Bible in duytsche (Delftse bijbel 1477)

§ Capit .v.

1

EEnde die philistinen droghen gods arke: ende drogense wech vanden stene der helpen neder in azothen

2

Die philistinen droghen gods arke: ende droghense in dagons tempel: ende settense neuen dagon.

3

Ende doe die van asothen tsanderdaghes opghestaen waren in die dagheraet: siet soe lach langhes op die aerde dagon voer gods arke. Ende si namen dagon ende setten weder op in sijn stat.

4

Ende doe si echter sanderdages vroech op waren ghestaen: so vonden si dagon legghen op sijn aensichte op die aerde voer sheren arke. Mer dagons hoeft ende beide die palmen van sinen handen waren ofgheslagen opten dorpel: mer die troncke van dagon was allene bleuen insijn stat.

5

Om dese saken en traden dagons papen niet ende alle die ghene die comen in daghons tempel op dagons dorpel in azothen: tot in desen daghe.

6

Ende sheren hant wort bezwaert op die van azothen: ende hi verderuedse: ende die dorpen ende die ackers inden midden den lantscepen crielden ende het worden muse. Ende het wort een grote lachter der doot in die stede. Ende hi sloech azothen ende haer lantscepen in die heymelicste stat vanden billen.

7

Ende doe dese mannen van azothen dese plaghe saghen so seiden si. Gods van israhels arke en sal onder ons niet bliuen: want sijn hant is zwaer op ons ende op dagon onsen god.

8

Ende si stonden ende vergaderden tot hem alle die baronen vanden philistinen: ende si seiden. Wat sullen wi doen mit gods van israhels arken? Ende die van geth antwoerden. Men drage gods arke van israhel al omme. Ende si hebben al omme ghedragen gods arke van israhel. Mer doe sijse al omme droghen.

9

soe wort sheren hant bouen elke stat mit sere grote dootslacht: ende hi sloech die mannen van elker poort van den cleynen totten meesten: ende haer fondament darme vuylden ende scoten wt. Ende die van geth aenghingen enen raet: ende maecten te haren behoef sitten van pelsen.

10

Ende dus souden si gods arke brenghe in akers. Ende doe gods arke in akers comen was: so riepen die van akers ende seiden. Si hebben tot ons bracht gods arke van israhel: dat si ons ende onse volke doden sal.

11

Ende dus senden si: ende vergaderden alle die baronen vanden philistijnen. Ende si seiden Laet wech varen gods arke van israhel ende sij keere weder in hare stat: dat si ons mit onsen volke niet en dode. Want in elke poorte wort anxte van der doot: ende alte seer zwaer gods hant.

12

Ende die mannen die niet ghestoruen en waren worden gesleghen in die heymelicste stat tusschen den billen: ende tgherope van elker stede ghinc op tot inden hemel

13[6:1]

Dus was sheren arke inder philistinen lant seuen maende.