Bible in duytsche (Delftse bijbel 1477)

§ Capitte .xiij

1

EChter deden die kinder van israhel quaet in sheren aenscouwen: ende hi leuerdese inden philistinen handen veertich iaer.

2

Ende een man was van saraa ende van dans geslachte die manue heet ende had een ondrachtich wijf:

3

ende sheren engel openbaerde haer: ende seide haer toe. Du biste ondrachtich ende sonder kindrre: mer du sultste gebaren ende ontfaen enen soen.

4

Wachte di daer om dattu ne genen wijn en drincste noch clareite noch en eet niet onsuuers:

5

want du sultste ghebaren ende ontfaen enen soen: ende sinen hoefde en sal ne gene scare ghenaken. Want hi sal van sijnre kintsheit wt sijnre moeder buyc gods nazareus wesen: ende hi sal israhel beginnen te verlossen vander philistijm hant.

6

Ende doe si te haren manne comen was: so seide si hem Een gods man quam te mi die een engelic aensicht hadde: seer veruaerlijc. Ende doe ic hem geuraghet hadde wie hi waer ende wanen hi comen waer ende mit wat namen hi heete so en woude hijs mi niet seghen:

7

mer hij antwoerde mi dit. Sich du sultste gebaren ende ontfaen enen soen. Ende wachte di dattu ne ghenen wijn en drinckes noch clareyte: noch en eet gheen onsuuer dinc. Want tkint sal gods nazareus wesen van sijnre kintsheit wt sijnre moeder buyc: totten dage sijnre doot

8

Ende manue bat dus den here ende seide. Ic bidde here dattie gods man die du sendeste wedercome: dat hij ons lere wat wij doen sullen vanden kinde datter geboren worden sal.

9

Ende die here ghehoerde manue bedinge: ende echter openbaerde gods engel sinen wiue daer si inden acker sat. Mer manue haer man en was mit haer niet.

10

Ende doe si den enghel ansach so haestese haer ende quam te haren man: ende boetscapte hem ende seide Sich die man is mi geopenbaert dien ic te voren sach.

11

Ende hi stont op ende volgede sinen wiue: ende doe hi ten man quam so seide hi hem. Bistu die ten wiue gesproken hebste? Ende hi antwoerde. ic bent.

12

Ende manue seide hem. Als dine redene voldaen wesen sal: wat wiltstu dat tkint doe ofte waer of salt hem wachten?

13

Ende sheren engel seide tot manue. Van alle dien dat ic in dinen wiue gesproken hebbe salse haer wachten:

14

ende so wat vanden wijngaert wast en sal sij niet eten: ende wijn ende claereyt en sal si niet drincken noch ne gene onsuuer dinc en sal si eten. ende dat ic haer beuolen heb dat sal si voldoen ende wachten.

15

Ende manue seide tot sheren enghel. Ic bidde di dattu mine bede doen wiltste: ende wi sullen di maken enen hueken vanden

[p. *331]

gheiten.

16

Ende die enghel antwoerde. Al dwincstu mi ic en sal dijn broden niet eten: mer wiltstu holocauste doen so offert den here dat. Ende manue en wiste niet dat dit sheren enghel was.

17

Ende manue seide hem wat is dijn name: dat wi di eren moghen als die reden voldaen sal wesen?

18

Ende die enghel antwoerde hem. Waer om vragestu minen name die wonderliken is?

19

Ende dus brachte manue enen hueken vanden gheyten ende libamente: ende leidet opten outaer ende offerdet den here die wonder duet. Ende hi ende sijn wijf saghenre op.

20

Ende doe die vlamme vanden outaer op ghinc inden hemel: so voer sheren engel oec op in die vlammen. Ende doe dit manue ende sijn wijf saghen so vielen si langes op die aerde:

21

ende voert soe en openbaerde hem sheren enghel niet. Ende te hant verstont manue dat sheren engel was:

22

ende hi seide tot sinen wiue. Wij sullen die doot steruen: want wi hebben gode gesien.

23

Ende twijf antwoerde. Wilde ons die here doden. so en soude hi van onse hande gene holocauste noch libamente hebben ontfaen: noch hi en soude ons al dit niet hebben getoent. noch en soude ons niet hebben geseit dat toe te comen is

24

Dus gebaerde twijf enen soen ende si heet sinen naem samson. Ende tkint wies ende god benedidet:

25

ende sheren geest begontste mi hem te wesen in dans getelden: tusschen saraa ende asthaol