Bible in duytsche (Delftse bijbel 1477)

Ca .vi

1

ENde die kinder van israhel deden quaet in sheren aenscouwen ende hi leuerdse seuen iaer in madians hant:

2

ende si waren van hem harde zeer tonder ghedaen. Ende si maecten hem duwieren ende holen inden berghe ende starcke steden om te wederstaen.

3

Ende als israhel ghesaeyt hadde so quam madian ende amalech ende dandere lude van oestwaert:

4

ende si sloghen onder israhel haer tenten ende si woestent al dat israhel gesaeit hadde alsoet groene stont totten inganc van gasa: ende si en lieten albedalle niet in israhel datter lijftochte toebehoerde: noch scape noch osse noch ezels.

5

Want si quamen ende alle haer cudden. mit haren tenten ende sie vernieldent al als spelthanen. een ouertallike menichte vanden menschen ende van kemels: ende si woestent al dat si ghenaecten.

6

Ende israhel was harde seer veroetmoedicht in madyans aenscouwen.

7

Ende si riepen totten here ende heyschten hulpe ieghen madyan.

8

Ende hi sant tot hem enen man enen prophete: ende seide tot hem. Dit seit die here god van israhel. Ic dede v opcomen wt egipten ende ic leide v vten huyse des dienstes:

9

ende ic verloste v van dier van egipten hant ende van alden ghenen die v quelden. Ende ic verdreefse tot uwen incomenne: ende ic heb v haer lant geleuert:

10

ende ic heb v gheseit. Ic bin die here v god. Ende en ontsiet dier van amorreen goden niet in welkere lant gij woent. Ende gi en wout mine stemme niet horen.

11

Ende sheren enghel quam ende sat onder een eyke die in efra was: ende si behoerde tot ioas die vader was van ezdri familien ende doe gedeon sijn soen dorsschede ende wande tcoren in een wijnperse om madian te vlien.

12

So openbaerde hem sheren engel: ende seide. Die

[p. *318]

here si mitte stercste der mannen.

13

Ende gedeon seide hem. Ic bidde here. of die here mit ons is. waer bi hebben ons dese quade dinghen begrepen? Waer sijn die wonderen die onse vaderen vertelden: ende seiden. die here leide ons wt egipten. Ende nu heeft hi ons ghelaten ende hi heuet ons gheleuert in madyans hant.

14

Ende die here anesachen ende seide. Ganc in desen dijn stercheit: ende du sultste israhel verlossen van madians hant Weet dat ic die ghesonden hebbe.

15

Ende hi antwoerde ende seide. Ic bidde here waer in sal ic israhel verlossen? Sich mine familie is die minste in manasse: ende ic bin die minste in mijns vaders huys.

16

Ende die here seide hem. Ic sal mitti wesen ende du sultste madian slaen als enen man.

17

Ende gedeon seide: of ic gracie voer di gheuonden hebbe soe geef mi een teiken datttuut biste die iegen mi sprekes:

18

ende en ga niet wech van hier tot dat ic totti wederkeren sal ende brengen sacrificie dat ict di offere. Hi antwoerde. Ic sal ontbeiden dijnre coemste

19

Ende gedeon ginc binnen ende koecte een hueke ende biec derue broot van een maetken meels ende hi leide tvleysch in enen korf. ennde tsop vanden vleysche dede hi in enen potte. ende hij droecht al onder die eyke: ende settet voer hem.

20

Ende die enghel seide hem. Neem tveysch ende die derue brode ende legtet op dien steen: ende stortert tsop bouen op Ende doe hi also ghedaen had.

21

soe stac die enghel vander roede een rinde wt die hi in die hant hielt. ende ghenaecte tvleisch ende die derue broede ende tvyer stijchde op vten steen: ende verbrande tvleisch ende die derue broede ende sheren engel voer wech wt sinen oghen.

22

Ende doe gedeon sach dattet sheren enghel was soe seide hi. Ay mi here god: want ic heb ghesien sheren enghel van aensichte te aensichte.

23

Ende die here seide hem. Paeys si mit di. Ende ontsich di niet du en sultste niet steruen.

24

Ende gedeon stichte daer den here enen outaer. ende heeten sheren paeys tot in desen daghe.

25

Ende doe hij noch in efra was die der familien ezdri is soe seide die here binnen dier nachte tot hem Neem dijns vaders stier ende den anderen stiere van seuen iaren. ende du sultste baals outaer breken die dijns vaders is. ende houwe den bossche of die omtrent den outaer is:

26

ende du sultste bouen dien steen daer du te voren sacrificie op leytste stichten enen outaer den here dinen god: ende du sultste nemen den anderen stiere ende du sultsten offeren ten holocausten op enen hoop houts die du vanden bussche hebste gehouwen

27

ende gedeon nam tien manne van sinen knapen mit hem: ende dede alsoe hem die here beuolen hadde. Mer om dat hi sijns vaders huys ontsach ende die lude vander poorte. soe en woude hijt sdaghes niet doen: mer hij voldeet al bi nachte

28

ende doe smorghens die mannen van sijnre poort opghestaen waren. so vonden si baals outaer te broken: ende die bussche afgehouwen: ende den anderen stier gheleit opten outaer. die daer toe ghemaect was:

29

ende si seiden onderlinghe. Wie heeft dit ghedaen. Ende doe sij ondersocht hadden den ghenen diet gedaen hadde: so wort hem gheseit. Ge-

[p. *319]

deon ioas soen heuet dit al gedaen.

30

Ende si seiden tot ioas. Brengt wt dinen soen dat hi sterue: om dat hi baals outaer ghebroken heeft: ende den bussche of ghehouwen.

31

Ende hi antwoerde hem. Sijt ghi baals wrekers: dat ghi ouer hem vechten sult? Die sijn wedersake is hij sal steruen: eer tlicht van morghen comen sal. Ofte hi god is: soe wreke hi hem seluen anden ghenen die sinen outaer omgheworpen heeft.

32

Van dien daghe wort gedeon geheten iherobaal. om dat ioas gheseit hadde. baal wreke hem seluen. vanden ghenen die sijn outaer omghegrauen heeft.

33

Dus wort al madyan ende amalech ende alt volc van oest te gader vergadert: ende si togen ouer die iordane: ende si sloghen tenten in die valeye van iesrahel

34

ende sheren geest clede gedeon: ende hi maecte geluyt mit trompen ende hi vergaderde abiezers huys dat si hem volghen souden.

35

Ende hij sant boden in al manasses: ende hi volghede hem oec. Ende hi sant ander boden in azer ende in zabulon ende in neptalim: ende si quamen hem te gemoete.

36

Ende gedeon seide totten here. Oftu behouden sultste maken israhel bi mijnre hant also du ghesproken hebste:

37

soe sal ic dit vlies wolle op die aerde leggen Ist dat allene int vleis verscheit wesen sal ende in al tlant droecheit. soe sal ic weten dattu israhel verlossen sultste bi mijnre hant also du gesproken hebste.

38

Ende het geschiede also. Ende hi stont bi nachte op ende wranc tvlies ende volde een scelpe mitten douwe.

39

Ende hi seide echter totten here. En vergramme dijn toren ieghen mi niet of ic noch eenwarf proue een teyken eysschende inden vlieze. Ic bidde dattet tvlies allene droech si: ende dat al tlant ververschet si mit douwe.

40

Ende die here sende in dier nachte also hi geheyschet hadde ende int vlies allene was droecheit: ende douwe in al tlant.