Bible in duytsche (Delftse bijbel 1477)

§ Capit .xxi

1

DIe princen vanden familien van leui quamen tot eleazer den pape. ende tot iosue nuns soen ende totten leidsmannen ter maechscepen van elken gheslachte der kinder van israhel:

2

ende si spraken tot hem in sylo int lant van chanaan ende seiden Die here heeft beuolen bi moyses hant datmen ons gheuen soude poorten in te wonen: ende buyten landen om beesten te voeden.

3

Ende na sheren ghebot gauen die kinder van israhel van haren possessien den leuyten steden ende haer buyten lant.

4

Ende

[p. *304]

ene lotte quam vte in chaaths familie aarons spapen kinderen op dertien steden. van iudas. ende symeons ende benyamins gheslachte:

5

ende den anderen chaaths sonen dat is den leuiten die ouer waren op tien steden vanden geslachte van effrayms ende dans ende van half den geslachte van manasse.

6

Ende gersons sonen quam een lotte wt dat si dertien steden ontfaen souden vanden gheslachte van ysachar ende van azer ende van neptalim. ende half den gheslachte van manasses in basan.

7

Ende merari sonen bi haren maechscappen dat si ontfaen souden twalef poorten van rubens ende zabulons ende gads gheslachten.

8

Ende die kinderen van israhel gauen den leuiten steden ende haer buyten lant. also die here beuolen hadde bi moyses hant een igelijc geuende mitten lote.

9

Ende iosue gaf aarons sonen chaats familien

10

van leuijs geslachten van iudas ende van symeons gheslachten. vanden welken dit die namen sijn.

11

Teerste lotte quam vte op cariatharbe. die enachs vader was. diemen hebron hete in iudas berghe. ende haer buyten lant al om en tomme

12

Mer hi hadde ghegeuen caleph iephone soen te besitten haer ackers ende haer dorpen.

13

Dus gaf hi aarons des papen sonen hebron der ballinge stat ende haer buyten lant. ende lobnam mit haren buyten landen.

14

ende iether ende estimon

15

ende helon ende dabir

16

ende ayn ende iethan ende bethsames mit haren buyten laden neghen steden van twee gheslachten als voerseit is

17

Ende van benyamins kinder gheslachte gaf hi gabaon ende gabae

18

ende anathot ende almon mit haren buyten lande vier steden:

19

aarons spapen sonen steden waren altegader dertien mit haren buyten landen.

20

Mer den anderen chaats sonen bi haren familien die van leuijs gheslachte waren was dese possessie gegheuen.

21

Van ephrayms gheslachte gaf hi hem die stede der toevlucht sychem mit haren buyten lande in ephrayms berghe gazer

22

ende iebsam bethoron mit haren buyten lande vier steden.

23

ende van dans gheslachte helteto. ende gabathon

24

ende hayalon ende gethremmon mit haren buyten landen vier steden.

25

Ende van half den gheslachte van manasses tanach ende gethremmon mit haren buyten lande twe steden.

26

Alder steden waren tien ende haer buyten landen die ghegheuen waren chaaths sonen die vanden nedersten staet waren.

27

hi gaf oec gersons sonen die van leuijs gheslachte waren van half den gheslachte van manasses gaulon in basan der ballinghe steden ende bosram mit haren buyten landen twe steden.

28

Ende van ysachars gheslachte gaf hi hem chesion ende dabrech

29

ende iaramoth ende engamum mit haren buyten landen vier steden.

30

Ende van azers gheslachte gaf hi hem masan ende abdon

31

ende elrath ende roob ende haren buyten lande vier steden.

32

Ende van neptalims gheslachte gaf hi hem der ballinghe steden cedes in galilea ende amothdor: ende carthari in haren buyten lande drie steden.

33

Al die steden van gersons familien waren dertien mit haren buyten lande.

34

Ende merari sonen die leuyten die vanden nedersten state waren gafmen bi haren familien na zabu-

[p. *305]

lons gheslachte ietnal chartha

35

ende danna ende naabol vier steden mit haren buyten landen.

36[21:37]

Ende van gads geslachte gaf hi hem der ballinghe stat ramoth in galaad. ende manaym in esebon ende iazer vier steden mit haren buyten landen

37[21:36]

Ende van rubens geslachte ouer die iordane ieghen iericho gaf hi hem der ballinge stat bosor inder wildernisse misor ende iaser ende iethson ende maspha vier steden mit haren buyten lande.

38

Alle merarijs sonen hadden steden bi haren familien ende haren maechscappen ende waren twaelf.

39

Aldus waren alder leuyten steden in midden der possessien der kindere van israhel ende waren acht: ende veertich mit haren buyten landen

40

men deeldese elken na sinen familien.

41

ende die here gaf israhel al dat lant dat hi ghesworen had haren vaderen dat hijt hem gheuen soude: ende si besatent ende woendenre in.

42

Ende van hem wort paeys ghegheuen in allen geslachten al om en tomme: ende nyemant vanden vianden en dorste hem steken ieghen hem: mer si waren al tonder ghedaen in israhels rijcheit.

43

Ende een woert en bleef niet achter dat hem die here beloeft hadde te verlenen. mer het wort al voldaen in die daet