Bible in duytsche (Delftse bijbel 1477)

§ Capit .vij

1

IErobaal die oic gedeon heet stont op bi nachte ende al tvolc mit hem ende hi quam ter fonteynen diemen heet arad. Ende madyans ghetelde waren in die valeye ter noortzide vanden hogen berghe.

2

Ende die here seide tot gedeon. Veel volcs is mitti: ende madyan en sal in dinen handen niet gheleuert worden. dat hem israhel niet en verheffe ieghen mi ende segge ic bin mit mijnre crachte verlost.

3

Spreect totten volke ende segt daer sijt alle horen. Die ondadich ende veruaert is hi keer weder? Dus keerdenre weder vanden berghe galaad: ende ghingen wech vanden volke twee ende twintich dusent mannen: ende het bleeffer alleen tien dnsent

4

Ende die here seide tot gedeon. Noch is hier veel volcks. Leitse ten watere ende daer sal icse prouen: ende van dien dat ic di segghen sal dat hi mitti gae hi sal mede gaen: ende die ic verbieden sal te gaen hi sal wederkeren.

5

Ende doen tvolc nedergegaen was ten watere: soe seide die here tot gedeon. Die mitter hant ende mitter tonghen twater lecken sullen. also die honden pleghen te lecken. die sultstu besiden scheiden: mer die al knyelende drincken sullen. die sullen in die ander zide wesen.

6

Aldus was tge-

[p. *320]

tal vanden ghenen die twater mitter hant te monde waert worpen ende mitter tonghe licten drie hondert mannen want alle die ander menichte. had al knyelende gedroncken.

7

Ende die here seide tot gedeon. Inden drie hondert mannen die water licten so sal ic v verlossen ende ic sal madyan in dijn hant leueren: ende alle die ander menichte keere weder te hare stat.

8

Dus nam gedeon na tghetal spise ende trompen: ende hi dede alle die ander menichte wech gaen te haren voninghen waert: ende hij gaf hem mit dien drie hondert mannen te stride. Ende madyans ghetelde waren onder in die valeye.

9

Ende in dier seluer nachte seide die here tot gedeon Stant op ende ganc neder inden ghetelden: want ic hebse in dijn hant gheleuert

10

mer ontsietstu di allene te gaen: so ga phara dijn kint mitti neder.

11

Ende alstu horen sulste wat si spreken sullen dan sullen dine handen worden gestarct: ende du sultster te sekere nedergaen ten vianden ghetelde. Dus ginc gedeon neder hi ende phara sijn kint in een dele vanden ghetelden: daer die schilt wachte was vanden ghewapenden mannen.

12

Ende madyan ende al tvolc van oest ende amalech laghen ghestroeyt inder valeyen als een menichte van spelthanen: daer waren oec ouertallike kemels. gelijc den sande dat opten over vander zee is.

13

Ende doe gedeon daer ghecomen was so vertelde hi enen sinen gheselle sinen droem: ende in deser manieren vertelde hij dat hijt gesien hadde. Ic hebbe enen droem ghesien: ende mi dochte dat ic sach als een broot onder die asschen ghebacken van ghersten. wentelen ende nedercomen in madyans getelde Ende doet comen was tot die tabernacule soe hortet die tabernacule. ende warpt al ter neder ende ter aerden gestort so wortet gelijc.

14

Ende die gene daer hijt toe sprac die antwoerde. Dit en is anders niet sonder gedeon ioas soens zwaert dies mans van israhel. Want die here heeft madyan ende alle sijn getelde gheleuert in sine hande.

15

Ende doe gedeon den droom ghehoert hadde ende sine bediedenisse. so anbede hi: ende hij keerde weder totten ghetelden van israhel. ende hi seide. Stant op: want die here heuet in onse hande geleuert madians getelden.

16

Ende hi scheyde die drie hondert mannen in drien deelen. hi gaf hem trompen in haer handen: ende ydel aerden potten ende lichte in midden den potten.

17

Ende hi seide tot hem. Dat ghi mi sult sien duen dat duet. Ic sal opgaen in een vanden getelden: ende dat ic doen sal dat doet na.

18

Alse die trompe luden sal in mijn hant. so trompet oec al om ende tomme den getelden ende roept mede den here ende gedeon.

19

Ende die drie hondert mannen ghingen in een zide mit hem vanden getelden doe die waeck vander middernacht begontste: ende doe die wachters ghewect waren begonsten si gheruchte te maken mitten trompen ende si sloghen die potten onderlinge te gader.

20

Ende doe si al om en tomme den ghetelden in drie steden aldus trompten. ende si haer potten te broken hadden so hielden si haer lichtuate in die

[p. *321]

slincker hant ende mitter rechter hant trompten si ende riepen sheren swaert ende gedeons:

21

ende elc bleef staen in sijn stat al om en tomme den getelden vanden vianden. Ende aldus worden al die ghetelden ghestoert: ende al ropende ende geruchte makende so vlouwen si.

22

Ende die drie hondert man bleuen staende in haer stat haer trompen blasende. Ende die here sant tzwaert in alden ghetelden: ende si sloghen dene den ander doot al vliende al tot bethseca ende totten cante alblemeula in cebbath.

23

Ende die manne van israhel van neptalim ende van azer ende van al manasse riepen ende volgheden madian na. Ende die here gaf victorie den volc van israhel in dien daghen.

24

Ende gedeon sant bode in alden berghe van ephraym ende seide. Coemt neder in madyans ghemoete ende belegghet twater bethbera totter iordanen Ende al ephraym riep: ende beleiden die wateren tot bethbera ende totter iordanen

25

Ende si vinghen twe mannen van madyan. oreb ende zeb. ende dodense. oreb inden steen oreb. ende zeb in die wijnperse van zeb. Ende si volgheden madyan na: ende droghen orebs ende zebs hoefden tot gedeon ouer die riuiere vander iordanen.