Bible in duytsche (Delftse bijbel 1477)

§ Ca .ix

1

EEn man was van benyamin wies name was cis. abyhels soen. seors soen. bechors zoen. sareths zoen aphia zoen. des mans gemini zoen starc van crachte.

2

Ende hem was een zoen die saul hete wtvercoren ende guet: ende vanden kinderen van israhel en was ne ghene beter dan hi. Vande scouderen ende daer bouen was hi bouen al tvolc lanc.

3

Ende cis sijns vaders ezelinnen waren verdoelt. Ende cis die seide tot saul sinen zoen. Neem metti een vanden kinderen. ende stant op ende ganc ende soke die ezelinnen.

4

Ende doese ouer den berch van ephraym waren ende tlant van salisa ende sijse niet ghevonden en hadden: so leden si oec doer tlant van salim ende si en waren daer niet. mer oec doer gemini lant: ende sij en vondense niet

5

Ende doe si comen waren in suphs lant: ende sijse niet gevonden en hadden: soe seide saul tot sinen kinde dat mit hem was. Com ende keren wi weder: dat mijn vader machschien die ezelinnen laet varen ende sorchachtich si om ons.

6

Ende die knape seide. Sich in dese stede is een gods man ende edel: al dat hi spreect dat comt sonder enighen twiuel. Daer om laet ons daer gaen: ofte hi machschien ons segghen mach van onse weghe daer wi in comen sijn.

7

Ende saul seide tot sinen kinde. Sich wi sullen daer gaen. Wat sullen wi totten man gods draghen? Tbroot mindert in onsen scerpen: ende wi en hebben ne ghene boerse dat wij gods man moghen gheuen: noch anders niet.

8

Ende echter antwoerde tkint saul ende seide. Sich in mijn hant is vonden tvierendeel siluers van enen stoter. gheuen wijt den gods man: die hi ons onsen wech segghen wille.

9

Sprac elc aldus in israhel: die den here te rade ghinc. Coemt ende gaen wi totten sienden. Want diemen huden een propheet heet: dien heetmen wijlen enen sienden.

10

Ende saul seide tot sinen kinde Dijn reden is alte guet. Com ende gaen wi. Ende si ginghen in die stede: daer die gods man in was.

11

Ende doe si opgingen ten berch vander steden so vonden si die meyssene wtcomende om water te sceppen: ende si seiden hem. Is hier die siende.

12

Ende si antwoerden ende seiden hem. Hi is hier. Siet voer v. Haest v nv. Want hi is huden in die stat gecomen: want des volcs sacrificie is huden inder hoecheit.

13

Als gi in die poorte coemt so suldine te hant vinden: eer hi opgaet inder hoecheit om tetene. Want tvolc en sal niet eten voer dat hi coemt: want hi sal die hostien benedien: ende daer na sullen si eten dier ghenoot sijn. Daer om nv

[p. *361]

gaet op: want ghi sulten huden vinden.

14

Ende si ghingen op in die stat. Ende doen si ghinghen in midden die poorte: soe openbaerde hem samuel wtcomende ende hi quam hem te ghemoete: om op te gaen in die hoecheit.

15

Ende enen dach te voren eer saul quam. so hadde die here in samuels oren gheseit.

16

Te deser seluer vren die nv is. so sal ic morghen tot dij senden enen man van benyamin: dien du sulte consacreren leytsman bouen minen volke van israhel. Ende hij sal mijn volc verlossen vander philistinen hant Want ic heb mijn volc anegesien. Want haer rope is tot mi comen.

17

Ende doe samuel aenghesien had saul: so seide die here tot hem. Sich den man die ic di geseit hebbe. Dese sal here wesen bouen mijn volc.

18

Ende saul ghinc tot samuel in midden die pooote ende seide. Ic bidde v wijst my: waer is thuus des siendes?

19

Ende samuel antwoerde saul zegghende Ic bin die siende. Ganc voer mi op in hoecheit dattu huden mit mi etes ende ic sal di morghen vroech laten gaen: ende ic sal di segghen al dat in dijn harte is

20

Ende en wes niet in sorghen om die ezellinnen die du eergisteren verloerste want si sijn gheuonden. Ende wies sullen alle die beesten van israhel wesen? En sullense dijn ende dijns vaders huis niet wesen?

21

Ende saul antwoerde ende seide. En bin ic gemini soen niet van den minsten geslachte van israhel. ende en is mijn maechscip niet die achterste onder alle benyamins gheslachte? Waer om heefstu mi dan dese reden gheseit?

22

Ende aldus nam samuel saul mit hem ende sine knape. ende hi leidese in die werscap sale: ende hi gaf hem stat int hooft vanden genen die daer genoet waren. Want dat waren omtrent dertich mannen.

23

Ende samuel seide totten kocke. Gheeft mi dat dele dat ic di gaf: ende dat ic di beual dattuut neuen di besiden setten soutste

24

Ende die kocke hief die scoudere op: ende setse voer saul. Ende samuel seide. Sich datter bleuen is: settet voer di ende eet: want het is di ghehouden van voersiennicheden doe ic tvolc node. Ende in dien daghe at saul mit samuel.

25

Ende si ginghen neder vander hoecheit in die poort ende samuel sprac mit saul opten soldere:: ende hi leide saul opten soldere ende hi sliep.

26

Ende doe si smorghens opghestaen waren ende die dach verlichte so riep samuel saul opten soldere ende seide. Stant op: dat ic di laet gaen. Ende saul stont op. Ende si ginghen beide vte: hi ende samuel.

27

Ende doe si neder ghinghen in die achterste dele vander poorten: soe seide samuel tot saul. Seg den kinde: dattet voer ons gae ende ouerlide. Mer blijft du een luttel staen: dat ic di sheren woert segghen mach.