Bible in duytsche (Delftse bijbel 1477)

§ Ca .viij

1

ALs samuel out worden was: soe geschiede dat hi sinen sonen maecte rechters van israhel.

2

Ende sijn eerstgeboren soen was iohel: ende des anderen name was abya: der rechters in bersabee.

3

Ende sijn sonen en wanderden in sinen weghen niet: mer si keerden hem nader ghiericheit ende si ontfingen ghiften: ende verkeerden tvonnisse.

4

Hierom vergaderden al die meeste geboerten van israhel. ende quamen tot samuel in ramatha:

5

ende si seiden hem. Sich du biste out gheworden: ende dine sonen en wanderen in dine weghen niet Make ons enen coninc dat hi ons vonnisse also alle nacien hebben.

6

Ende dese redene wanhaghede in samuels oghen. om dat si gheseit hadden. geue ons enen coninc dat hi ons vonnisse. Ende samuel bede totten here.

7

Ende die here seide tot samuel. Hore des volcs stemme: in alle dien dat si di segghen Want si en hebben di niet werworpen mer mi. dat ic niet regneren en sal bouen hem

8

Na al haren werken dat si gedaen hebben van dien daghe dat icse wt egipten leide tot desen daghe also si mi lieten ende dienden vreemde goden: aldus doen sij di oec.

9

Daer om hoer nv haer stemmen. Mer nochtan oerconde hem ende voerseg hem sconincs recht die bouen hem regneren sal.

10

Ende samuel seide alle sheren woerden totten volke dat si enen coninc van hem geeysschet hadden:

11

ende doe hi seide. dit sal sconincs rechte wesen: die bouen v gebieden sal. Hij sal v sonen nemen ende settense op sinen waghen. ende salse maken te sinen behoef ridders ende voerlopers van sinen waghen:

12

ende hi salse te sinen behoef maken dusentich heren ende hondert heren. ende ackermans van sinen ackers ende ouxters van sinen tarwe: ende smede van sinen wapenen ende sine waghene.

13

Ende hi sal oec maken v dochteren salfmakerssen. ende backerssen ende kokenarssen.

14

Hi sal oec nemen v alre beste ackers ende uwe wijngaerde ende uwe oliuegaerde: ende hi salt sinen knapen gheuen.

15

Ende hi sal oec verthienden uwe renten ende uwen wijngaerden van uwen coren: om te gheuen van sinen knechten ende ghelubden camerlinghen.

16

Ende oec mede uwe knapen ende ioncwiuen ende beste kinderen ende uwe ezelen ende hi salse in sine werken setten.

17

Hi sal oec uwe cudden vertienden: ende ghi sult sine dienstlude wesen.

18

Ende in dien daghe suldi ropen van uwes conincs aensichte dien ghi v ghecoren hebt: ende in dien dage

[p. *360]

en sal v die here niet horen: want ghi hebt v enen coninc geeysschet.

19

Mer tvolc en woude samuels woerden niet horen: mer sij seiden En sal alsoe niet sijn. Want een coninc sal bouen ons regneren

20

ende wi sullen oec wesen ghelijc allen luden: ende onse coninc sal ons vonnissen. ende hi sal voer ons wt trecken: ende hi sal ouer ons onse striden vechten.

21

Ende samuel hoerde alle woerden vanden volke: ende spracse in sheren oren.

22

Ende die here seide tot samuel. Hore haer stemme: ende sette enen coninc bouen hem. Ende samuel seide totten mannen van israhel. Elc gae in sine stat.