Bible in duytsche (Delftse bijbel 1477)

§ Capittel .xxi

1

DIe kinder van israhel die hadden ghesworen in maspha: ende gheseit. Niemant van ons luden en sal van sine dochteren benyamins kinderen te wiue geuen.

2

Ende si quamen alle te gods huus in sylo: ende si saten in sinen aenscouwen totten auonde ende si hieuen haer stemmen op: ende begonsten met groten gherope ende wenenne

3

ende seiden. Here god van israhel waer om is dit quaet gheschiet in dinen volke: dat huden een gheslacht van ons luden sal worden afghedaen?

4

Ende sander dages stonden si op in die dagheraet ende si stichten daer een outaer: ende offerden daer holocauste ende paeyselicke victimen:

5

ende seiden. Wie en is niet opcomen wt alden gheslachte van israhel in sheren heere? Want si hadden hem mit zwaren ede verbonden doen si in maspha waren. dat sijse dootslaen souden die daer ghebreecken souden:

6

ende die kinder van israhel begontsten berouwenisse te hebben op benyamins haren brueder ende si seiden. Een geslachte is van israhel of ghedaen.

7

Van wanen sal si wiuen nemen? Want wij hebben alle int lant ghemene ghesworen dat wi hem onse dochteren niet geuen en souden.

8

Hier om seiden si. Wie ist wt alden gheslachten van israhel. die niet op en quam totten here in maspha? Ende sich men vant den genen die woenden in iabis in galaad dat si in dit heere niet gheweest en hadden.

9

Ende te dien tiden oec dat si waren in sylo so en was

[p. *344]

daer nyemant van hem luden vonden

10

Ende hier om senden si tien dusent alte starcke mannen: ende si beualen hem Gaet ende verslaet die ghene die te iabis wonen in galaad in swaerts mont. beide haer wiuen ende haer cleine kinderen:

11

ende dit sal wesen dat gi behouden sult. Ghi sult dootslaen alle man ende wiue die mans bekent hebben:

12

mer hout die maechden. Ende men vant te iabis in galaad vier hondert maechden die ne gheens mans bedde en wisten: ende sij brachtense ten getelde in sylo int lant van chanaan.

13

Ende si sonden bode tot benyamins kinderen die inden stene remmon waren: ende dat sijse in paeyse ontfaen souden.

14

Ende in dien tiden quamen benyamins kinderen: ende men gaf hem wiuen van den dochteren van iabis in galaad: want si en wouden ne gene ander die si hem in der manieren gheuen mochten.

15

Ende al israhel had seer groten rouwe. ende daden penitencie vanden dootslaghe eens gheslachtes in israhel:

16

ende die meeste van gheboerte van israhel seiden. Wat sullen wi den anderen doen die ne gene wiue ontfaen en hebben? Want alle die wiuen in benyamin sijn verslegen:

17

ende ons is mit groter sorghen ende mit groter naersticheit te voersieen: dat van israhel die ene gheslacht niet en worde afghedaen

18

Wij en moghen hem onse dochteren niet gheuen om dat wij ghebonden sijn mitten ede ende mitten vloke daer wi mede seiden: vermaledijt moet hij sijn die van sinen dochteren benyamin sal gehuen te wiue.

19

Ende si vonden enen raet: ende seiden. Siet sheren iaerlike feeste is in sylo die ghesticht is ter noortziden vander poorte bethel: ende ter oestzide vanden weghe die van bethel in sychem waert gaet. ende ter zuytziden vander poort lebona.

20

Ende si beualen benyamins kinderen ende seiden. Gaet ende berghet v inden wijngaerde.

21

Ende als ghij wt sult sien comen naden zede die dochteren van sylo om reye te leyden: soe gaet haestelike wten wijngaerde ende elc begripe wt hem een wijf: ende gaet int lant van benyamin.

22

Ende als haer vaderen ende haer bruederen comen sullen ende sij hem beghinnen te beclaghen ende te schelden ieghen v: soe sullen wij hem segghen. Laet v haers ontfermen Want si en hebbense niet ghenomen na rechte van vechters: ende verwinres: mer doe si baden dat sijse hebben mochten so en gaefdise hem niet: ende die sonde is an v zide.

23

Ende benyamins kinder deden also hem beuolen was: ende na haren ghetale soe nam elc een wijf vanden ioncfrouwen die die reye leyden: ende si ghinghen wech in haren possessien ende stichten die poorten ende woendenre in.

24

Ende die kinder van israhel keerden oec bi haren gheslachten ende haren familien in hare woninghe. In dien daghe en was ne ghene coninc in israhel: mer elken dede dat hem seluen gherechte docht

§ Hier gaet die rechter boeck wt