Bible in duytsche (Delftse bijbel 1477)

§ Ca xvij

1

TE dien tide was een man van ephrayms berghe die mychas heet:

2

ende hi seide sijnre moeder. Die dusent ende die hondert silueren penninghen diestu verscheiden hadste ende daerstu op swoerste dat icket hoerde. sich ic hebse: ende si sijn bij mi. Ende si antwoerde hem. Ghebenedijt moet mijn soen den here wesen.

3

Dus gaf hijse sijnre moeder weder: die hem gheseit had. Ic heb dit siluer geheylicht ende beloeft den here: ende mijn soen salt van mijnre hant ontfaen dat hi make enen afgod ghegroueert ende ghegoten ende nv so leuer ic dat di

4

Ende hi gafse sijnre moeder. Ende si nam twe hondert silueren penninghen ende gafse enen siluersmit: dat hi haer daer of maken soude enen afgod die in mychas huus was.

5

Ende hi consacreerde oec in sijn huus een capelleken: ende hi maecte enen ephod ende theraphim: dat is een papen cleet ende beelden. Ende hi veruolde ene sijnre sonen hant: ende hi wort sijn pape.

6

In dien daghe en was ne ghene coninc in israhel: mer elc dede dat hem gherechte dochte.

7

Een ander ionghelinc was in die tijt van bethleem iuda ende van mychas maechscap: ende hi was leuijt ende hi woende daer.

8

Ende hi ghinc vter stede van bethleem: ende woude varen wonen so waer dat hem oerbaerlijc dencken soude. Ende doe hi gaende comen was in ephrayms berge ende hij een luttel afgekeert was in michas huus:

9

so vraechde hem mychas waen coemstu Hi antwoerde ic ben een leuijt van bethleem iuda: ende ic ga om te wonen soe waer dat ic sal moghen ende ic sien sal waer dattet mi oerbaerlijc wesen sal.

10

Ende mychas seide woen mit mi ende wes mijn vader ende pape: ende ic sal dij elcx iaers geuen tien silueren penninghen ende een dubbel cleet: ende dat dijn behoefte wesen sal ter lijftocht.

11

Hij consenteerdet ende bleef biden man: ende hij was hem bij na als een van sinen sonen.

12

Ende mychas vollede sijn hant: ende hij had mit hem een kint te enen pape:

13

ende hi seide nv weet ict dat mi god wel doen sal: om dat ic enen paepe hebbe van leuijs gheslachte.