Bible in duytsche (Delftse bijbel 1477)

§ Capit .vi.

1[6:2]

ENde die philistinen riepen haer papen ende haer waersaghers ende seiden. Wat sullen wij doen mit gods arke? Segt ons: hoe wijse sullen moghen in haer stat senden

2[6:3]

Si seiden. Of ghi gods van israhels arke weder sent so en wiltse niet ydel

[p. *357]

weder senden: mer dat gi sculdich sijt dat gheeft haer ouer die sonde. ende dan suldi worden ghenesen: ende ghi sult weten waer om dat haer hant van v niet en gaet.

3[6:4]

Ende sij seiden. Wat ist dat wi haer gheuen sullen ouer die misdaet? Ende si antwoerden. Ghi sult maken vijf gulden bilgate na tghetal vander philisteen prouincien: ende vijf ghulden musen: want een plage was v allen ende uwe baronen.

4[6:5]

Ende ghi sult maken die ghelikenisse van uwen bilgaten. ende die ghelikenisse vanden musen die tlant verdoruen hebben: ende gi sult gode van israhel glorie gheuen: of hij machschien verlicht sijn hant van uwen luden ende van uwen goden: ende van uwen lande.

5[6:6]

Waer om verzwaerdi v harten also egipten ende pharaon sijn herte bezwaerde? En liet hijse niet gaen na dien dat hi ghesleghen was: ende si ghinghen wech

6[6:7]

Daer om begrijpt nv ende maect enen niewen waghen: ende spant indie waghene drachtighe coeyen die die noeyt en droghen ioc: ende sluut die calueren thuus.

7[6:8]

Ende ghi sult sheren arke nemen ende settense op die waghen ende die gulden vaten die ghi haer gelden sult voer die misdaet suldi an haer zide setten in een lade. ende laetse datse gae ende ghi sult sien.

8[6:9]

Ende ist dat si alden wech van haren lande waert opgaet iegen bethsames so heeft ons die here dit grote quaet gedaen: mer en gaen si al daer niet: soe sullen wi weten dat ons sine hant niet en heuet ghesleghen. mer hets ons bi auenturen gesciet.

9[6:10]

Dus daden die philistinen in deser manieren ende si namen twe coeyen die caluer soecten ende spandense inden waghen: ende si sloten haer caluer thuys.

10[6:11]

En si setteden gods arke op die waghen: ende die lade die de gulden muse hadde ende die ghelikenisse vanden bilgate.

11[6:12]

Ende die coeyen ghinghen recht alden wech die te bethsames waert leit: ende si ginghen enen wech gaende ende loeyende: ende si en keerden niet af ter rechterhant. noch ter slinckerhant. Mrr die barone vanden philistinen volgheden na totten termine van bethsames.

12[6:13]

Ende die van bethsame ouxten tarwe in die valeye. Ende sij hieuen haer ogen op ende sagen gods arke: ende sij worden verblijt doe sijse saghen.

13[6:14]

Ende die waghen quam in iosue van bethsames acker: ende daer bleef si staende. Ende daer was een grote steen Ende si hieuwen thout vanden waghen ende leyden die coeyen op thout in holocauste den here.

14[6:15]

Ende die leuiten setteden gods arke vanden waghen: ende die lade die neuen haer was daer die gulden vaten in waren: ende si settense opten groten steen. Ende die mannen van bethsames. offerden holocauste: ende doden in dien daghen victimen den here.

15[6:16]

Ende die vijf baronen vanden philistinen saghent ende keerden weder in dien daghe in akers

16[6:17]

Dit sijn die gulden bilgaten die de philistinen gauen den here ouer haer misdaet Azothon gaf een. gaza een. aschalon een. geth een. ende akers een:

17[6:18]

ende si gauen gulden musen na tghetal vanden philistijm poorte ende haer vijf prouincien: vander ghemuerder poorte mitten dorpe dat sonder muere was: ende totten

[p. *358]

groten abel. dus si sheren arke op setten die tot dien daghen was in iosue van bethsames acker.

18[6:19]

Ende die here sloeh vanden mannen van bethsemes om dat sij shereen arke besien hadden: ende hi sloech vanden volke tseuentih mannen ende vijftich dusent lude. Ende tvolc weende: om dat die here die luden ghesleghen hadde mit groter plaghen.

19[6:20]

Ende die van bethsemes seiden. Wie sal moghen gestaen inden aensaouwen des heylichs gods sheren? Ende tot wien sal hi opgaen van ons?

20[6:21]

Ende si senden boden totten ghenen die te cariathiarim woenden ende seiden. Die philistinen hebben gods arke wederbracht: coemt neder ende haeltse te v