Bible in duytsche (Delftse bijbel 1477)

§ Ca .vij

1

HEt quamen die mannen van cariathiarim ende haelden weder sheren arke: ende si drogense in aminadaps huus in gabaa. Ende si heilichden eleazar sinen soen: dat hi sheren arke wachten soude.

2

ende het geschiede in dien daghe dat sheren arke was in cariathiarim: dat die dage menichfoudicht worden. Want het was dat twintichste iaer. Ende thuus van israhel rusdete vanden here.

3

Ende samuel sprac tot alden huse van israhel ende seide. Of ghi in alle v herte bekeert ten here so duet wech van midden v luden die vreemde goden baalim ende astaroth: ende bereet v herte den here: ende dient hem allene: ende hi sal v verlossen vander philistijm hant.

4

Hier om deden die kinder van israhel wech baalim ende astharoth: ende diende den here allene.

5

Ende samuel seide. Vergadert al israhel in masphat: dat ic den here ouer v bidde

6

Ende si vergaderden in masphat. Ende si sciepen water ende si stortent wt in tsheren aenscouwen ende si vasteden in dien daghe ende si seiden. Wy hebben di here ghesondicht. Ende samuel vonniste die kinder van israhel in masphat.

7

Ende die phtlistinen hoerden dat die kinder van israhel vergadert waren in masphat: ende die baronen vanden philistinen quamen te israhel. Doe dat die kinder van israhel ghehoerden: soe ontsaghen si hem vander philistinen aensichte.

8

Ende si seiden tot samuel. En houde niet op ouer ons te bidden ten here onsen god: dat hij ons behouden moet vander philistijm hant.

9

Ende samuel nam een sugende lam: ende hi offerdet gehele in holocauste den here Ende samuel riep totten here ouer israhel: ende god hoerden.

10

Want het gheschiede doe samuel die holocauste offerde. dat die philistinen begonden te vechten ieghen israhel. Ende in dien dage donrede die here mit groten gheruchte op die philistinen ende hij verdarfse: ende sij worden ghesleghen van israhels aensichte.

11

Ende die mannen van israhel toghen wt masphat ende volgheden die philistinen na ende si slogense totter stat die was onder bethchar

12

Ende samuel nam enen groten steen ende leiden tusschen masphat. ende tusschen sen: ende hi hete die name vander stat. stene der helpen. Ende hi seide. Tot hier toe heeft ons die here gheholpen.

13

Ende die philistinen worden veroetmoedicht: ende si en dadenre voert niet mere toe te comen binnen den terminen van is-

[p. *359]

rahel. Ende aldus wort sheren hant op die philistinen alle samuels dagen:

14

ende die poorte wort israhel weder gegeuen die die philistinen gewonnen hadden van israhel: van akers tot geth ende haren terminen ende hi verloste israhel vander philistinen hant: ende het was paeys tusschen israhel ende den amorreen.

15

Ende samuel vonniste israhel alle die daghe sijns leuens:

16

ende ginc elcx iaers ende omghinc bethel galgala ende masphat: ende hi vonniste israhel inden voerseiden steden.

17

Ende hij keerde weder in ramatha: want daer was sijn huus: ende daer vonniste hi israhel. Ende daer maecte hi oec den here enen outaer