Bible in duytsche (Delftse bijbel 1477)

§ Ca .xvi

1

ENnde iosephs sonen lotte viele vander iordanen ieghen iericho. ende te haren watere van oest die wildernisse die opgaet te iericho ten berghe van bethel

2

ende gaet wt van bethel te lusan ende lijt ouer den termine van archyatharoth

3

ende coemt weder ten westen neuen den termine van iefleti totten termine vanden nedersten bethoron ende gazer: ende sine lantscepen eynden mitter groter zee

4

die iosephs sonen besaten manasses ende effraym

5

Ende effrayms kindere termine wordt na haren maechscepen ende hare possessie ieghen doeste van atharoth addur al totter hogher bethoron

6

ende deynde comen wt in die zee. Want machmetath scouwet noertwaert ende gaet om die termine ieghen doeste in thanatselo: ende gaet ouer vande ryuier ianoe.

7

ende hi gaet neder van ianoe in atharoth ende noaratha: ende coemt in iericho: ende gaet vte ter iordanen

8

van tafua ende hij lijt ouer ieghen die zee ende die valeye vanden rieden: ende sijn wtghanghen sijn in die soute zee Dit is die possessie van effrayms gheslachte bi haren familien:

9

die

[p. *299]

poorten die verscheiden sijn effrayms kindere in midden der possessien van manasses kindere ende haer dorpe

10

Ende effrayms kinderen en sloghen die chananeen niet doot die in gazer woenden ende chananeus woende in midden effrays kindere onder tribuit tot in desen dage