Bible in duytsche (Delftse bijbel 1477)

§ Ca .ij.

1

ENde anna bede ende seide. Mijn herte is verblijt inden here: ende mijn hoerne is verheuen in minen god Mijn mont is ghewijt op mine viande: want ic ben verblijt in mine salicheit.

2

En is gheen heilich alsoe die here is: want ne ghene en is buyten di: ende en is ghene starc gelike onse god.

3

Ende wilt niet menicfoudighen hoge dingen te spreken: v verblydende. Die oude moeten wech gaen van uwen monde: want die god der contste is die here: ende hem worden ghereet die ghepense

4

Die starcker boghe is verwonnen: ende die crancke sijn toegegort mit stercheden.

5

Die ghesaet waren si verhuerden hem te voren om broot: ende die hongherige worden ghesaet. Tot dat een ondrachtighe veel kinderen heeft ghebaert: ende dat ghecranct worde die ghene die veel kinder hadde.

6

Die here slaet doot ende hij maect leuende: hi leit ter hellen ende brenct weder.

7

Die here maect den armen ende den riken: hi veroetmoedicht ende verheft.

8

Den maten wect hi vten ghemulle. ende hi heft den armen op vter sliminghe: dat hi sitten sal mitten princen: ende houden den zetel der glorien. Want sheren sijn die herren der aerden: ende hi hefter die werlt op gheset.

9

Hi sal houden sijnre heiligher voeten: ende die quade sullen inden deemsterheden zwighen:

[p. *352]

want die man en sal niet vervroemt worden in sijnre stercheit.

10

Die here sallen sijn wedersake ontsien: ende bouen hem salt inden hemel donren. Die here sal vonnissen die einden der werelt: ende hi sal sine coninghen trike gheuen: ende sal verheffen sijns cristus hoernen.

11

Ende helchana ghinc wech in ramatha in sijn huus. Mer tkint was dieninc in sheren aenscouwen: voer hely spapen aensichte.

12

Mer hely sonen. waren belyals sonen.

13

ende en wisten den here niet. noch der papen officien ten volke: mer soe wie victimen gheoffert hadde. soe quam spapen kint doemen vleych soet. ende het had in sijn hant enen crauwel mit drien tanden:

14

ende die stac hi inden aker in die pot of in die panne: ende so wat dat die crauwel op brachte. dat nam die papen te sinen dele. Dus daden si al israhel. die quamen in sylo.

15

Ende oec eer si dat ruete verbranden souden so quam spapen kint. ende seide: die daer offerhande deden. gheeft mi tvleych dat ic den pape ziede. Want en sal van dij ghene ghesoden vleysch nemen. mer raeuwe.

16

Ende die ghene dier offerden: seide hem. Men verbrande eerst huden dat ruete also men pleget: ende dan neems te dinen behoef also veel als dine ziele begheert. Ende tkint antwoerde ende seide hem. Neen niet. Want du sultstet nv gheuen: ofte anders sal ict nemen mit crachte.

17

Ende hely kinderen sonde was seer groot voerden here want si toghen die luden van gods sacrificien

18

Ende samuel diende voerden here in sheren aenscouwen een kint gecleet mit enen linen ephot.

19

Ende sijn moeder maecte hem enen cleynen rocke: ende die brachtse hem te enen ghesetten daghe doen si op quam mit haren manne: om dat si feestelic hostie offeren soude ende haer belofte.

20

Ende hely benedide helchana ende sinen wiue: ende hij seide hem. Die here moet di saet wedergheuen van desen wiue: om tghewene dattu den here gheleent hebste Ende si ghingen wech in haer stat.

21

Hier om visiteerde die heer annen ende sij ontfinc ende ghebaerde den here drie sonen ende twe dochteren. Ende tkint samuel wort grotelijc verheuen voer den here.

22

Ende hely was harde out ende hi hoerde al dat sijn sonen daden ende al israhel: ende hoe si sliepen mitten wiuen die hueden die dore vander tabernacule:

23

ende hi seide hem. Waer om doedi dusdanighe dinc: die ic hoer alte quade dinghen vanden volke?

24

Mijn sonen en willes niet doen. Want ten is gene guede maniere dat ic hore: dat ghi sheren volc doet sondigen.

25

Als een man ieghen enen man ghesondicht heeft. men mach hem gode ghepaeysen: mer als een man ieghen die here sondicht wie sal ouer hem bidden? Ende si en hoerden haers vaders woerden niet: want god woudse doden.

26

Ende tkint samuel hadde voertganc ende wies ende was bequaem beide gode: ende den mensche.

27

Ende eens gods man quam tot hely: ende seide tot hem. Dit seit die here. En openbaerde ic niet claerlike dijns vaders huus doe hi was in egipten in pharaons huus?

28

ende vercoes icken niet te mi

[p. *353]

wt alden gheslachten van israhel tot enen pape: dat hi opgaen soude te minen outaer. ende dat hi mi wieroec offeren soude. ende dat hi die ephod soude draghen voer mi: ende en gaf ic niet dijns vaders huus al dat coemt vanden sacrificicien der kindere van israhel

29

Waer om hebtstu achter di geworpen mijn victimen ende mijn ghiften. die ic di gheboden hebbe datmense offeren soude inden tempel: ende hebtste meer gheeert dinen sonen dan mi. om dat ghi eten soudt die beesten van alle mijn volc van israhels sacrificien?

30

Hier om seit die here god van israhel. Sprekende hed ic gheseit: dat dijn huus ende dijns vaders huus soude dienen in minen aenscouwen. ewelelijc Ende nv seit die here Dat moet van mi wesen Mer so wie mi eeren sal dien sal ic verheffen: mer die mi versmaden sal. si sullen onedel wesen.

31

Sich die daghen sullen comen: ende ic sal afsniden dinen arme. ende den arme van dijns vaders huus: so dat ne gene oude in dijn huus sijn en sal.

32

Ende du sultste inden tempel sien die du benijts in allen den voerspoedighen dinghen van israhel: ende in allen daghen en sal ne ghene out in dijn huus wesen.

33

Mer nochtan en sal ic altemael niet wech doen van minen outaer den manne die wt di wesen sal: mer op dat dijn oghen sullen gebreken ende dine ziele versmelten: ende een groet deel van dinen huus sal steruen als si comen sullen sijn ter manliker outheit.

34

Ende dit sal di sijn een teyken dattet toe te comen is. dijn twe sonen ofny ende phinees. sullen steruen in enen daghe beide.

35

Ende ic sal mi verwerken enen getrouwen pape die na mijn herte ende mijn ziel doen sal. Ende ic sal hem timmeren een ghetrouwe huus: ende hi sal alle sijn daghe wanderen voer mine cristo.

36

Want het is toe te comen. so wie dat bleuen sal sijn in dijn huus dat hi comen sal datmen voer hem bidde: ende hi sal offeren enen penninc ende een broot: ende hi sal segghen. Ic bidde laet mi te enen papeliken deel: dat ic een brocke broots eten mach

37[3:1]

Ende tkint samuel diende den here voer hely den pape: ende sheren redene was preciose. In dien daghe en was ne gene visioen openbaer