Bible in duytsche (Delftse bijbel 1477)

§ Capit .iiij

1

IN dien daghe gheschiede: dat die phililtinen vergaderden te stride. Ende israhel trac wt den philistijm te gemoet in stride: ende si sloghen tenten neuen die stene der helpen. Mer die philistinen quamen in affec:

2

ende si maecten betaeldien ieghen israhel. Ende doe si streden soe keerde israhel den rugghe ten philistijm: ende in dien stride waren versleghen inden acker hier ende daer omtrent vier dusent mannen.

3

Ende tvolc keerde weder totten tenten. Ende die meeste van geboerte van israhel seiden. Waer om heeft ons huden die here verslegen voer die philistinen? Hale wi tot ons van sylo die arke van sheren beloften. ende si come in midden ons luden: ende dat si ons behoude vander vianden hande.

4

Ende dus sant tvolc in sylo: ende si brochten van daer die arke der beloften sheren vanden heren die sittet bouen cherubin. Ende die twee hely sonen waren mitter arken der beloften ofny ende phinees.

5

Ende doe die arke van sheren be-

[p. *355]

lofte comen was inden tenten. so riep al israhel mit groten rope: ende die aerde haerlude.

6

Ende die philistinen hoerden tgeluut vanden rope: ende si seiden. Wat gheluut is dit van desen groten rope inder hebreeuscher tenten? Ende si bekenden dat sheren arke inden tenten comen was.

7

Ende die philistinen ontsagen hem ende seiden. God is gecomen inden tenten. Ende si versuchten ende seiden.

8

Wee si ons Want daer en was ghisteren noch eerghisteren dese grote blijscap niet. Wee ons. Wie sal ons behouden van deser hoge gode hant? Dit sijn die goden. die sloghen egipten mit alder plaghen inder wildernisse

9

Wort vroem ende weest mannen ghij philistinen: dat gi den hebreusschen niet en dient also si v gedient hebben. Wort vroem ende vecht.

10

Dus vochten die philistinen ende israhel wort verslegen: ende elc voer in sijn woninghe. Ende twort een seer grote plage: ende van israhel vielenre dertich dusent mannen te voet:

11

ende sheren arke wort geuaen Ende beide hely sonen ofny ende phinees bleuen daer doot.

12

Ende een man van benyamin liep vter betaeldien in dien dagen ende quam in sylo: mit geschoerden clederen. ende hadde gemul op sijn hooft gheworpen.

13

Ende doe die comen was: so sat hely op enen zetel iegen den wech verwachtende. Want sijn harte was in vrese om sheren arke. Ende doe die man in die stede comen was so boetscapte hijt der poorte: ende al die stede riep.

14

Ende hely hoerde tgeluut vanden gherope: ende seide. Wat gelude is dat van desen gerope? Ende die man quam ende haeste hem: ende boetscapte hely.

15

Want hely was acht ende tnegentich iaer out: ende sijn ogen waren verdonckert: ende hi en mochte niet sien

16

Ende hi seide tot hely. Ic bint die comen bin vanden stride: die gheulouwen bin vander betaeldien huden. Ende hely seide hem? Wat isser gedaen kint mijn.

17

Ende die gene die boetscapte antwoerde hem. Israhel vloe voer die philistijm: ende in dien volke gheschiede enen groten val. Ende hier en bouen sijn daer doot bleuen beide v sonen ofny ende phinees: ende sheren arke is gheuaen.

18

Ende doe hi gods arke hadde ghenoemt soe viel hely vanden stuele achterwaert neuen die dore: ende hi brac den hals ende bleef doot. Want die man was out: ende seer tidich: ende hi vonniste israhel veertich iaer.

19

Hely behuwede dochter phinees wijf droech kint ende si was biden gebaerne. Ende doe si die boetscap hoerde dat gods arke gheuaen was. ende dat haer zweer ende haer man doot waren so gheboechde si haer ende ghebaerde Want in haer waren comen haestighe pinen.

20

Ende in die oghenblic van hare doot: so seiden haer die vrouwen die omtrent haer stonden En ontsich dij niet. want du heefste enen soen ghebaert. Ende si en antwoerder hem niet op: noch en micter niet op.

21

Ende si hete tkint ychaboth. ende seide Die glorie van israhel is ouer ghedraghen: om dat gods arke gheuaen is. Ende ouer haren zweer

22

ende ouer haren man seide si. Die glorie van israhel is ouerghedragen: om dat gods

[p. *356]

arke soude wesen gheuaen