Bible in duytsche (Delftse bijbel 1477)

Capittel .xxiij

1

ALs vele tijts ouer leden was na dien dat die here israhel paeys ghegeuen hadde. ende hem alle nacien al om en tomme tonder waren. ende iosue lange geleeft hadde ende seer out was:

2

so riep iosue al israhel. ende die meeste van gheboerten ende die princen ende die leydsmannen ende die meeste: ende seide tot hem Siet ic bin out gheworden ende van groter outheit:

3

ende ghi siet. alle dat die here v god tonderghedaen heeft alden nacien al om en tomme. hoe hi ouer v gheuochten heeft.

4

Ende nv dat hi v luden al tlant mitten lotte gedeelt heeft. vander oestziden ter iordanen totter groter zee. ende noch sijn hier bouen vele nacien:

5

die here v god salse verdriuen ende wech doen van uwen aensichte ende gi sult besitten tlant als hi v geloeft heeft

6

alleen sijt vrome ende sorchuoudich. dat gi wacht al dat ghescreuen is inden boec van moyses wet: ende en keert v daer niet of noch ter rechterhant noch ter slinckerhant:

7

dats als ghi inghegaen sult wesen ten heydene die onder v comen sullen: dat ghi niet en sweert in den name van haren gode: ende dat ghi hem niet en dient noch die en aenbeet:

8

mer ghi sult v houden anden hare uwen god alse ghi tot desen daghe toe hebt ghedaen.

9

Ende dan sal die here van uwen aenscouwen doen grote heydene ende starcke: ende nyemant en sal v moghe wederstaen.

10

Een van v luden sal dusent manne vanden vianden veriaghen: want die here v god sal ouer v vechten also hij v beloeft heeft:

11

mer dit voerwacht alte naersteliken dat ghi den here uwen god mint.

12

Mer wildi v houden ander hei-

[p. *308]

dene dolinghe die onder v wonen. ende mit hem huwelike maken ende mit vrientscappen v mit hem menghen

13

soe weet nv te hant datse die here niet afdoen en sal voer v aensichte. mer si sullen v sijn in putte ende in stricke ende daer ghij v aenstoten sult mitter ziden ende een hinder ende tuynstaec in uwen oghen: tot dat v die here sal ofdoen ende verdriuen van desen alten gueden lande dat hi v geleuert heeft.

14

Siet ic sal huden ingaen den wech van alden lande: ende ghi bekent mit al uwer ghedachten dat van allen dien woerde die de here belooft heeft dat hi v verlenen soude: datter een te vergheefs niet ouerleden en is.

15

Ghelijc dan dat hi voldaen heeft mit werke dat hi beloeft heeft ende dat si alle voerspoedelijc ghecomen sijn: alsoe sal hi op v brenghen so wat quade hi ghedreighet heeft. tot dat hi v ofghedaen sal hebben ende verdreuen van desen alten gueden lande dat hij v gheleuert heeft:

16

om dat ghi ouerghegaen sijt sheren uwes gods belofte die hi mit v gemaect heeft. ende om dat gi vreemde goden ghedient hebt ende dien aenbeet. Dollic ende haestelic sal sheren gramscap ieghen v risen: ende ghi sult wech worden gheuoert van desen alten gueden lande dat hi v geleuert heeft