Bible in duytsche (Delftse bijbel 1477)

Capit .xxiiij

1

Osue vergaderde alle die geslachten van israhel in sychem. ende hi riep die meeste van gheboerten ende die princen ende die rechters ende die meeste. ende si stonden in sheren aenscouwen:

2

ende hi sprac totten volc aldus Dit seit die here god van israhel. Vanden beginne so woenden v brueders ouer die riuiere. thare abrahams vader nachor: ende si dienden vreemde goden.

3

Mer ic brachte abraham uwen vader vten lande van mesopothamia ende brachten int lant van chanaan. ende ic menichfoudichde sijn saet ende ic gaf hem ysaac:

4

ende dien gaf ic echter iacob ende esau. Vanden welken ic esau gaf den berch seyr te besitten: mer iacob ende sijn sonen ghingen neder in egipten

5

ende ic sant moysen ende aaron ende ic sloech mit vele teykenen egipten ende wonderen:

6

ende ic leyder v vte ende uwen vaderen wt egipten ende gi quaemt ter zee: ende die van egipten volchden uwe vaders nae mit waghenen ende mit geredenen totter roder zee.

7

Ende die kinder van israhel riepen totten here: ende hi settede tusschen v ende die van egipten donckerheden: ende hi brachte die zee op hem ende hi ouerdectese. V oghen hebbent gesien al dat ic in egipten heb ghedaen: ende vele tijts wanderde ghi doer die wildernisse:

8

ende ic heb v ghebracht in amorreus lant die ouer die iordane woende Ende doe si ieghen v vochten. doe gaf icse in uwen handen: ende ghi hebt haer lant beseten ende hebste ghedoot.

9

Ende balach sephors soen die coninc van moab stont op: ende vacht iegen israhel. Ende hi sant ende riep balaam beors soen dat hi v luden vermaledyen soude:

10

ende ic en wouts niet horen: mer wederkeert soe gebenedide ic v luden bi hem: ende ic verloste v van sijnre hant.

11

Ende ghi leet ouer die iordaen ende quaemt te iericho ende die mannen van dier steden vochten ieghens v. die amorreen ende die phere-

[p. *309]

zeen ende die chananeen ende die etheen ende die gergozeen ende die eveen ende die iebuzeen ende ic leuerde die in v handen.

12

Ende ic sant voer v weuels end ic verdreefse van haren steden. twe coningen vanden amorreen niet in dinen zwaerde ende in dinen boghe:

13

ende ic heb v ghegheuen tlant daer du niet in gepijnt en hebste. ende die poorte die du niet gesticht en hebste. dat ghi daer in wonen sout: wijngaerden ende olyegaerden die gi niet gheplant en hebt

14

Nu hier om so ontsiet den here ende diene hem mit volmaecter hetren ende mit gewariger ende duet wech die goden die uwe vaderen dienden in mesopothamien ende in egipten: ende dient den here.

15

Mer ist dat v quaet dunct dat gi den here dient so gheeftmen v kore. Kieset huden dat v ghenoghet wien ghi waerdeliken dienen sult: weder den goden die v vaderen dienden in mesopotamien: ofte dier goden van amorreen in welker lant ghi woent. Mer ic ende mijn huys wij sullen den here dienen.

16

Ende tfolc antwoerde ende seide. Dat moet van ons sijn dat wij den here laten sullen. ende dienen vreemde goden.

17

Die here onse god die leide ons ende onse vaders wt gipten. vanden huse des dienstes: ende hi dede grote teykenen daer wijt sagen ende hi heeft ons behuet in alden wech die wij doer ghewandert hebben. ende in alle volc daer wi doerleden sijn:

18

ende hi heeft verdreuen al die heidenen. die amorreen die in dit lant woenden daer wi inghecomen sijn. Hier om sullen wi den here dienen: want hi is onse god

19

Ende iosue seide totten volke. Ghi sult den here niet mogen dienen: want god is heilich ende starcke benidere: ende hi en sal v sonden noch v misdaet niet vergheuen.

20

Want lati den here ende diendi vreemde goden. so sal hi hem ommekeren ende quellen v ende werpen v auerecht: also hi v guet verleent sal hebben.

21

Ende tvolc seide tot iosue. En sal alsoe niet wesen alstu spreecste: mer wi sullen den here dienen.

22

Ende iosue seide totten volken: ghi sijt oerconde: dat ghi den here vercoren hebt dat ghi hem dienen sult. Ende si antwoerden. Wi sijns oerconde.

23

Nu sprac hi so doet wech die vreemde goden van midden v: ende neycht v herte neder ten here gode van israhel

24

Ende tvolc seide tot iosue. Wij sullen dienen den here god: ende wi sullen ghehoersaem wesen sinen gheboden.

25

In dien daghe sloech dus iosue belofte: ende hi sette voer tvolc die gheboden ende die vonnissen in sychem.

26

Ende hi screef alle dese woerden inden boec van sheren wet ende hi nam enen harden groten stene. ende hi leiden onder die arke die inder sanctuarien was:

27

ende hi seide tot al desen volke. Siet desen steen sal v wesen in oercontscap. dat ghi ghehoert hebt alle sheren woerde die hi v ghesproken heeft: of gi en machschien naemaels lochenen wilt ende lieghen den here uwen god.

28

Ende iosue liet tvolc gaen: elc in sine possessie.

29

Hier na starf iosue nuns soen sheren knechte. doe hij out was hondert ende tien iaer:

30

ende si grouen int einde van sijnre possessien in thamnathsaren die staet in ephrayms berghe ter noertzi-

[p. *310]

de vanden berghe gaas.

31

Ende israhel diende den here al iosuees daghen. ende die ouders die langhen tijt leueden na iosue: ende die al sheren werken wisten die hi in israhel ghedaen hadde.

32

Iosephs beenre die die kinder van israhel wt egipten ghebracht hadden. grouen sij in sychem in ene zide van dien ackere die iacob gecocht hadde van emmors sonen die sychems vader was om hondert ionghe lammeren: ende hi was in iosephs kindere possessie.

33

Eleazar aarons soen starf: ende phinees sonen grouen in gabaath: die hem ghegheuen was in ephrayms berghe.

§ Hier eyndt iosue.