Bible in duytsche (Delftse bijbel 1477)

§ Capittel .xviij

1

IN dien daghe en was ne ghene coninc in israhel: mer dans geslachte sochte allene te sinen beboef possessie dat si daer in wonen souden. Want tot dien dach toe en haddense onder dandere geslachte ne ghene lotte ontfaen

2

Hier om senden dans kinderen vijf stercke mannen wt haren gheslachte ende van hare familien van saraam ende esthahol: dat si tlant bespyen souden ende naersteliken doersien. Ende seiden hem. Gaet ende merket tlant. Ende doe sij wech tiden ende comen waren in ephra-

[p. *337]

yms berch ende si in mychas huus ghecomen waren: so rusten si daer.

3

Ende doe si des leuiten stemme bekenden des ionghelincs. ende si besichden sijn asument: so seiden si hem Wie heeft di hier ghebracht? Wat doetstu hier? Om wat saken woutstu hier comen?

4

Hi antwoerde hem. Dit ende dit heeft mi mychas verleent: ende heeft mi ghehuert met lone dat ic hem pape wesen sal.

5

Ende si baden hem dat hij den here te rade gaen soude: dat si souden mogen weten ofte si voerspoedighen wech daden. ende ofte haer dinc voertganc hebben soude.

6

Ende hi antwoerde hem Gaet mit paeyse. Die here aensiet uwen wech: ende den ganc dien ghi gaet.

7

Ende dese vijf mannen gingen ende quamen te lais: ende si saghen tvolc daer binnen wonen sonder enighe vrese na dier gewoente dier van sydonen: seker ende rustelike ende niemant albedalle en stac ieghen hem ende van groter rijcheit ende verre van sydonen ende van allen menschen verscheiden.

8

Ende si keerden weder tot haren bruederen in saraa ende esthaol. Ende doe si hem vragheden wat si ghedaen hadden:

9

soe antwoerden sij Staet op ende laet ons opgaen tot hem Want wi saghen tlant harde rijc ende drachtich. Ende en willet niet verrokelosen: ende en willet niet achterlaten. Gae wi ende besitten wi tlant want ons en sal ne genen arbeit wesen.

10

Wij sullen ingaen tot dat zekere volc in een wijd lantscap: ende die here sal ons leueren die stat daer en gheens dinges breke en is van dien dat wt der aerden wast.

11

Dus tiden wech van dans maechscap van saraa ende esthaol ses hondert mannen ghewapent mit stridende wapen:

12

ende si ghinghen op ende bleuen in iudas cariathiarim welke stede van dier tijt voert gheheten wort dans casteel.

13

Ende van daer ghinghen si ouer in ephrayms berch. Ende doe si tot mychas huus ghecomen waren:

14

so seiden die vijf mannen die eerst gesonden waren om tlant van lais te bespien tot haren anderen brueders Weet dat in desen husen is een ephod ende een theraphim ende een afgods beelde. Besiet wat v genoecht?

15

Ende doe si een luttel in een zide ghekeert waren soe ghinghen si in des leuijts in des ionghelincs huus die in mychas huus was. ende si groeten mit payseliken woerden:

16

ende die ses hondert mannen stonden voer die doer alsoe si ghewapent waren.

17

Ende die in des ionghelincs huus ghegaen waren. Sij pijnden hem wech te draghen den afgod ende dien ephod ende theraphim: ende die paep stont voer die dore: daer die ses hondert man niet verre en ontbeiden

18

Ende die ghene dier inghegaen waren brachten dat ephod ende die beelden ende die afgod. Ende die paep seide hem Wat doe di?

19

Si antwoerden hem. Swijch ende leg den vingher op dijn mont: ende com mit ons: dat wi di tot enen pape ende te enen vader hebben mogen Wat is di beter dattu pape sijs in eens mans huus: ofte in eens gheslachts ende ene familie in israhel?

20

Doe hi dit hoerde so consenteerde hi haren woerden: ende

[p. *338]

hi droech die ephod ende die beelden ende den afgod ende hi tide mit hem wech.

21

Ende doe si wech tiden ende sij voer hem deden gaen die cleyne kinderen ende die beesten ende al dat preciose was

22

ende doe si te hant verre van mychas huus waren: die mannen die in michas huus woenden volgheden hem na al ropende:

23

ende si begonsten achter haren rugghe te ropen. Ende doet dese mannen ansaghen so seiden sij tot mycham. Wat wiltstu? Waer om roepstu?

24

Hi antwoerde. Ghi hebt genomen mine gode die ic mi ghemaect hebbe ende minen paep ende al dat ic hebbe: ende gi segt wat wiltstu?

25

Ende dans kinderen seiden hem. Wachti dat tu niet meer tonswaert en spreecste: dat te di niet en comen mannen van grammen moede: ende dattu dan veruaerste mit al dijn huus.

26

Ende aldus tiden si voert den wech die si begonnen hadden. Ende doe mychas sach dat si stercker waren dan hij: soe keerde hi weder in sijn huus.

27

Ende die ses hondert mannen namen den pape ende dat wi voergheseit hebben: ende si quamen te lais ten rustende volke ende ten sekeren ende si sloghense in swaerts mont: ende sij leuerden die poorte den brande

28

ende hem en brachte nyemant salcoers: om dat si verre woenden van sydonen ende om dat si mit ghenen menschen en hadden gheselscap noch ghemeenscap. Ende dese stat was gesticht int lant van roab ende si stichtense weder ende woendenre binnen

29

ende si heten der stat naem dan na haers vaders naem die israhel wan die te voren lais heet.

30

Ende daer setten si den afgod: ende si maecten ionathan gersans soen die moyses sone was ende sinen sonen pape in dans gheslachte: totten daghe haerre gheuanghenisse.

31

Ende mychas afgod bleef mit hem al den tijt dat gods huus in sylo was. In dien daghen en was ne genen coninc in israhel