Bible in duytsche (Delftse bijbel 1477)

§ Ca xvij

1

MAnasses gheslachte die iosephs eerste sone was van geboerte lotte viele: mathir den eersten gheboren sone manasses welc mathir galaads vader was die een man ende een vechter was: ende hi hadde in possessien basan. ende galaad

2

ende dandere van manasses kinderen bi haren familien. dat waren abiezers kinderen ende heleths kinderen ende hesrihels kinderen ende sychens kinderen ende ephers kinder ende semida kindere. Dit waren manasses sonen die iosephs sone was: die mannen bi haren maechscepen.

3

Mer salphaat ephers soen galaads sone ende machirs sone die manasses sone was hij en hadde ne ghene sonen mer dochteren: vanden welken dit die namen sijn. mahala ende noha ende egla ende meltha ende thersa.

4

Ende si quamen tot iosue in eleasars des papen aenscouwen ende der princen ende seiden: die here heeft beuolen bi moyses hant datmen ons possessie gheuen soude in midden onsen brueders. Ende iosue gaf haer possessie naden ghebode des heren in midden haers vaders brueders:

5

ende manasse viele tien maten al sonder tlant van galaad ende basan ouer die iordane.

6

Want manasses dochteren besaten erfachtichheit in midden sinen sonen Want tlant van galaad viel inden lotte van manasses sonen dier meer waren.

7

Ende manasses termine was van azer machmatha. welc aensiet sychem ende gaet vte ter rechter hant neuen die gene die wonen byder fonteynen thaphue

8

want in manasses lotte viel tafue die neuen manasses termine is ende neuen ephraims kinderen.

9

Ende die valaye vanden rieden gaet neder int suden neuen der riuieren van effrayms steden die in midden sijn effrayms poorten. Manasses termine is vander noertziden ter riuieren ende sijn wtganc trect ter zee waert:

10

also dat sijn possessie is van zuitwaert dats an effrayms: ende van noerden waert manasses possessie beide sluytse die zee: ende si sullen striken ten noorden in azers gheslachte ende ysachars geslachte van oest.

11

Ende manasses erfachticheit was in ysacher ende in azer. Bersan ende haer weghe. ende bersan iebblaan mit haren dorpen. ende die inwoenres van dor mit horen wtlanden: ende die woenden in endor mit horen dorpen: ende oec die woenden in thenach mit horen dorpen. ende die te mageddo woenden mit haren dorpen: ende dene derdendele der poorte nopheth.

12

Manasses kinderen en mochten dese steden niet gheslechten: mer die chananeen begonsten te wonen binnen haren lande.

13

Mer na die dattie kinderen van israhel machtich worden waren soe dadense die chananeen tonder ende maectense hem dienende onder tribuyt: ende si en dodense niet.

14

Ende iosephs sonen spraken tot iosue ende seiden. Waer om hebtstu mi ghegheuen possessien van enen lotte ende van eenre maten: als ic van dus

[p. *300]

groter menichten bin. ende mi die here ghebenedijt heeft.

15

Ende iosue seide tot hem. Bistu vele volcx so gaet op inden bussche ende houwe di pleyne in pherezeus ende raphayms lant. Want die possessie van effrayms berge is di te nauwe.

16

Ende iosephs sonen antwoerden hem Wij en sullen niet moghen opten montangen comen om dattie chananeen die wonen in tcampaengen lant besighen yseren waghenen: in welken lant bersan ghesticht is mit haren weghen ende iezrahel die half die valeye besittet:

17

ende iosue seide tot iosephs huse ende effraym ende manasses. Du biste van vele volcs ende van groter stercheit: du en sultste niet ene lotte hebben

18

mer du sultste ouergaen totten berghe. ende du sultste te dinen behoef houwen ende ruymmaken spacie om in te wonen: ende du sultste moghen ouergaen altstu verdreuen hebste die chananeen. die du segste dat sij yseren waghenen hebben ende alte starc sijn.