Bible in duytsche (Delftse bijbel 1477)

§ Ca .x.

1

NA abymelech soe stont op in israhel leidsman thola phua soen die abymelchs soen was ene man van ysachar. die in sanir woende in effrayms bech:

2

ende hi vonniste israhel drie ende twintich iaer ende hi starf ende was begrauen in sanir.

3

Na thola regneerde iayr van galaad ende hi vonniste israhel twe ende twintich iaer:

4

ende hi hadde dertich sonen die op dertich ezels volene saten ende princen waren van dertich steden: die na sinen name genoemt sijn auothiair dat is iayrs poorte tot in desen daghe int lant van galaad.

5

Ende yair starf ende hi is begrauen in die stat diemen hiet camon.

6

Ende die kinder van israhel daden nyewe sonden tot haren ouden sonden ende daden quaet in sheren aenscouwen: ende hi diende baalim ende astharoth ende der goden van syrien ende van sydonen ende van moab ende van ammons kinderen ende van philistijm: ende sij lieten den here ende en oeffendenden niet.

7

Ende die here wort ieghen hem vergramt ende leuerdse inder plilistinen hande. ende in ammons kinder hande:

8

ende si worden alte sere ghequelt eende tonderghedaen achtien iaren alle die woenden ouer die iordane in amorreus lant dat in galaad is.

9

also sere dat ammons kindere ouer die iordane toghen ende woesten iuda ende benyamin ende ephraym. Ende israhel was harde sere ghequelt

10

ende si riepen ten here ende seiden. Wi hebben di ghesondicht: want wi hebben onsen god ghelaten ende hebben baalim ghedient.

11

Ende die here seide hem En quelden v niet die van egipten ende die amorreen ende ammons kinderen ende die philistijm

12

ende die van sydonen ende amalech ende oec chanaan. ende ghi riept te mi ende en heb ic v niet verlost van haren handen?

13

Ende nochtan hebdi mi ghelaten: ende hebt vreemde goden gheloeft ende gheoeffent. Hier om en sal icker niet toedoen dat ic v mere verlossen sal.

14

Gaet aenroept die gode die ghi ghecoren hebt. si sullen v verlossen in dien tiden des vernoys.

15

Ende die kinder van israhel seiden totten here. Wi hebben ghesondicht: ghelde du ons soe wat datti ghenoghet: allene verlosse ons nv.

16

Ende doe si dit seiden soe worpen si wt haren lande al die beelden

[p. *327]

van vreemden goden: ende si dienden den heer haren god: ende hi hadde rouwe op haer catiuichede.

17

Ende ammons kinderen riepen te hope ende si sloghen tenten in galaad: ende die kinder van israhel vergaderden ieghen hem. ende sloghen tenten in maspha.

18

Ende die princen van galaad seiden elken tot sijnen naesten. Soe wie dat van ons luden eerste sal beghinnen te vechten ieghen ammons kindere. Hi sal leydsman vanden volke van galaad wesen.