Bible in duytsche (Delftse bijbel 1477)

§ Capittel. .xvi

1

SAmpson ghinc wech te gazam endi hi sach daer een ghemeen wijf: ende hi ginc tot haer in.

2

Doe dat die philistinen ghehoerden ende het vermaert wort onder hem. dat samson in die poort gecomen was: so omleiden si hem ende si lieten wachters in die poort vander stat: ende si onbeiden alden nachte al swigende dat si hem smorghens als hi wt comen soude dootslaen souden

3

Ende dus bleef samson slapende totter middernacht: ende hi stont van daer op ende hi gegrepe beide die doren vander poorte mitten stilen ende mitten slote: ende hij leidse op sine scouderen ende hij droechse opten top vanden berghe die hebron scouwet.

4

Hier na minde hi een wijf die woende in die valeye soreth: ende men heetse dalila.

5

Ende die princen vanden philistinen quamen tot haer ende seiden Bedrieghen ende verneme van hem waer in dat hi so grote crachte heuet: ende hoe wi hem sullen moghen verwinnen ende gevangen quellen. Ist dattu dit doetste: so sullen wij v gheuen elc onser dusent silueren penninghen.

6

Hier om sprac dalila tot samson. Ic bidde segt mi waer in is dijn alte grote starcheit: ende wat ist daermen di mede binden soude dattu niet en soutste moghen breken.

7

Ende samson antwoerde haer. Worde ic gebonden mit seuen senuen zeelen van peseriken die noch niet droech en waren ende noch vuchtich so soude ic cranc wesen als ander menschen.

8

Ende die barone vanden philistinen brachten tot haer seuen zeelen als si gheseit had: ende si banten daer mede

9

ende bi haer waren lagen geborghen in een camer: ende wachteden van dier dinc. Ende twijf riep. Samson die philistinen comen op di. Ende hij brac die banden also yemant een gesponnen draet van werke ontween trect ofte van weuele alse hi die hette vanden vyer ontfaet: ende men en wiste niet waer in sijn stercheit was.

10

Ende dalila seide tot hem Sich du hebtste mi bespot: ende hebste gelogen. Seg doch nv waer mede men di binden sal.

11

Samson antwoerde haer Waer ic ghebonden mit nyewen zeelen die noeyt in werke en quamen: soe soude ic cranc wesen den anderen menschen gelike

12

Dalila banten hier echter mede: ende riep samson die philistinen comen opdi: ende hadde die lage geleit in een camer. Ende hi brac die bande oft een webben draet hadde gheweest.

13

Ende dalila seide echter tot hem. hoe lange sultstu mi bedrieghen ende valsche spreken? Wijse mi waer mede men di binden sal. Samson antwoerde haer. Ist dattu seuen haren van minen hoefde vlechtes mit een strenghe weefdraets ende du dit om een stake bintste ende in die aerde slaetste: so sal ic cranc wesen.

14

Doe dalila dit ghedaen hadde: so seide si tot hem. Samson die philistinen comen opdi. hi stont op vanden slape ende hij trac den stake wt mitten hare ende mitter strenghen weuels.

15

Ende dalila seide tot hem Hoe moechstu seggen datstu mi minste als dijn herte mit mij niet en is.

[p. *335]

Du hebste mi driewaruen gheloghen: ende du en wiltste mi niet seggen waer in dijn alte grote starcheit is.

16

Ende doe sij hem niet mit gemake en liet ende si hem veel dagen eenpaerliken anlach. ende sij hem ne ghene spacie te rusten en gaf: soe gebrac sijn ziel: ende wort vermoeyt totter doot.

17

Doe antwoerde hi der waerheit vander dinc ende seide tot haer. Noeyt en quam op mijn hooft yser: want ic ben nazareus dat is den here gheconsacreert wt mijnre moeder buyc. Worde mijn hooft gescoren so soude mijn stercheit van mi gaen ende sal cranc worden: ende ic sal wesen als die ander menschen.

18

Doe dalila sach dat hi alle sine sin geseit had. Soe sant si totten princen van den philistijm ende ontboot hem. Coemt hier noch eens: want nv heeft hij mij sijn herte ondaen. Ende si ghingen daer ende namen tghelt mit hem dat sij belooft hadden.

19

Ende dalila deden slapen op haer knyen. ende dede hem sijn hooft op haren scoot legghen. Ende si riep een baertmaker ende si scoer die seuen haren van sinen hoefde: ende si begontsten van haer te werpen ende van haer te steken. Ende te hant soe ginc die starcheit van hem.

20

Dalila seide. Samson die philistinen comen op di. Ende hi stont op vanden slape ende seide in sijn herte. Ic sal wtgaen alsoe ic te voren dede ende ic sal mi verscudden ende hi en wiste niet dat die here van hem ghegaen was.

21

Ende doen die philistinen gheuaen hadden so staken si hem te hant die oghen wt: ende si voerden te gazam gebonden mit kethenen: ende si sloten in een kerker ende daden malen.

22

Ende te hant begontste sijn haer weder te wassen:

23

ende die princen vanden philistinen vergaderden in een om dat si offeren souden grote hostien dagon haren afgod ende dat si werscepen souden ende si seiden: onsen god heeft samson onsen viant gheleuert in onsen handen.

24

Doe tvolc dit sach so louede tvolc oec sinen god: ende seiden dat selue Onsen god heuet onse wedersake gheleuert in onsen handen: die onse lant heuet afghedaen: ende veel luden versleghen.

25

Ende si verbliden in haren werscap. ende doe si te hant spise ghegeten hadden so beualen si datmen samson ropen soude: dat hi voer hem spelen soude: Ende doe hi vten karker gebracht was so speelde hi voer hem luden. ende si deden staen tusschen die twe colommen.

26

Ende samson seide totten kinde datten leide. Laet mi: dat ic die colummen genaken mach daer al thuus op leit: ende icker op mach lenen ende een luttel rusten.

27

Want thuus was al vol wiuen ende mannen: ende alle die princen vander philistinen waren daer: opt dacke ende opten solre waren omtren drie dusent man ende wiue ende die saghen samson spelen.

28

Ende samson anriep den here ende seide. Here mijn ghedenct mijns: ende gheeft mij nv mijn eerste starcheit mijn god dat ic mi wreken moghe van minen vianden: ende dat ic een wrake ontfaen mach van minen verliese van minen twe lichten

29

Ende hi begreep beide die colummen daer thuus op hinc: ende hi hielt die een mitter rechterhant ende die ander mitter slinckerhant

30

ende seide mijn ziel moet

[p. *336]

steruen mitten philistijnen. Ende hi hurte starckeliken die colummen te samen ende thuus viel op alle die princen ende op alle die ander menichte die daer was. Ende hi dodere veel meer steruende: dan hi te voren leuende ghedoot hadde.

31

Ende sijn bruederen ende al sijn geslachte quamen neder ende namen sinen lichame: ende grouense tusschen saraa ende estahol in sijns vaders gracht manue ende samson vonniste israhel twintich iaer