Bible in duytsche (Delftse bijbel 1477)

§ Capittel .xi.

1

IN dien tiden was yeptha van galaad een alte starcken man ende een vechter ene lichts wijfs sone: diegeboren wort van galaad.

2

Want galaad had een wijf daer hi sonen of ontfinc ende na dien dat si ghewassen waren so verdreuen si iepthe ende seiden. Du en sultste ghene oec mogen wesen in ons vaders huys: want du biste gheboren vander moeder eenre ouerspelinne.

3

Ende iepthe vloe van hem ende scuwedse ende woende int land van thob Ende te hem worden vergadert die mate manne ende rouers: ende sij volgheden hem na als haren prince.

4

In dien daghe vochten ammons kinderen ieghen israhehel.

5

ende als sijse so starckrlike aenvochten. so tiden die meeste van gheboerte van galaad dat si iepthe brengen souden in hare hulpe vten lande van thob

6

Ende si seiden tot hem. Com ende wes onse prince: ende vechte ieghen ammons kinderen.

7

Ende iepthe antwoerde hem. En sidi niet die mij hatet ende hebt mi verdreuen wt mijns vaders huys: ende nv comdi te mi ghedwongen van node?

8

Ende die princen van galaad seiden tot iepthe. Om dese sake comen wi nv totti dattu nv mit ons varen sultste: vechten ieghen ammons kindere: ende om dattu leidsman wesen sultste van alden ghenen die in galaad wonen.

9

Iepthe seide tot hem. Of ghij waerlike comen sijt te mi ende dat ic ouer v vechten sal ieghens ammons kinderen. ende leuerdese die here in mijnen handen: sal ic v prince wesen?

10

Si antwoerden hem. Die here die dit hoert hi is middelaer ende oerconde: dat wij onse belofte doen sullen.

11

Ende aldus ghinc iepthe wech mitten princen van galaad. ende alt volc maecten prince van hem luden. Ende iepthe sprac alle sine woerde in maspha voer den here.

12

Ende hi sant boden totten coninc van ammons kinderen. Die tot sijnen persone segghen souden. Wat is mi ende dij dattu ieghen mi comen biste dattu mijn lant woesten soutste?

13

Ende die coninc antwoerde den boden. Want israhel nam mine lant doe hi opquam vte egipten: vanden eynde van arnon tot in iaboc ende totter iordanen. Daer om soe geeftet mi nv weder mit paeyse.

14

Ende iepthe ontboet hem echter bij desen bode: ende hi beual hem dat hi den coninc van ammon segghen soude

15

Dit seit iepthe Israhel en nam moabs lant niet noch ammons kinderen lant:

16

mer doe si opquamen wt egipten soe wandelden si doer die wildernisse totter roder zee: ende si quamen in cades.

17

Ende si sonden boden totten coninc van edom ende seiden. laet mi liden doer dijn lant

[p. *328]

Ende hi en wilde haer bede niet oerlouen. Daer om sant hi totten coninc van moab ende hi veronwaerde hem oec den ouerlijt te gheuen. Ende aldus bleef israhel in cades:

18

ende ghinc an dene zide tlant van edom omme ende tlant van moab. Ende hi quam ieghen die oestzide slants van moab ende si sloghen tenten ouer arnon: ende hi en wilde niet comen binnen den termine van moab. Want arnon was teynde slants van moab.

19

Ende doe sant israhel boden tot seon den coninc vanden amorreen die in esebon woende: ende si seiden. Laet mi liden doer dijn lant totter riuieren

20

Ende si versmaden oec israhels woerden ende en liet israhel niet liden dore sijn lant:: mer hi vergaderde ene ouertallike menichte ende hij quam ieghen hem vte in yasa ende wederstonten starckelike.

21

Ende die here leuerden in israhels handen mit alle sine here ende hi versloechen: ende besat al des amorreus lant ende die int lantscap woenden.

22

ende alle deynden van arnon tot iaboc: ende vander wildernisse totter iordanen.

23

Die here god van israhel warpe auerecht den amorreen die ieghen dat volc van israhel vacht. ende wiltu nv besitten sijn lant

24

Dat thamos dijn god besittet ten is dine niet sculdich te sine van rechte? Dattie here onsen god mitten zeghe behouden heeft: dat valt in onser possessien.

25

En si dattu beter biste dan balac sephors sone die coninc van moab. ofte en si dattu gemaken moghes dat hi ghestreden heeft ieghen israhel ende gheuochten ieghen hem

26

doe hi woende in esebon ende in sijnen weghen ende in aroer ende in sijnen weghen: ende in alle die steden neuen die iordanen binnen drie hondert iaren? Waer om en hebtstu in dus langhen tijt niet ghepijnt om dese dinghen te eyschen.

27

Aldus soe en sondige ic niet teghen di: mer du duetste quaet ieghen mi. dattu mi ongherechtighen strijt op brencste. Die here die vonnisser van desen saken hi moet vonnissen in desen daghe tusschen israhel ende ammons kinderen.

28

Ende die coninc van ammons kinderen en woude niet gehoren na iepthe woerden die hi biden bode ontboden hadde.

29

Ende op iepthe wort sheren gheest: ende hi omghinc galaad ende manasses maspha ende galaad ende hi ghinc van daer ouer te ammons kinderen

30

ende hi beloefde den here ene belofte seggende. Ist dattu in minen handen leuerste ammons kinderen:

31

soe wie dat eerst comen sal vter dore van minen huys. ende mi te ghemoete coemt als ic weder comen sal mit paeyse van ammons kinderen ic sallen den here offeren in holocauste.

32

Ende iepthe ghinc ouer tot ammons kinderen om dat hi ieghen hem vechten soude: ende die here leuerdese in sijne handen:

33

ende hi sloechse van aroer tot dat men coemt in mennith twintich steden: tot abel die al om en tomme mit wijngaerde beset is mit harden groten plaghen: ende ammons kinderen worden veroetmoeditht vanden kinderen van israhel

34

Ende doe iepthe te sijnen huyse waert wederkeerde in maspha: so quam hem te ghemoete sijn eengeboren dochter mit tamburen ende mit reyen. Want

[p. *329]

iepthe en hadde ne gene ander kinder

35

Doe hise sach. Scuerde hi sine cleder ende seide. Ay mi dochter mijn: du heueste mi bedroghen. ende du biste selue bedroghen. Want ic heb mijnen mont op ghedaen ten here waert: ende ic en sal niet anders moghen doen.

36

Ende si antwoerde. Vader mijn. oftu dijnen mont op hebste ghedaen ten here waert. soe doch mi dattu beloeft hebste: om datti ghegheuen is die wrake ende die zeghe van dijnen vianden.

37

Ende si seide totten vader. Verlene mi dit allene dat ic dij bidde. Laet mi dat ic twee maende die berghe omgaen mach: ende dat ic minen maghedom bewenen mach mit minen gespelinnen.

38

Ende iepthe antwoerde. Ganc Ende hi lietse twee maenden gaen. ende doe si wech ghegaen was mit haren ghespelinnen: soe beweendense haren maghedom inden berghen.

39

Ende doe die twee maentden voldaen waren so keerden si weder tot haren vader: ende hi dede haer also hi beloeft hadde die welke ne ghene man en bekende. Ende van dier tijt rees een castume in israhel ende men hielt dese zede:

40

dattie dochteren van israhel naden omlope vanden iare vergaderden in een ende dat si vier daghen beweenden iepthen dochter van galaad