Bible in duytsche (Delftse bijbel 1477)

Cap .xx

1

ENde die here sprac tot iosue ende seide.

2

Spreec den kinderen van israhel ende segt tot hem. Verscheit der ballinge poorte. daer ic of gesproken hebbe tot v bi moyses hant:

3

dat hiere toe vlien mach so wie dat onwetende een ziele ghesleghen heeft. dat hi des naesten gramscap moghe ontvlien. die wrekere van den bluede is.

4

als hi te eenre van desen steden ghevlouwen sal wesen: ende hij sal staen voer die poorte vander stede ende hi sal den ouders van dier steden segghen. die dinghen die hem ontsculdeliken prouen: ende also sullen si hem ontfaen. ende gheuen hem stat te wonen.

5

Ende als hem den wrekere van dien bluede nauolghet so en sullen si hem in sine hant niet leueren. want hi sloech onwetende sinen naesten: ende men prouet niet dat hi sine viant was ouer twe ofte ouer drie daghen.

6

Ende hi sal wonen in die stede tot dat hi voer tfonnisse sal staen ende die sake gheuen van sinen fayte: ende tot dat die grote paep steruen sal die in dien daghe wesen sal. Dan sal die manslachtighe wederkeren ende hi sal comen in sine stede ende in sijn huys daer hi wt is gheulouwen.

7

Ende hi sette den cedes in galilea in neptalyms berghe. ende sychem in effrayms berge. ende cariatharbe dat is hebron in iudas berghe:

8

ende ouer die iordaen ieghen die oestzide ieghen iericho so ordineerde hi bosor die ghesticht is in die campaendelike wildernisse van rubens geslachte. ende ramoth in galaad van gads gheslachte. ende gaulon in basan van manasses gheslachte.

9

Dese steden waren gheordineert alden kinderen van israhel ende den toecomelinghen die onder hem woenden dat hiere toe vlien soude die onwetende een ziele ghesleghen hadde: ende dat hi niet steruen en soude ints naesten hant. die begeren soude te wreken dat wtgestorte bluet voer dat hij voer tvolc staen soude ende sine sake voertsetten