Bible in duytsche (Delftse bijbel 1477)

§ Capittel .xxij

1

TE deser seluer tijt riep iosue die rubenite ende die gaddite. ende half tgheslachte van manasses:

2

ende seide tot hem Ghi hebt al ghedaen dat v moyses sheren knechte beual. ende gij hebt mi in allen oec ghehoersaem geweest.

3

ende in langhe tide en hebdi uwe bruederen niet ghelaten tot in desen daghe: ende hebt gewacht sheren uwes gods gebot.

4

Ende om dat die here v god uwen bruederen heuet ghegeuen ruste ende paeyse alsoe hi beloeft heeft: keert weder ende gaet te uwer woninghen ende int lant uwer possessien. dat v moyses sheren knechte gaf ouer die iordane

5

Na also: dat ghi naersteliken wacht ende voldoet mit werke die ghebode ende die wet die moyses sheren knecht beuolen heeft: dat ghi den here uwen god mint ende dat ghi wandert in alle sine wegen. ende hout van hem ende onthout sine gheboden: ende dient hem in al uwer herten ende in al uwer zielen.

6

Ende iosue gebenedide hem ende lietse gaen. Ende si keerden weder te haren woenninghen waert.

7

Want moyses hadde half den geslachte van manasses possessie ghegheuen in basan: ende hier om gaf iosue half den gheslachte datter ouer bleef lot. onder haer brueders ouer die iordane ter westziden der iordanen. Ende doese iosue liet gaen te haren woninghe waert ende hijse ghebenedijt hadde:

8

so seide hi tot hem. Keert weder in uwen steden in veel guets ende rijcheden: mit siluer ende mit goude coper ende ysere ende menigerhande clede. Deelt den roef van den vianden mit uwen bruederen

9

Ende rubens ende gads. ende half tgheslachte van manasses keerden weder vanden kinderen van israhel. wt sylo die in chanaan staet: dat si gaen souden in galaad int lant haerre possessien. dat si behouden hadden na sheren ghebot bi moyses hant.

10

Ende doe si gecomen waren ten houelen ter iordanen int lant van chanaan: soe stich-

[p. *306]

ten si neuen die iordane een outaer ouer tellijc groot.

11

Doe dat die kinder van israhel hoerden ende ghewarige boden tot hem gebracht hadden dat ruben ende gads kinderen ende half tgheslachte van manasse hadden ghesticht een outaer ieghen die kinderen van israhel int tlant van chanaan op die houele der iordanen

12

soe vergaderden si al in sylo: dat si opgaen souden ende ieghen hem striden.

13

Ende hier en binnen senden si te hem in tlant van galaad phinees: den pape eleazars soen:

14

ende tien princen mit hem een wt elken geslachte.

15

Ende si quamen in tlant van galaad tot rubens ende gads kindere ende tot half den gheslachte van manasse: ende seiden tot hem

16

Dit onbiet v alle sheren volc. Wat ouerdaet is dit? Waer om heb di gelaten den here god van israhel ende hebt ghesticht enen vermeensaemden outare. ende sijt van sijnre oeffeninghen afghegaen?

17

Ist v cleyne dinc dat gij sondicht in beelphegor. ende dat noch tot in desen daghe die smet deser misdaet in v gheduyert:

18

ende datter vele vanden volke vlien? Ende ghi hebt huden den here ghelaten: ende morghen sal ieghen al israhel sheren gramscap verstoren.

19

Ist dat ghi waent dattet lant uwer possessien onsuuer is. so coemt ouer in tlant daer sheren tabernakel in is: ende woent onder ons: allene dat gi niet af en gaet vanden here ende van onsen gheselscap. dat ghi enen anderen outaer sticht sonder sheren uwes gods outare.

20

Ende brac achor zare soen oec sheren ghebot ende en viele sine gramscap niet op alle israhel. Ende dat was een man: ende vergaue god dat hi allene verdoruen ware in sine misdaet.

21

Ende rubens ende gads kinderen ende half tgeslachte van manasses antwoerden den princen van israhels boetscap.

22

Die alre machtichste god hi die here weet. ende israhel salt oec verstaen: ist dat wi van ouerdadicheden desen outaer hebben ghesticht: so en moet hij ons niet behoeden. mer hi moet ons castien in deser ieghenwoerdicheit.

23

Ende ofte wine inder ghedachten hebben gemaect dat wiere op legghen souden holocauste ende sacrificien ende danckelike offerhanden soe moet hijt soken ende vonnissen:

24

ende en hebben wijt niet mere gedaen iu desen ghepensen ende mit desen rade. dat wi seghhen souden: morgen sullen v kinderen onse kinderen seggen. Wat is v luden ende den here god van israhel?

25

O rubens ende gads kinderen ende half tgheslachte van manasses. die here heeft die iordane te enen termine geleit tusschen ons ende v: ende hier om en hebdi ne ghene dele inden here: ende mit desen occusoen souden v kinderen onse kinderen afkeren van sheren vrese.

26

Ende daer om docht ons beter ende wi seiden. Stichten wij onse luden enen outaer niet om holocauste ende victimen te offeren.

27

mer in oercontsacppen tusschen ons ende v. tusschen v kint ende uwe gheslachten dat wij den here moghen dienen: ende dat ons rechte sij te offeren holocauste ende victimen ende danckelike offerhande: ende v kinderen en sullen morghen ne gene sins onse kinderen moghen segghen. v luden en is ne ghene dele inden here.

28

Ende ist dat sijt

[p. *307]

willen segggen: so sullen si hem antwoerden. Siet sheren outaer die onse vaders maecten. niet te holocauste ende te sacrificie: mer in uwen enighen oercontscap ende den onsen.

29

Dese misdaet moet van ons wesen dat wij vanden here afgaen souden ende dat wij sine voetstappen laten souden. ende dat wi enen outaer stichten souden te holocauste ende te sacrificie ende te victimen: sonder ons heren ons gods outaer die ghemaect is voer sine tabernacule.

30

Doe dit phinees die priester ende die princen van israhels boetscap. die mit hem waren hoerden. so waren si ghepaeyt: ende si ontfinghen alte gaerne rubens ende gads kindere ende half den geslachte van manasses dese woerde.

31

Ende phinees die paep eleazars soen seide tot hem. Nu weten wi dat die here mit ons si. want ghij sijt onsculdich van deser misdaet: ende ghi hebt die kindere van israhel verlost van sheren hant.

32

Ende hi keerder weder mitten princen van gads kinderen ende rubens ende half den gheslachte van manasse vten lande van galaad vanden einde van chanaan totten kinderen van israhel: ende hi verteldet hem.

33

Ende die redenen ghenoechden hem allen diese hoerden. Ende die kinderen van israhel loefden gode: ende voert en seiden si nemmermeer dat si opgaen souden ende vechten iegen hem ende dat si afdoen souden tlant haerre possessie.

34

Ende rubens ende gads kinderen heeten den outaer die si gemaect hadden: onse oercontscap. dattie here god selue sij.