in enen prince. Altstu huden van mij

[p. *362]

gescheiden sults sijn: so sultstu int suden int einde van benyamins lande vinden twe mannen neuen rachels graft ende si sullen di seggen. Die ezellinnen sijn gevonden daer gi om waert gegaen te soken: ende dijn vader heeft die ezelinnen ghelaten ende is besorget om v: ende seit. Wat sal ic doen van minen zoen?

3

Ende altstu van daer ghegaen sultste wesen. Ende du ouerleden biste ende du comen sultste tot thabors eyke. soe sullen di daer drie mannen vinden die te gode opgaen in bethel: ende die ene sal draghen drie hueken. ende die ander drie broden: ende die derde sal draghen een cruke wijns.

4

Ende als si di sullen hebben ghegruet so sullen si di twe broden gheuen: ende du sultse ontfaen van haerre hant.

5

Hier na sultstu comen in sheren berch: daer der philistinen stacie is. Ende altstu in die poorte comen biste. so sultstu te gemoet hebben een cudde van propheten die nedercomen sullen vander hoecheit: ende voer hem sal wesen een sanctorie ende een tambure ende harpe ende cytole. ende si sullen propheteren:

6

ende sheren gheest sal in dij comen ende du sultste mit hem propheteren: ende worden verwandelt in een ander man.

7

Ende als di alle dese teyken comen sijn: soe doch wat dijn hant vinden sal: want die here is mitti.

8

Ende du sultste voer mi nedergaen in galgala Want ic sal totti daer nedercomen om dattu dijn offerhande offeren sulste ende dattu offeren sutlste paeyselike victimen. Ende du sulster seuen dagen beiden tot dat ic totti comen sal: ende ic sal di tonen wattu doen sultste.

9

Doe saul sijn scouder omgekeert hadde dat hi van samuel gaen soude. so verwandelde hem god een ander herte: ende al dese teikenen quamen in dien daghe.

10

Ende si quamen tot dien voerseiden berghe: ende siet hem quam te ghemoete een hope van propheten Ende gods gheest quam in hem: ende hij propheteerde in midden hem luden.

11

Ende doet alle die ghene saghen dien kenden gisteren ende eergisteren dat hi mitten propheten was. ende dat hi propheteerde: so seiden si onderlinghe. Wat dinghe is cis soen gheschiet? Is saul oec onder den propheten?

12

Ende die ene antwoerde den anderen ende seiden. Ende cis is sijn vader. Ende hier om wort hi verwandelt in een bijspel. Is saul onder den propheten.

13

ende saul liet of te propheteren? Ende quam totter hoechheden.

14

Ende sauls oem seide tot hem ende tot sinen kinde: Werwaert waerdi gegaen? Si antwoerden. Die ezelinnen soken. Ende doe wijse niet en vonden: so quamen wi tot samuel.

15

Ende sijn oem seide hem. Seg mi. Wat dij samuel di gheseit heeft.

16

Ende saul seide tot sinen ome. Hi seide ons dat die ezelinnen gevonden waren. Mer hi en seide hem niet vander redenen vanden rike: die hem samuel gheseit had.

17

Ende samuel vergaderde tvolc te gode in masphat:

18

ende hi seide totten kinderen van israhel. Dit seit die here god van israhel. Ic leide israhel wt egipten. ende ic verloste v van dier van egipten hant: ende van alder coninghen hant die v quelden.

19

Mer gi hebt huden uwen god ver-

[p. *363]

worpen: die allene v velost heeft van uwen quaden ende van uwen vernoeyen: ende ghi hebt gheseit. Nene niet: mer sette enen coninc bouen ons Daer om staet nv voerden here bi uwen gheslachten ende uwen familien.

20

Ende samuel dede voertcomen alle die geslachten van israhel: ende tlot viel op benyamins gheslachte.

21

Ende hi dede voertcomen benyamin ende sine maechscappen: ende tlot viel op metri maechscip ende het quam tot saul cis zoen. Daer om sochten si hem ende men vants niet

22

Ende hier na ghingen si den here te rade: of hi daer comen soude. Ende die here antwoerde. Siet hi is thuys geborghen.

23

Ende aldus liepen si ende brochten van daer: ende hi stont in midden tvolc: ende hi was langher dan al tvolc vanden scouderen opwaert

24

Ende samuel seide tot alden volke. Seker sidi dien die here gecoren heeft: dat sijns gelike niet en si in alden volke.Ende al tvolc riep: ende seide. Die coninc moet leuen

25

Ende samuel seide totten volke die wet vanden rike: ende screefse in enen boke ende leiden op voerden here. Ende samuel liet alt volc gaen: elc in sijn huys

26

Ende saul ginc oec in sijn huys in gabaath. Ende een deel vanden heere ginc mit hem: welkere hart god ghenaecten.

27

Mer belyals sonen seiden. Sal ons dese moghen verlossen? Ende si veronwaerden: ende en brachten hem ne gene ghiften. Mer hi veinsde hem dat hijs niet en hoerde