Bible in duytsche (Delftse bijbel 1477)

§ Ca iij.

1

DIt sijn die heidenen die die here liet dat hi israhel in hem luden leren soude. ende alle die niet en kenden der chananeen striden:

2

ende dat haer kinderen naemaels souden leren striden ieghen die vianden. ende dat si custume souden hebben te striden:

3

viue barone vanden philistijm. ende alle die cananeen ende sydonien ende eueen. die woenden inden berghe lybano vanden berghe baalhermon totten inganghe van emath.

4

Ende hi lietse om dat hi in hem luden israhel gewaer worden soude: weder si sheren gheboden houden souden die hi haer vaders gheboot bi moyses hant: ofte niet.

5

Ende aldus woenden die kinder van israhel in die middewaert vanden chananeen ende die etheen ende amorreen ende die pherezeen ende die eueen ende die iebuzeen:

6

ende si namen te wiue haer dochteren ende si gauen weder om haer dochteren haer sonen. ende dienden haren god.

7

Ende si deden quaet in sheren aenscouwen: ende si vergaten haers gods name ende dienden baalim ende astaroth

8

Ende die here wort vergramt iegen israhel ende hi leverdese in chusamrasathaims hant sconincs van mesopotamien: ende si dienden hem acht iaer.

9

Ende si riepen ten here: ende hi verwecte hem een verlosser ende hi verlostese othoniel cenes soen. calephs minste brueder:

10

ende sheren gheest was in hem ende hi vonniste israhel. Ende hi ghinc vte ten stride: ende die here leuerde in sine hande chusamrasathaim die coninc van syrien ende bedwancken.

11

Ende tlant ruste veertich iaer: ende othoniel cenes soen starf

12

Ende die kinder van israhel dadenre toe quaet noch te doen insheeen aenscouwen: ende hi verstoute iegen hem eglon den coninc van moab: om dat si quaet daden in sheren aenscouwen

13

Ende si ghezelden mit eglon ammons kindere ende amalech: ende hi ginc wech ende sloech israhel ende besat die stede vanden palmen.

14

Ende die kinder van israhel dienden eglon den coninc van moab achtien iaer:

15

ende daer na riepen si totten here. Ende hij verwecte hem enen verlosser die aoth gerasoen heet die iemims sone was die beide sine hande besichde ouer die rechterhant. Ende die kinder van israhel senden mit hem. eglon den coninc giften.

16

Ende aoth makede hem een scarp zwaert dat in midden had een hilte die lanc was een palm vander hant: ende hi haddet gegort onder sine torrekele ende op sijn rechte dye.

17

Ende hi gaf eglon den coninc van moab ghiften. Ende eglon was seer vet.

18

Ende doe hi hem die ghiften gegheuen hadde so volghede hi den ghesellen na die mit hem ghecomen waren:

19

ende doe hi wederghekeet was van galgala daer die afgode waren so seide hi totten coninc O coninc ic heb een heimelijc woert

[p. *314]

mitti te spreken. Ende die coninc geboet te swighen. Ende doe si al wtghegaen waren die omtrent hem waren.

20

so ghinc aoth tot hem in want hi sat alleen in die somer camer Ende aoth seide Ic heb sheren woert totti. Ende hi stont te hant op vanden zetel.

21

Ende aoth stac sijn luchterhant voert ende nam tsteeczwaert van sijnre rechter dye: ende hi stact so vromelijc in sinen buyc

22

dat die hilte tyser volghede in die wonde: ende dattet omwonden wort mit sinen vetten smere. Ende hi trac tswaert niet vte: mer also hijt ghesteken had soe liet hijt inden lichame: ende te hant braken sine stronte wt sinen buycke doer der natueren heimelicheit.

23

Ende aoth sloot harde naersteliken die doren vander cameren ende slootse mitten sloten:

24

ende hi ghinc doer een achterdore. ende doe sconincs knapen in quamen so saghen si die doren gesloten vander cameren: ende seiden: Machschien hi suuert sinen buke in die somercamere.

25

Ende si beiden langhe tot dat hem verwonderde ende doe si sagen datse nyemant op en dede. so namen si den slotel. ende doe si die doren op daden. so vonden si haren here doot legghende op die aerde.

26

Ende die wile dat si verstoert waren soe vloe aoth: ende hi leet ouer die stat daer die afgoden stonden van daer hij weder comen was. Ende hij quam in serath.

27

ende te hant maecte hij gheluyt mit trompen in ephrayms berge. ende die kinder van israhel quamen mit hem neder ende hi ghinc hem voer.

28

Ende hij seide. Volget mi Want die here heeft die moabiten geleyt in onsen handen. Ende si ghingen na hem neder ende beleide die ghewade vander iordanen aldaer men ouergaet in moab. ende si en lietenre nyemant ouerliden:

29

mer si verslogenre in dien tiden vanden moabiten omtrent tien dusent alte starcke vrome mannen. Ende niemant van hem luden en mochten ontgaen.

30

Ende in dien daghe wort moab veroetmoedicht onder israhels hant: ende tlant ruste tachtich iaer van stride.

31

Na aoth was samgar anaths soen: ende hi versloech mit enen kouter vanden philistijm seshondert mannen. Ende hi beschermde oec isrhael.