Bible in duytsche (Delftse bijbel 1477)

[1]

1

HEt was een man van ramathaim sophim. van ephrayms berge: ende sinen naem was helchana. iheroboams soen. heliu soen. thut soen. suph soen. van effrata:

2

ende hi hadde twee wiue: der eenre naem was anna: ende der ander naem fenenna. Ende van fenenne waren kinderen: mer annen en waren ne ghene kinderen.

3

Ende die man ghinc op van sijnre steden ten ghesetten dage: dat hi aenbeden ende sacrificeren soude den here vanden heeren in sylo. Ende daer waren sheren papen twe hely sonen: ofny ende phinees.

4

Dus quam die dach ende helchana offerde: ende hi gaf fenennen sinen wiue ende al haer sonen ende dochteren delen.

5

Mer hi gaf der serigher annen een deel. want hi minnede annen. Mer die here had besloten haer vroulicheit.

6

Ende haer beniderssche quelledse ende moeydese anxtelike: also sere dat si haer verweet dattie here haer vroulicheit besloten had.

7

Ende aldus deden si elcs iaers. als die tijt om quam dat si sheren tempel opginghen: ende aldus vergramde sijse. Mer anna weende ende nam gheen spijse.

8

Helchana annen man seide tot haer. Anna waer om weentstu. ende waer om en etes du niet: ende om wat dinghen wort dijn hart ghequellet? En bin ic di niet betere dan tien kinderen?

9

Ende anna stont op: na dat si gegeten ende ghedroncken hadden in sylo. Ende daer hely sat op enen stuel voerden post vandes heren tempel.

10

om dat anna bitter was van moede. so bat si den here scriyende mildelijc:

11

ende sij beloefde een belofte ende seide. Here van den heeren ist dattu aenscouwetste ende aensietste dijn ioncwijfs verdriet. ende ghedencstu mijns ende en vergeetstu dijnre deernen niet. ende gheeftstu dinen ioncwiue eens mans maecsele so sal icken den here geuen al die daghe sijns leuens: ende ne gene scheermes en sal op sijn hooft comen

12

Ende het gheschiede doe si haer bedinghe menichfoudichde voerden here: dat hely haren mont wachte.

13

Mer anna sprac in haer herte: ende allene ruerden haer lippen: ende men hoerde haer stemme albedalle niet. Hier om waende hely dat si droncken had geweest:

14

ende hi seide haer. Hoe langhe sultstu droncken wesen? Verlaet den wijn een luttel daer du mede ghedranct biste.

15

Anna antwoerde: en is also niet here mij. Want ic bin een alte onsaligen wijf: wijn ende al dat droncken maken mach en heb ic niet ghedroncken. mer ic heb mijn ziel wtghestort in sheren aenscouwen.

16

En achte dijn ioncwiue niet als een van belyals dochteren: want vter menichten van rouwen ende van sericheden heb ic gesproken tot in deser tijt.

17

Doe seide hely tot haer. Ganc in paeyse: ende die here god van israhel moeti die bede gheuen die du hem gebeden hebtste.

18

Ende

[p. *351]

anna seide Och ofte dine ioncwijf gracie mochte vinden voer dinen ogen. Ende twijf ghinc wech in haren weghe ende si at: ende haer aensichte en worde nemmermeer in menigherhande dinc verwandelt.

19

Ende si stonden smorghens op: ende aenbeden voerden here: ende sij keerden weder ende quamen in haer huus in ramatha. Ende helchana bekende annen sijn wijf: ende die here gedacht haers.

20

Ende het gheschiede na enen omlopen van daghen . ende anna ontfinc ende ghebaerde enen soen. Ende si hete sinen naem samuel: om dat si hem vanden here geeysschet had

21

Ende helchana haer man ghinc op ende al sijn huus om dat hi den here offeren soude een feestelike offerhande. ende sine belofte:

22

ende anna en ghinc niet op. Want si seide haren man. Ic en salre niet opgaen voer dat kindekijn ghespeent wort: ende dat ict leide ende dattet mach openbaren in sheren aenscouwen: ende dattet daer altemael ofte eenpaerlike bliue.

23

Ende helchana haer man seide haer. Doch datti guet denct: ende blijft tot dattuut ghespeent hebtste: ende ic bidde dattie here sijn woert voldoen moet Dus bleef twijf ende soecte haer kint tot dat sijt vanden melke speende.

24

Ende na dien dat sijt gespeent hadde so leide sijt mit haer mit drie calueren ende mit drie modeken blomen ende mit eenre cruken wijns: ende si leiden in sheren huus in sylo. Mer tkint was noch een kindekijn.

25

Ende si offerden een calf: ende si gauen tkint hely.

26

Ende anna seide. Mijn here ic bidde: leeft dine ziele here. Ic bin dat wijf dat hier voer di stont: den here biddende om dit kint.

27

Ic bad: ende die here gaf mi minen heyssche.

28

Hier om heb icken oec den here gheleent: alle die daghe dattet den here oerbaerlijc wesen mach. Ende sij aenbeden daer den here.