Bible in duytsche (Delftse bijbel 1477)

§ Ca .iiij

1

ENde na aoths doot soe dadenre die kinder van israhel toe noch quaet in sheren aenscouwen:

2

ende die here leuerdese in iabin sconins van chanaans hande die in azor regneerde ende hi had een maerscalc van sinen heere die sizara heet. Want hi woende in arozeth der heyden.

3

Ende die kinder van israhel riepen totten here. Want iabin had neghen hondert cromme waghenen: ende twintich iaer hadde hi alte zeer israhel tonderhouden.

4

Ende in dien tiden was debbora lapidoths wijf een prophetinne die tvolc doe vonniste:

5

ende si sat onder een palmboem die na haren name heet. inden berghe van ephraym tusschen rama ende bethel: ende die kinder van israhel quamen op te haer om alle vonnissen.

6

Ende si sant ende riep barach abynoems soen van neptalims cedes: ende seide tot hem. Die here god van israhel heeftet di beuolen. Ganc neder leide een heere opten berch thabor: ende du sultste mitti nemen tien du-

[p. *315]

sent manuen vechters van neptalims kinderen ende zabulons kinderen.

7

Want ic sal totti brengen in die stat der riuieren van cyson syzaran den maerscalc van iabins heere ende sijn wagenen ende al sijn menichte: ende ic salse leueren in dijnre hant.

8

Ende barach seide tot haer. Coemtstu mit mi soe sal icker gaen: ende wiltstu niet mede comen soe en sal icker niet tiden.

9

Ende sij seide tot hem. Ic sal mitti gaen: mer dese reyse en salmen di die victorie niet gheuen: want in eens wijfs hant sal sysara gheleuert worden Ende debbora stont dus op ende ghinc mit barach in cedes.

10

Ende hi dede comen zabulon ende neptalim ende ginc op mit tien dusent vechters: ende had debboram int gheselscap.

11

Ende aber die cyneus was wilen gegaen van cyneen sinen ouden bruederen die ababs sonen waren moyses maech. ende hi had sine woninghe ghespart totter valeyen die men heet sennim: ende si is neuen cedes.

12

Ende sisara wort gheboetscapt. dat barach abinoens soen opcomen was inden berghe thabor.

13

Ende hij vergaderde die neghen hondert cromme wagenen: ende al there van arozeth der heidenen ter riuieren cyson.

14

Ende debbora seide tot barach. Stant op. want dit is die dach daer die here sysaram in dijn handen heeft gheleuert. Sich hi is dine leydere. Ende barach ghinc neder van den berch thabor: ende die tien dusent vechters mit hem.

15

Ende die heer vervaerde sysaram ende alle sine waghene ende alle sine menichte in zwaerts mont te barachs aenscouwen: also sere dat sysara van sinen wagen spranc ende vloe mitten voeten:

16

ende barach volghede den waghenen die vlouwen ende there tot aroseth der heydenen: ende alle die menichte der viande viel neder ter doot.

17

Mer doe sysara vloe. so quam hi tot iahels woninghe die abers cyneus wijf was Want het was paeys tusschen iabin den coninc van azor ende abers cyneus huys.

18

Ende dus ghinc iahel wt in sysare ghemoet ende seide tot hem. Here mijn com in te mi: ende ontsich di niet. Ende hij ghinc in haer woninghe ende si ouerdecten mit enen clede:

19

ende hi seide tot haer Ic bidde di gif mij een luttel waters want mi dorst harde zeer. Ende si dede op enen tobbe mit melke ende gaf hem drincken ende si decten.

20

Ende sysara seide tot haer. Stant voer die dore der woningen: ende als daer yemant coemt die di vraget: ende seit. is hier yemant: so sultstu antwoerden. Hier en is nyemant.

21

Ende iahel abers wijf nam den nagel vander dore ende nammer oec enen hamer mede: ende si ginc al heymeliken in. al swigendende Ende si sette den naghel op den slape van sinen hoefde. ende sloger op mit enen hamer ende sij doersloech sijn harsebecken tot in daerde: ende geselde sinen slape mitter doot ende gebrac ende starf.

22

Sich barach quam sysaram nauolghende ende iahel ginc vte in sijn gemoet: ende seide. Coemt dat ic dij tonen mach die man die du soecste Ende doe hi tot haer incomen was. so sach hi sysaram doot legghen: ende den naghel doer sijn slape gheslegen.

23

Ende in dien dage so veroetmoedichde god iabin den coninc van chanaan voer die

[p. *316]

kinder van israhel:

24

ende alle dage wiessen ende mit starcker hant daden sij tonder den coninc iabin van chanaan tot dat sine afgedaen hadden.