Bible in duytsche (Delftse bijbel 1477)

§ Ca .xii.

1

SIet in ephraim wort ghestrijt. Want si quamen ouer ieghen tnoerden ende seiden tot iepthe Waer om en woutstu ons niet ropen doestu ten stride ghincste ieghens ammons kinderen: dat wij mitti gheuaren hadden? Hier om sullen wi dijn huys verbarnen.

2

Ende hi antwoerde hem. Mi ende den volke was haestelijc grote oerloghe ieghen ammons kinderen: ende ic riep v dat ghi mi salcoers gheuen sout: ende ghi en wouts niet doen.

3

Doe ic dit sach so sette ic mine ziele in mijne hande: ende ic ghinc tot anmons kinderen: ende die here leuerdse mi in mijnen handen. Wat heb ic verdient: dat ghi ieghen mi opstaet ten stride?

4

Ende iepthe riep tot hem alle die mannen van galaad ende vacht ieghen ephraym. Ende die mannen van galaad versloghen ephraim. want hi hadde gheseit galaad is balling van ephraym ende woent in midden van ephraym ende van manasse

5

die van galaad beleiden die ghewade vander iordanen aldaer ephraym wederkeren soude. Ende als daer yemant quam gheulouwen van ephrayms ghetale. ende hi seide. ic bidde dat ghi mi laet liden ouer: soe seiden hem die van galaad. Bistu ene van ephraym? Ende als hi seide neen ic:

6

soe vraechden si hem Segt dan sebboleth: dat bediet een coren aer. Die thebboleth antwoerden: ende mitter seluer litteren dat coren aer niet en mochten volmaectelijc ghesegghen: die ghegrepen si te hant ende doden opten ouerganc vander iordanen Ende in dien tiden vielenre van ephraym twe ende veertich dusent.

7

Ende iepthe van galaad vonniste israhel ses iaer ende hi starf ende is begrauen in sine stede in galaad.

8

Na iepthe vonniste israhel abessan van bethleem

9

die dertich sonen hadden ende also vele dochteren. Ende hi bestadese buyten ende gaf hem manne: ende alsoe vele van ghetale nam hij

[p. *330]

wijue te sijnre sonen behoef: ende hij brachtse in sijn huys Ende hi vonniste seuen iaer israhel:

10

ende hi is doot ende begrauen in bethleem.

11

Na abessan volgede ahyalon van zabulons gheslachte. ende hij vonniste israhel tien iaer:

12

ende hi starf ende is begrauen in zabulon.

13

Na ahialon so vonniste israhel abdon hellels soen van pharaton

14

ende hi had veertich sonen ende dertich neuen wt hem die reden tseuentich ezelinnen volene. ende hi vonniste israhel acht iaer:

15

ende hij starf ende is begrauen in pharaton van ephrayms lande inden berge amalech