Bible in duytsche (Delftse bijbel 1477)

§ Capit .xx

1

ALle die kinder van israhel quamen hier om vte ende vergaderden te gader als een man. van dan tot barsabee ende tlant van galaad totten here in maspha:

2

ende al die hoke vanden volke ende al die gheslachten van israhel in die vergaderinghe van gods volke vierhondert dusent man. vechters te voete.

3

Ende benyamins kinderen en was niet verborghen: dat die kinder van israhel opcomen waren in maspha.

4

Ende doe men den leuijt des wijfs man dier gedoot was vragede. hoe dus grote misdaet was gheschiet so seide hi. Ic quam in benyamin gabaa mit minen wiue: ende ic keerde daer neder.

5

Ende siet die mannnen van dier stat omleiden snachts thuus daer ic in was ende si wouden mij doden: ende si moeyden mijn wijf met onghelouighen toerne van onkuysheden dat sijre af starf.

6

Ende ic begreepse ende hieuse in sticken: ende sant die deelen in alden terminen van uwer possessien: want noeyt en gheschiede in israhel dus grote quaetheit ende dus grote sonde.

7

Alle ghi kinderen van israhel ghij sijt hier: onderscheit wat gi schuldich sijt te doen.

8

Ende alle tvolc stont ende antwoerden alle als mit eens mans stemme. Wi en sullen niet wech gaen te onsen woninghen: noch niemant en sal in sijn huus gaen:

9

mer dit sullen wij int gemee iegen gabaa doen

10

Men kiese tien mannen wt honderden wt

[p. *341]

al den gheslachten van israhel ende hondert man van dusent. Ende dusent man van tien dusent dat si den heere mede draghen spise: dat wi vechten iegen gabaa benyamin: ende moghen gelden dat hi verdient heeft om dese misdaet.

11

Ende al israhel vergaderde ter stat als een man mit eenre ghedachten ende enen rade:

12

ende si sonden boden tot alden geslachten van benyamin die seggen souden. Waer om is dus grote quaetheit in v luden gevonden?

13

Leuert die mannen van gabaa die dese quaetheit ghedaen hebben dat si steruen: ende datmen tquade wech doe van israhel. Ende si en wilden haer broederen der kinder van israhel ghebot niet horen:

14

mer si vergaderden in gabaon wt alden poorten die wt haren lotte waren om dat si hem salcoers doen souden: ende dat si vechten souden ieghen al tvolc van israhel.

15

Ende men nam van beniamin vijf ende twintich dusent man die zwaerde wt toghen al sonder die gene die in gabaa woenden dier seuen hondert alte starcke mannen waren

16

die alsoe wel mitter luchterhant als mitter rechterhant vochten: ende die stenen mitten slinghere soe rechte worpen: dat si oec een haer gheraken mochten: ende dat die worpe vanden stene ne ghene sins en voer in dander zide.

17

Ende vanden mannen van israhel al sonder benyamins kinderen vantmen vier hondert dusent man die zwaerde wt toghen ende bereet waren ten stride:

18

ende si stonden op ende quamen in gods huus dat is in sylo: ende si ghinghen den here te rade ende seiden. Wie sal in ons heere prince vanden stride wesen ieghen beniamins kinderen? Ende die here antwoerde hem. Iudas sal leydsman wesen.

19

Ende te hant smorghens stonden die kinder van israhel op ende sloghen ghetelden neuen gabaa:

20

ende van daer ginghen si voert ten stride ieghen benyamin. ende begonsten op die poort te vechten

21

Ende benyamins kinderen quamen wt gabaa ende sloghen vanden kinderen van israhel in dien daghe doot twe ende twintich dusent man.

22

Ende echter hadden die kinder van israhel betrouwen in machte ende in getale ende setteden weder betaeldie in die selue stat daer sij eerst ghestreden hadden:

23

ende aldus nochtan dat si eerste opginghen ende weenden voer den here totter nacht: ende si ghinghen hem te rade ende seiden. Sal ic meer opgaen om te striden ieghen benyamins kinderen minen bruedere ofte en sal ic? Ende die here antwoerde hem. Gaet op iegen hem ende aengaet strijt.

24

Ende als die kinder van israhel sanderdaghes ieghen benyamins kinderen te stride comen waren.

25

so quamen benyamins kinderen buyten der poorten van gabaa: ende si quamen hem te ghemoete ende sij vielenre op mit groter slacht. dat si versloghen achtien dusent mannen die zwaerde wt togen.

26

Om dese sake so quamen alle die kinder van israhel in gods huus: ende si saten ende weenden voer den here. Ende si vasten in dien daghe totten auonde: ende si offerden holocauste ende paeyselike victimen den here:

27

ende si vraechden van haren state. Te dien tide soe

[p. *342]

was daer die arke vanden beloften gods in sylo:

28

ende phinees eleazars soen aarons soen die was prouoost vanden huus. Hier om so ghingen si den here te rade ende seiden. Sullen wi emmermeer wtgaen te stride ieghen benyamins kinderen onse bruederen ofte ophouden. Ende die here seide hem. Gaet op. Want morghen sal icse leueren in uwen handen.

29

Ende die kinder van israhel leiden laghen al om en tomme die poorte van gabaa:

30

ende derdewarf soe sij eenwarf ende anderwarf hadden gedaen so brachten si haer heere wt ieghen benyamins kinderen.

31

Mer benyamins kinderen quamen vromelijc vter steden: ende haer wedersaken die vlouwen volgende si verre na: also dat si van hem luden wondeden alsoe si opten eersten ende anderen dach daden: ende sloghen die ghene die hem den rugghe keerden al doer twe wegen ende die ene wech droech te bethel ende die ander in gabaa: ende si slogen omtrent dertich mannen.

32

Want si waenden dat si ghevlouwen hadden also si plaghen. Want si hadden raet ghehadt dat si hem souden veinsen vliende om dat sijse vter stat trecken souden: ende dat sijse al vliende totten voerseiden weghe brenghen souden.

33

Ende aldus stonden alle die kinder van israhel op van haren laghen ende leiden betaeldien in die stat diemen heet baalthamar: ende die laghen die omtrent die poort laghen begonsten hem oec alleincken te openbaren ende van der westziden der poort voert te comen.

34

Mer ende oec ander tien dusent man van al israhel. dienden ten stride die ghene die in die poorte woenden: ende dien strijt wort verzwaert iegen benyamins kinderen: ende si en verstonden niet dat hem van allen ziden der verderfnisse an quam.

35

Ende die here sloechse in dier aenscouwen der kinder van israhel: ende si sloghen in dien daghe van hem luden doot vijf ende twintich dusent mannen ende hondert alle vechters ende die zwaert wt toghen.

36

Ende beniamins kinderen doe si sagen dat si nederst waren so begonsten si te vlien. ende als dat saghen die kinder van israhel soe gauen si hem ter vluchtigher stat. Om dat si comen waren ten laghen die bereet waren die sij neuen die poort gheleit hadden.

37

Ende als die laghen van haren scuylingen op ghestaen waren ende benyamin dien rugghe keerde die op hem sloghen: so ghinghen si in die stat ende slogense ints swaerts mont.

38

Want die kinder van israhel hadden een teyken ghegheuen den ghenen die si in laghen geleit hadden: dat si tvyer in die poort steken souden als sijse ghewonnen hadden: dat sij mitten roeke die opslaen soude tonen souden dat die poort ghewonnen waer

39

Ende doe dit die kinder van israhel sagen die inden strijt waren. want benyamins kinderen waenden dat si gheulouwen hadden ende volgeden hem sterckelike na. ende sloghen dertich mannen van haren heere:

40

ende doe si saghen den roke vander stede opgaen als een columme: ende doe benyamin oec achter sach ende hi sach dat sijn stat gewonnen was ende dat die vlamme hoech opsloech:

41

ende dat die gene die te voren die vluchte veinsden:

[p. *343]

haer aensichten ommekeerden ende dat sijse starckelike wederstonden.

42

Doe dit die kinderen benyamins haden gesien so keerden si ter vluchte: ende begonsten te gaen ten weghewaert vander wildernissen: ende daer volgeden hem oec die vianden. Mer die gene oec die die stat ontsteken hadden quamen hem ieghen:

43

ende het gheschiede aldus dat si in beiden ziden vanden vianden worden ghesleghen: ende ghene ruste en was vanden ghenen diere storuen: ende si vielen ende worden verslegen ter oestziden ter poorten van gabaa

44

Ende der gheenre die in die stat versleghen waren diere was achtien dusent mannen: alle alte stercke vechters.

45

Als dit ghesaghen die ouerbleuen waren van benyamin so vlouwen si inder wildernisse ende si toghen ten steen waert die remmon heet. Ende in deser vlocht so sloghen si oec doot vijf dusent mannen die hem borgen ende harwaert ende darwaert vlouwen. Ende doe si voert tiden so volgheden si hem na: ende sloghenre noch twe dusent doot.

46

Ende aldus gheschiede dat al die gene die van benyamin geuallen waren in verscheiden steden waren vijf ende wintich dusent vechters alte bereet te striden.

47

Ende van al benyamins ghetale die ontgaen mochten inder wildernissen ende ghevluowen. waren bleuen ses hondert man ende si saten inden stene remmon vier maent.

48

Ende doe die kinder van israhel wedergekeert waren so slogen si mitten zwaerde al dat ouerbliuen vander stat van mannen totten beesten: ende alle beniamins poorte ende dorpe verteerde die brant vlamme