Bible in duytsche (Delftse bijbel 1477)

§ Ca .viij

1

ENde die mannen van ephraym seiden tot hem. Wats dit dattu doen woutste: dattu ons niet en riepste doe du te stride waert tides iegen madyan? Ende si stonden starckelijc op ende hadden hem bina ouerlast gedaen.

2

Ende gedeon antwoerde hem Wat mochte ic so grote dinc doen: als ghi ghedaen hebt. En is een wijndruue van ephraym niet beter dan abyezers wijngaerts ghehele is altemale.

3

Want die here heuet in uwen handen geleuert die princen van madyan oreb ende zeb. Wat dinc mochte ic so grote doen als ghi ghedaen hebt? Ende doe hij dit ghesproken hadde: soe gherustede haer gheeste daer si mede verhouaerdicht waren ieghen hem.

4

Ende doe gedeon totter iordanen comen was so ghinc hi daer ouer mit drie hondert mannen die mit hem waren die van moetheden hem niet geuolgen en mochten die gene diere vlouwen.

5

Ende hi seide totten mannnen van soccoth ic bidde v gheeft den volke datmit mi is broot want sij sijn seer ghecranct. dat wij den coninghen van madyan zebee ende salmana na volghen moghen.

6

Ende die princen van soccoth antwoerden machschien so zijn zebee ende salmana handen in dijne hant: ende hier om eysschestu dat wi dinen heere broot gheuen sullen.

7

Ende gedeon seide. Als die here in mine hande sal hebben geleuert zebee ende salmana ende ic wederghekeert sal wesen mitten zege in paeyse: so sal ic v vleysche verbarnen mit doornen ende mit distelen vander wildernissen.

8

Ende gedeon ghinc van daer in phanuel: ende hi sprac totten mannen van dier stat oec des ghelike. Ende si antwoerden hem oec. also die mannen van soccoth gheantwoert hadden.

9

Ende hi seide hem oec aldus. Als ic wederghekeert sal wesen mitten zeghe in paeyse: so sal ic desen toerne breken.

10

Ende zebee ende salmana laghen ende rusten mit haren heere. Want van alden betaeldien waren ouerbleuen vijftien

[p. *322]

dusent mannen vanden volke van oest ende daer waren verslegen hondert dusent ende twintich dusent vechters die zwaerden wt toghen.

11

Ende gedeon ginc al haren wech die in tenten laghen ter oest ziden van nobe ende iechaa: ende hi sloech haer ghetelde die seker waren ende die ne ghene wederstoet en waenden hebben:

12

ende zebee ende salmana vlouwen ende gedeon volgede hem ende vincse als hi al haer heere ghestoort had

13

Ende doe hi wederkeerde vanden stride voer der sonnen opganc

14

soe vinc hi een kint van den mannen van soccoth ende vraechde hem na die mannen der princen ende der ouderen van soccoth. Ende hi bescreef seuen ende tseuentich mannen.

15

Ende hi quam tot soccoth ende seide hem. Siet hier zebee ende salmana daer gi mi of verweet ende seit machschien so sijn zebee ende salmana handen in dine hant: ende hier om hietstu dat wij den mannen die moede sijn. broot gheuen sullen.

16

Dus nam hi die ouders vander stat ende doorne ende distele vander wildernissen: ende verbrande ende te nyete maecte daer mede die mannen van soccoht.

17

Ende oec warp hij den toren phamuel auerecht ende sloech doot die in die stat woenden.

18

Ende hi seide tot zebee ende salmana. Hoe dane waren die mannen die gi doot sloecht in thabor? Si antwoerden. Si waren dij ghelijc. ende die ene van hem was als een conincs soen.

19

Ende hi seide hem Het waren mine bruederen: mijnre moeder sonen. Leeft die here: want haddise ghehouden so en soude ic v niet doden.

20

Ende hi seide tot iether sinen eerstgeboren soen Stant op ende slaetse doot. Ende hi en trac tswaert niet wt. hi onsach hem want het was noch een kint.

21

Ende zebee ende salmana seiden. Stant du op ende val in ons: want na die outheit soe is eens mans stercheit. Ende gedeon stont op ende sloech doot zebee ende salmana: ende nam die ornamente ende die sciuen daer men die coninghen kemels halsen mede pleghet te cyeren.

22

Ende alle die mannen van israhel seiden tot gedeon Wes here bouen ons du ende dijns sonen sonen: om dattu ons verlost hebtste van madyans hant.

23

Ende gedeon antwoerde hem Ic en sal ne gheen here wesen bouen v noch oec mijnen zonen mer die here god sal heerscappie hebben bouen v.

24

Ende hi seide tot hem. Een heissche. heyssche ic van v luden. Gheeft mi die inauren van uwen roue. Want die ysmaheliten pleghen gulden inauren te hebben.

25

Si antwoerden. Wij sullense v alte gaerne gheuen. Ende si spreden enen mantel op die aerde: ende si worpenre op die inauren vanden roue:

26

ende tghewichte van den inauren die hi geheysschet hadde waren dusent ende seuen hondert cyclen gouts. al sonder die ornamente ende die hecselen ende die purpure clederen die die coninghen van madyan plegen te besigen: ende al sonder die gulden halsbanden der kemelen.

27

Ende gedeon maecter of een ephod: ende sette dat in sijn stede ephra Ende al israhel worter in vernoeyeert: ende het wort gedeon ende al sijn huys in valle.

28

ende madyan wort veroetmoedicht voer die kinder van israhel ende si en mochten voert meer haer necken niet

[p. *323]

op heffen: mer tlant ruste veertich iaer inden welken gedeon bouen tvolc was.

29

Ende aldus ghinc ierobaal ioas soen wech ende woende in sijn huus:

30

ende hi had tseuentich sonen die wt sijnre stam ghecomen waren: om dat hi had veel wiuen

31

Mer sijn vriendinnen die hi hadde in sychem si ghebaerde hem enen soen die abymelech heet.

32

Ende gedeon ioas soen starf in gueder outheit: ende hi is begrauen in sijnre vader gracht ioas in ephra van ezdri familien.

33

Ende na dien dat gedeon doot was so keerden die kinder van israhel achterwaert: ende vernoeyeerden mit baalim. Ende si sloghen beloften mit baal dat hy hem een god wesen soude:

34

ende sij en verdachten sheren haers gods niet diese van alle haer vianden handen verlost hadde al om en tomme:

35

noch sij en hadden ne gene ontfermenisse mit ierobaals huse die oec gedeon heet na alt guet dat hi israhel ghedaen hadde