Bible in duytsche (Delftse bijbel 1477)

§ Capittel xviij.

1

ALle die kinder van israhel worden vergadert in sylo. ende daer setten si die tabernakel der oercondscap: ende tlant was hem onderdaen.

2

Ende vanden kinderen van israhel waren noch bleuen seuen geslachten. die noch haer possessien niet ontfanghen en hadden.

3

Ende iosue seide tot hem. Hoe langhe vertraghedi mit satheden. ende en gaet niet om te besitten tlant: dat v gegeuen heeft die here uwer vaderen god.

4

Kiest wt elken gheslachte drie mannen. dat icse sende ende si sullen tiden ende tlant om varen. ende si sullent bescriuen na getal van elker menichten: ende si sullen te mi brenghen dat si bescriuen sullen

5

Deelt v lant in seuen deelen. Iudas sal sijn in sinen terminen vander zuytziden. ende iosephs huus vander noortziden:

6

tusschen dese twe soe deelt dijn dele lants in seuen delen: ende gi sult hier te mi comen. dat ic v hier voerden here uwen god tlot mach werpen:

7

want onder v en is ne gene dele der leuiten: ende der papen want die here is haer erfachticheit. Want gad ende ruben ende half tgheslachte van manasses hebben haer possesse ontfaen. ouer die iordane ter oestziden: die hem moyses sheren knecht gaf.

8

Ende doe die mannen opghestaen waren dat si tiden souden om tlant te bescriuen: so beual hem iosue ende seide. Gaet tlant om ende bescriuet: ende keert weder te mi. dat ic v hier voer den here in sylo tlot mach werpen.

9

Aldus tiden dese mannen wech ende besaghen tlant ende deeldent in seuen deelen. ende bescreuent in enen boec: ende si keerden weder tot iosue ten getelden in sylo

10

Ende hi warp die lotte voerden here in sylo: ende hi deelde die kinder van israhel tlant in seuen delen.

11

Ende teerste lotte quam op benyamins kinderen ende hoer familien. dat si tlant besitten souden onder iudas kinderen ende iosephs kinderen.

12

Ende hoer terminen waren ieghen tnoerden. vander iordanen streckende neuen die zide van iericho ter noorsiden. ende van danen ghinc hij opten montaengen iegen twesten. ende quam inder wildernissen bethauen.

13

ende hi leet ouer ten suydenen neuen lusam dits bethel: ende hi gaet neder in ataroth addir inden

[p. *301]

berge die is ten zuyden vanden nedersten bethoron:

14

ende hi daelt neder omgaende iegen die zee ten zuyden vanden berge die bethoron scouwet ieghen affricum Ende sine wtghanghe sijn in chariahtbaal. datmen chariathiarim heet een poort der kinderen iudas. Dit is die zide ieghen die zee ende ten westen.

15

Ende ten zuyden van chariathiarim gaet die termine wt ieghen die zee. ende hi comt totten fonteynen vanden wateren nepthoa:

16

ende hi gaet neder in een deele vanden berghe die scouwet ennons sonen valeye. ende hij is ieghen die noortzide in die achterste dele der valeyen raphaym: ende hi gaet neder te iehennon dat is ennons valeye. neven iebuzeus zide ten zuyden ende coemt ter fonteynen rogel

17

ende gater ouer ten noerden. ende gaet wt te ensemes daer is der sonnen fonteyne ende hi gaet ouer totten hopen die sijn ieghen den opganc van adommin: ende hij gaet neder tot habenboen dat is die stene boens rubens soen.

18

ende ter ziden van noert so gaet hi ouer ten campangen ende hi gaet ouer ten pleynen

19

ende hij gaet ouer ieghen tnoerden van bethagla ende sijn wtghanghen sijn ten noerden ieghen den arme vander souter zee in deinde der iordanen ter zuyden zide.

20

ende heuet die termine van oest Dat is benyamins possessie bi sinen terminen al om en tomme ende bi elken familien.

21

Ende sine steden waren. ihericho ende bethagla ende casis valeye

22

betharaba ende samaraim ende bethel

23

ende auim ende affata ende offora.

24

ende dat dorp hemona ende offui ende gabee twaelf steden ende haer dorpen

25

Gabaon ende rama ende beroth

26

mesphe caphara ende ammosa

27

ende recem ende iarephel ende tharela

28

ende sela heleph ende iebus dits iherusalem. gabaad ende chariath: vierthien steden ende haer dorpen. ende alle dese steden sullen wesen ses ende twintich. Dit is benyamins kindere possessie bi haren familien